Galatas 5

1Ri Cristo ya xu'on libre chika choch ri ley. Rumare', cof quixc'ujie' ruma ix libres. Y man chic quixuoc jun b'ay chuxie' ri ley. 2Y tivaxaj-na-pe'. Inre' Pablo ni'ej chiva: Xa xtiya' lugar chi ni'an ri circuncisión chiva ruma nti'an pensar chi rumare' nquixcolotaj, entonces ri xu'on ri Cristo man jun rakalien chivach. 3Y ni'ej chic jun b'ay chica ri achi'a' ri nicajo' chi ni'an ri circuncisión chica: Ri nicajo' chi ni'an ri circuncisión chica, can nic'atzin niqui'an nojiel ri nu'ej ri ru-ley ri Moisés, chi quire' nca'colotaj. 4Y ixre' ri ntivajo' chi ruma ri ley ntiel chi man jun chic i-pecado choch ri Dios; ruma quire' nti'an, xiya' can ri Cristo, y xiya' can je' ri ru-favor ri Dios. 5Pero ojre' can kayo'ien chi ntiel chi man jun chic ka-pecado choch ri Dios, ruma riq'uin ri Cristo cukul kac'u'x y ruma je' c'o ri Espíritu Santo riq'uin kánima. 6Ojre' ri oj richin chic ri Cristo Jesús, xa b'anun chika ri circuncisión o manak, xa man jun rakalien. Ri nic'atzin ja ri kacukub'an kac'u'x riq'uin ri Cristo Jesús, y re' nu'on chika chi c'o amor kiq'uin. 7Na'ay, can otz ix-b'anak. ¿Pero chica xb'ano chiva chi vacame man ntivajo' ta chic ntinimaj ri ketzij? 8Ruma ri Dios xixrayuoj chi xinimaj. Pero ri ni'e'x chiva vacame, k'alaj chi man riq'uin ta ri Dios patanak-ve. 9Ri levadura, xa riq'uin jub'a' nuquiraj-ri' chupan nojiel ri harina. 10Y inre' cukul nuc'u'x riq'uin ri Ajaf Jesucristo, chi ixre' jo'c ri ketzij ri xtinimaj. Y ri nuc'ax rub'ixic ri ruch'ab'al ri Dios chivach, can xtika ri castigo paro'. Y re' chica-na vinak. 11Y inre' hermanos, xa ta nitzijuoj chi ri circuncisión otz, ri nuvanakil israelitas man ta itziel nquinquitz'at, y man ta itziel je' nica'xaj antok nitzijuoj chi ri Cristo xcon choch ri cruz. 12¡Nca'an ta capar ri vinak ri niquic'ax rub'ixic ri ruch'ab'al ri Dios! 13Ruma ixre' hermanos, ja ri Dios ri xayuon ivichin chi xixrucol-pa chuxie' ri ley. Can ix libre chic. Can ix libre chi ntivajo-ivi' y ntitola-ivi'. Pero man ruma ta chi ix libre chic, rumare' ja ri ntirayij ixre' jare' ri nti'an, man quire' ta. 14Ruma chupan ri ru-ley ri Moisés nu'ej: Can inche'l ri navajo-ka-avi' atre', can quire' je' mismo tavajo' ri a-prójimo. Quire' nu'ej ri tz'ib'an can. Y jo'c riq'uin ri na'an ri nu'ej ri jun tzij re', can na'an nojiel ri nu'ej chupan ri ley. 15Pero man tic'ux-ka-ivi' y man titej-ka-ivi' chib'il-ivi', ruma xa quire' nti'an, iyuon ixre' xtiq'uis-ka-ivi'. 16Y ni'ej je' chiva: Tiya' chi ja ri Espíritu Santo nuc'uan ivichin, y man ti'an ri itziel tak kax ri nrajo' ri i-cuerpo. 17Ruma ri itziel tak kax ri nrajo' ri i-cuerpo man nika ta choch ri Espíritu Santo. Y ri nrajo' ri Espíritu Santo man nika ta choch ri i-cuerpo. Can man jun b'ay xtiquic'uaj-qui'. Chi quire' man nti'an ta ri ntivajo' ixre'. 18Pero xa ja ri Espíritu Santo ri nuc'uan ivichin chupan ri ic'aslien, man ixc'o ta chuxie' ri ru-ley ri Moisés. 19Y cha'nin nca'k'alajin ri nrajo' ri cuerpo, ruma xa ruyuon inche'l va: Ri i-c'ulan y ri man i-c'ulan ta niquicanuj-qui' chi niqui'an pecado, can q'uiy itziel kax ri niqui'an y siempre niqui'an ri nurayij ri qui-cuerpo. 20Niquiyala' quik'ij ídolos, niqui'an hechicerías (b'anaquil), itziel niquitz'at-qui', niqui'an ayoval, itziel nca'quitz'at ri nic'aj chic ruma otz ic'o, can cha'nin nipa quiyoval, nicajo' chi jo'c ijeje' c'o ta nojiel kax quiq'uin, niquijachala-qui' ruma ri quino'j, nika chiquivach ri man ketzij ta nca'c'ut, 21itziel nca'quitz'at nic'aj chic ruma c'o kax quichin, nca'quimisan, nca'k'ab'ar, niqui'an itziel tak namak'ej, y nca'qui'an je' nic'aj chic quivach itziel tak kax inche'l re'. Ya nu'e'n chiva jun b'ay y ni'ej chic chiva, chi ri vinak ri nca'b'ano itziel tak kax inche'l va, man xca'uoc ta c'a pa ru-reino ri Dios. 22Pero xa ntiya' chi ja ri Espíritu Santo nuc'uan ivichin chupan ri ic'aslien, can nu'on chiva chi xtivajo-ivi', xtiquicuot ri ivánima, xtic'ujie' ri paz riq'uin ri ivánima, xquixcach'uon, otz ino'j xti'an, can c'o favor xqui'an chica nic'aj chic, can xticukub'a' ic'u'x riq'uin ri Dios, 23manak ayoval xti'an, xtik'il-ivi' chi man chic xti'an ta pecado. Y xa jun c'aslien quire' xtivuc'uaj, ri ley man jun chica xtu'on chiva. 24Y konojiel ri oj richin chic ri Cristo, can inche'l xojb'ajix riq'uin jaja' choch ri cruz, rumare' xa'kaya' can ri itziel tak kax ri xa'karayij. 25Can ja ri Espíritu Santo ya'yuon ri c'ac'ac' kac'aslien. Rumare' can kaya' chi jaja' ri nuc'uan kichin. 26Man takana' chi oj nima'k, chi quire' man nipa ta quiyoval ri nic'aj chic. Y man itziel je' ca'katz'at nic'aj chic ruma otz ic'o.

will be added

X\