Galatas 4

1Y nivajo' je' ni'ej más chiva: Jun ri nich'aco ri herencia, xa c'a ac'ual, c'a maja' tiyo'x ri herencia cha. Y mesque jaja' rajaf nojiel, xa c'a junan riq'uin jun ru-esclavo ri rutata'. 2Ri ac'ual re' ic'o ri nca'chajin richin. Y ic'o ri nca'chajin ri herencia, c'a antok xtalka-na ri k'ij ri ru'e'n ri rutata' chi niyo'x ri herencia cha. 3Y quire' xka'an ojre', inche'l ri ac'ual antok maja' tiyo'x ri herencia cha. Y xojc'ujie' chuxie' ri costumbres richin ri roch-ulief ri man nca'tiquir ta nkojquicol. 4Pero antok xalka ri tiempo ri cho'n ruma ri Dios, ri Dios xutak-pa ri Ruc'ajuol. Y xal'alax-ka riq'uin jun xtan. Y ruma chikacajol ojre' israelitas xalax-ve ri Ruc'ajuol ri Dios, xc'ujie' chuxie' ri ru-ley ri Moisés. 5Y jaja' xpa chi xojrucol ojre' ri ojc'o chuxie' ri ley, chi quire' xojuoc ralc'ual ri Dios. 6Y ruma ix ralc'ual chic ri Dios, ri Dios xutak-pa ri Ru-Espíritu ri Ruc'ajuol riq'uin ivánima. Y ri Espíritu Santo ri c'o riq'uin ivánima, Nata' nicha' cha ri Dios. 7Riq'uin re' nik'alajin chi man ixc'o ta chic chuxie' ri ley, xa ix ralc'ual chic ri Dios. Y ruma ix ralc'ual chic ri Dios, jaja' nuya' ri herencia chiva ruma xinimaj ri Cristo. 8Y ojier can, antok maja' tivatamaj roch ri Dios, ixre' xi'an servir ri dioses ri xa man i-ketzij ta. 9Pero vacame, ivata'n chic roch ri Dios. O más otz ni'ej chi ja ri Dios ri ta'mayuon chic ivach ixre'. ¿Karruma ixre' ntivajo' ntiya' can ri Dios y nquixtzalaj-pa chic chupan ri costumbres ri man jun quikalien? 10Ic'o k'ij, ic', juna' y nic'aj chic namak'ej ri nti'an guardar. 11Inre' nib'isuon vánima chi ri samaj ri xin'an iviq'uin, inche'l xa man jun xc'atzin-ve. 12Rumare' hermanos, nic'utuj favor chiva chi tib'ana' inche'l inre', ruma inre' xin'an je' inche'l nti'an ixre'. Antok xic'ujie' iviq'uin, ixre' otz ino'j xi'an chuva. 13Y ixre' ja'al ivata'n, ri na'ay mul xa ruma xiyavaj, rumare' xic'ujie' iviq'uin y xintzijuoj ri evangelio chiva. 14Y mesque altíra xin'an sufrir ruma ri yab'il, ixre' man itziel ta xinitz'at, ni man xiniya' ta can, xa can ja'al xini'an recibir. Inche'l jun ángel richin ri Dios, o inche'l xa can ja inre' ri Cristo Jesús xi'an chuva antok xini'an recibir. 15Y can ja'al xquicuot ivánima vuma inre'. Y inre' vata'n chi xa ta xc'atzin chi ixre' xivalasaj-el ri inak'avach chi xiya' ta chuva, xi'an ta. ¿Pero karruma man chic nquixquicuot ta vacame inche'l xi'an na'ay? 16¿Nti'an pensar came ixre' chi inre' itziel nquixtz'at ruma xin'ej ri ketzij chiva? 17Y ic'o nic'aj achi'a' chicajol ri q'uiy favor niqui'an chiva, pero quire' niqui'an iviq'uin ruma nicajo' chi nquix'a chiquij y chi nkojiya' can ojre'. 18Xa c'o jun ri nib'ano favor chiva ruma nrajo' chi otz ta nquixc'ujie', can otz, y siempre quire' ta nu'on y man jo'c ta antok inc'o iviq'uin. 19Ixre' ri ix inche'l tak valc'ual nub'anun chiva, can ni'an chic sufrir jun b'ay, can inche'l ri sufrimiento nuna' jun ixok antok nic'ujie' jun ral. Y ri sufrimiento ri nina' vacame ivuma ixre', xtiq'uis-el antok xtiya' ivánima riq'uin ri Cristo. 20Inre' nivajo' chi inc'o ta pa iviq'uin vacame, chi quire' nquich'o' iviq'uin y nic'ax jub'a' ri ni'ej chiva. Pero ruma c'a naj ixc'o-ve, mare' man nivil ta chica ni'an. 21Ixre' ri ntivajo' nquixc'ujie' chuxie' ri ru-ley ri Moisés, ti'ej chuva: ¿Karruma man ib'anun ta entender ri nu'ej ri ley re'? 22Ruma tz'ib'an can chi ri Abraham xa'c'ujie' ica'ye' ruc'ajuol. Jun xalax riq'uin ri ru-esclava, y ri jun chic xalax riq'uin ri raxjayil. 23Ri ruc'ajuol ri Abraham ri xalax riq'uin ri ru-esclava, xalax inche'l nalax chica-na ac'ual. Pero ri jun chic ruc'ajuol ri Abraham ri xalax riq'uin ri raxjayil, xalax ruma ja ri Dios ri b'anayuon prometer cha. 24Re' jun alegoría. Ruma ri ica'ye' ixoki' re', inche'l ri ca'ye' pactos ri xu'on ri Dios. Ri ixok Agar, ri ru-esclava ri Abraham, inche'l ri pacto ri x'an paro' ri juyu' Sinaí. Y quinojiel ri xa'uoc chupan ri pacto re', jare' ri xa'uoc chuxie' ri ru-ley ri Moisés. I-esclavos chupan ri ley. 25Ri ixok Agar, can inche'l ri pacto ri x'an paro' ri juyu' Sinaí, ri c'o chupan ri lugar rub'inan Arabia. Ri Agar man libre ta. Y ri nuvanakil israelitas ri ic'o vacame Jerusalén, can ic'o chuxie' ri ru-ley ri Moisés, ijeje' je' man i-libre ta. Xa can inche'l ri ixok Agar ri esclava. 26Pero ojre' ri oj ral ri jun chic tanamet Jerusalén ri richin chicaj, can oj libre. 27Y ri ruch'ab'al ri Dios ri tz'ib'an can, nu'ej: Atre' ri manak aval alaxnak, man cab'isuon ruma man jun aval. Xa riq'uin nojiel avuchuk'a' casiq'uin ruma altíra ncaquicuot, mesque man jun aval alaxnak. Y mesque atre' at-yo'n can ruma ri avachajil, inre' xtin'an chava chi c'o más iq'uiy aval ri xca'c'ujie', que choch ri ixok ri c'o ri rachajil riq'uin. 28Hermanos, ojre' oj junan riq'uin ri Isaac, ri xu'on prometer ri Dios chi nuya' cha ri Abraham, y ojre' je' oj ralc'ual ri Dios. 29Ri ral ri Agar xalax inche'l nalax chica-na ac'ual. Ri Isaac itziel xtz'iet ruma ral ri ixok Agar ri esclava. Quire' je' nib'anataj vacame. Ojre' ri oj ralc'ual chic ri Dios ruma c'o ri Espíritu Santo kiq'uin, itziel nkojtz'iet. 30Y ri ruch'ab'al ri Dios ri tz'ib'an can, nu'ej chi talasas-el ri esclava, y ri ral je'. Ruma man jun herencia xtiyo'x cha ri ral jaja'. Xa jo'c cha ri ral ri raxjayil ri Abraham xtiyo'x ri herencia. Quire' nu'ej ri tz'ib'an can. 31Hermanos, ojre' ri kaniman chic ri Jesucristo, oj inche'l ri ral ri raxjayil ri Abraham, y man oj ral ta ri esclava.

will be added

X\