Galatas 3

1Hermanos aj-Galacia, ¿karruma can ix-nacanak y rumare' xix'an engañar y vacame man ntinimaj ta chic ri ketzij? Ojre' ka'e'n can ja'al chiva chi ri Jesucristo xcon choch cruz pa ka-cuenta. 2Y nivajo' nic'utuj chiva: ¿Ja came ri nu'ej ri ru-ley ri Moisés ri xinimaj chi xi'an recibir ri Espíritu Santo o xa ruma xicukub'a' ic'u'x riq'uin ri Jesucristo ri xkatzijuoj chiva? 3¿Ixre' can ix-nacanak? Ruma antok xinimaj ri Jesucristo, ja ri Espíritu Santo ri xsamaj riq'uin ivánima. Y vacame man ntivajo' ta chic chi nisamaj ri Espíritu Santo iviq'uin, xa iyuon yan chic ixre' ntivajo' ntitej ik'ij. 4¿Can man jun came rakalien ri sufrimiento ri xik'asaj antok xinimaj ri Jesucristo? Xa ta ketzij chi man jun rakalien. 5Ri Dios ruyo'n ri Espíritu Santo chiva y nu'on milagros chicajol. ¿Karruma nu'on quire'? ¿Ruma came xinimaj ri ru-ley ri Moisés o ruma xicukub'a' ic'u'x riq'uin ri Jesucristo ri xkatzijuoj chiva? 6Inche'l xu'on ri Abraham ojier can, jaja' xunimaj ri x'e'x cha ruma ri Dios, y rumare' ri Dios xu'on cha chi xiel chi man jun chic ru-pecado choch. 7Tivatamaj je' chi quinojiel ri niquicukub'a' quic'u'x riq'uin ri Dios, can ralc'ual ri Abraham. 8Y chupan ri ruch'ab'al ri Dios ri tz'ib'an ojier can, k'alaj chi ri Dios can xtu'on chica ri vinak ri man israelitas ta chi man jun chic qui-pecado choch jaja', xa niquicukub'a' quic'u'x riq'uin. Y ri utzulaj ruch'ab'al ri Dios, ri x'e'x cha ri Abraham, nu'ej: Avuma atre', xca'n'an bendecir quinojiel naciones, xcha' ri Dios cha ri Abraham. 9Y inche'l ri Abraham can x'an bendecir ruma xucukub'a' ruc'u'x riq'uin ri Dios, can quire' je' quinojiel ri niquicukub'a' quic'u'x riq'uin ri Dios, can nca'an je' bendecir. 10Pero xa nicajo' nca'colotaj ruma ri ley y xa man nca'tiquir ta niqui'an nojiel ri nu'ej ri ley, can xtika ri castigo pa quive'. Inche'l nu'ej chupan ri ruch'ab'al ri Dios ri tz'ib'an can: Ri man nu'on ta nojiel ri nu'ej chupan ri ru-ley ri Moisés, xtika ri castigo paro'. Quire' nu'ej chupan ri tz'ib'an can. 11Can k'alaj chi man jun vinak ntiel chi man jun chic ru-pecado choch ri Dios ruma nu'on ri nu'ej ri ley. Ruma chupan ri ruch'ab'al ri Dios ri tz'ib'an can, nu'ej: Ri rucukub'an ruc'u'x riq'uin ri Dios ntiel chi man jun chic ru-pecado choch, y xtic'ujie' ruc'aslien riq'uin ri Dios. Quire' nu'ej ri tz'ib'an can. 12Ri niniman ri ley man inche'l ta ri cukb'al c'u'x riq'uin ri Dios. Ruma ri ley nu'ej: Ri nib'ano nojiel ri nu'ej ri ley, can xtiril ruc'aslien riq'uin ri Dios. Quire' nu'ej ri ley. 13Y can ketzij chi jun ri man nitiquir ta nu'on nojiel ri nu'ej ri ley, can xtika ri castigo paro'. Pero ri Cristo xojrucol choch ri castigo re' antok xcon choch ri cruz, ruma paro' jaja' xka-ve ri castigo ri xka ta pa kave' ojre'. Can k'alaj chi xka ri castigo paro', ruma ri ruch'ab'al ri Dios ri tz'ib'an can, nu'ej: Chica-na ri nitzakab'as choch jun chie', k'alaj chi kajnak ri castigo paro'. Quire' nu'ej chupan ri tz'ib'an can. 14Pero ri Cristo Jesús xcon pa ka-cuenta konojiel ojre', chi quire' ri vinak ri man israelitas ta niquil je' ri bendición ri xu'ej ri Dios ojier can cha ri Abraham. Y ri Jesucristo xcon je' chi quire' konojiel ri nakacukub'a' kac'u'x riq'uin, xtic'ujie' ri Espíritu Santo kiq'uin; ruma quire' je' ru'e'n ri Dios. 15Tivaxaj-na-pe' hermanos: Antok c'o jun pacto ni'an chikacajol-ka ojre', antok c'achojnak chic ri pacto, man jun nitiquir nituru ri pacto re'. Ni man jun je' nitiquir nuya' jub'a' más ruve'. 16Antok ri Dios xu'on ri pacto riq'uin ri Abraham ojier can, xu'ej chi nuya' ri bendición cha jaja' y cha ri rumáma ri xtic'ujie'. Ri Dios man xch'o' ta chiquij ri iq'uiy rumáma ri Abraham ri xca'c'ujie'. Man quire' ta. Jo'c chirij jun rumáma xch'o-ve. Y ri jun re', ja ri Cristo. 17Ri tzij ri xa'n'ej, cava rub'ixic: Na'ay ri Dios xu'on jun pacto riq'uin ri Abraham. Y antok k'axnak chic cuatrocientos treinta juna' chi ti'an ri pacto riq'uin ri Abraham, ri Dios xuya' ri ley cha ri Moisés. Pero ruma ri Dios can rub'anun chic ri pacto riq'uin ri Abraham na'ay, ri ley man xutur ta ri pacto ri rub'anun na'ay, ni man xtiquir ta xu'on cha ri Dios chi man ta xuya' ri ranun prometer cha ri Abraham chi nuya'. Y ri ranun prometer chi nuya', ja ri Cristo. 18Xa ta ruma ri ru-ley ri Moisés niyo'x ri herencia, man jun ta rakalien ri xu'ej ri Dios cha ri Abraham chi nuya'. Pero xa man quire' ta. Ruma ri Abraham xril ri herencia riq'uin ri xu'ej ri Dios cha. 19¿Y chica nic'atzin-ve ri ru-ley ri Moisés? Ri Dios xuya' ri ley re' chi ca'k'alajin-pa ri pecado y chi ticusas antok c'a maja' talka ri Cristo, rumáma ri Abraham; ruma ja ri Cristo ri bendición ri ranun prometer ri Dios chi nuya'. Y antok ri Dios xuya' ri ley, na'ay xuya' chica ángeles, y ri ángeles re' xquiya' cha ri Moisés. Y pa ruq'uisb'al ri Moisés xuya' chica ri vinak. 20Pero antok ri Dios xu'ej cha ri Abraham chi nuya' ri bendición, jaja' mismo x'e'n y man xc'atzin ta chi c'o ta jun xucusaj chi xk'asan ri ruch'ab'al. 21¿Y xutur came ri ley ri ranun prometer ri Dios chi nuya'? Man quire' ta. Pero xa ta ri ley xtiquir ta xuya' c'aslien, ja ta ri ley re' nib'ano chika chi man jun chic ka-pecado choch ri Dios. 22Pero ri ruch'ab'al ri Dios ri tz'ib'an can, nu'ej chi konojiel ojre' oj pecadores; quire' nu'ej, chi quinojiel ri quiniman ri Jesucristo, niyo'x chica ri ranun prometer ri Dios. Y re' niquil ruma quicukub'an quic'u'x riq'uin ri Jesucristo. 23Antok c'a maja' tipa ri Jesucristo, can inche'l pa cárcel xojc'ujie-ve; ruma pa ruk'a' ri ru-ley ri Moisés xojc'ujie-ve. Y chire' xojc'ujie-ve, kayo'ien chi nib'ak'alajin-pa ri c'o chi nakanimaj. 24Ri ru-ley ri Moisés can xojru'on cuenta, y xojruc'uaj riq'uin ri Cristo chi xkacukub'a' kac'u'x riq'uin; chi quire' xiel chi man jun chic ka-pecado choch ri Dios. 25Pero vacame ri ley richin ri Moisés man chic nic'atzin ta chi nkuru'on cuenta. Ruma vacame ya xpa ri Jesucristo, y riq'uin jaja' nakacukub'a' kac'u'x. 26Y ixvonojiel ixre' ri icukub'an ic'u'x riq'uin ri Jesucristo, ix ralc'ual chic ri Dios. 27Ixvonojiel ri xix'an bautizar pa rub'e' ri Cristo, jo'c jun xi'an riq'uin jaja'. Can nik'alajin c'a chi ri Cristo c'o pan ic'aslien, xu'on chiva chi inche'l xuc'ax ri itziak. 28Can ixvonojiel ri iniman ri Cristo Jesús junan chic ivach; chi israelitas o man israelitas ta; esclavos o libres; ache o ixok. Junan c'a ivach ixvonojiel, ruma jo'c jun chic ib'anun riq'uin ri Cristo Jesús. 29Y ruma ix richin chic ri Cristo, xixuoc rumáma ri Abraham. Y niyo'x chiva ri bendición ri xu'on prometer cha ri Abraham chi nuya'.

will be added

X\