Galatas 2

1Y antok k'axnak chic c'a catorce juna', inre' xi'a chic jun b'ay pa tanamet Jerusalén; junan xoj'a riq'uin ri hermano Bernabé. Y xkuc'uaj-el je' ri hermano Tito. 2Y inre' xi'a, ruma ja ri Dios ri x'e'n chuva. Y jo'c inre' y ri hermanos líderes ri xkamol-ki', y xin'ej c'a chiquivach chica modo nitzijuoj ri evangelio chica ri vinak ri man israelitas ta, chi quire' ijeje' nca'e'n xa otz o man otz ta ri nusamaj. 3Pero ijeje' ni xa ta xqui'ej chi ti'an ri circuncisión cha ri hermano Tito ri b'anak viq'uin; mesque jaja' man b'anun ta ri circuncisión cha, ruma jaja' xa man israelita ta. 4Ri Tito man x'an ta ri circuncisión cha, mesque ic'o jujun chikacajol ri man i-ketzij ta hermanos, ri xcajo' chi x'an ta cha. Ijeje' quiju'n-pa-qui' jo'c chi niquitz'at ri chica rub'anun ri kac'aslien riq'uin ri Cristo Jesús; xa c'a naka'an nojiel ri nu'ej chupan ri ru-ley ri Moisés, o manak chic naka'an. Ijeje' xcajo' ta chi xojc'ujie' ta chic chuxie' ri ru-ley ri Moisés. 5Pero ojre' man xkanimaj ta quitzij; chi quire' ja ri ketzij evangelio nic'ujie' iviq'uin ixre'. 6Y ri hermanos líderes ri c'o je' quino'j, man jun kax c'ac'ac' xquic'ut chinoch chirij ri ruch'ab'al ri Dios. Y inre' man xintz'at ta xa rakalien o man rakalien ta. Ruma choch ri Dios xa oj junan konojiel. 7Pa ruc'axiel c'a chi ri hermanos xinquitijuoj ta pa más riq'uin ri ruch'ab'al ri Dios, xa xquina'iej chi chuva inre' ru'e'n ri Dios chi nitzijuoj ri evangelio chica ri vinak ri man israelitas ta, ri man b'anun ta ri circuncisión chica. Can inche'l antok x'e'x cha ri Pedro chi tutzijuoj ri evangelio chica ri kavanakil israelitas ri b'anun ri circuncisión chica. 8Y can ja ri Dios ri nito'n richin ri Pedro chupan ri samaj richin jun apóstol chiquicajol ri kavanakil israelitas ri b'anun ri circuncisión chica; quire' je' inre' ja ri Dios nito'n vichin, chi nquisamaj chiquicajol ri vinak ri man israelitas ta. 9Rumare' ri Jacobo, ri Pedro y ri Juan, ri principales chiquicajol ri hermanos, xquiya' quik'a' chuva inre' y cha ri Bernabé je', antok xquina'iej chi ri samaj re' ja ri Dios sipayuon-pa chuva ruma altíra nquirajo'; xquiya' quik'a' chika chi quire' k'alaj chi xa jun kab'anun chupan ri samaj. Chi ojre' nkojb'asamaj chiquicajol ri vinak ri man israelitas ta, y ijeje' nca'b'asamaj chiquicajol ri kavanakil israelitas ri b'anun ri circuncisión chica. 10Jo'c xqui'ej chika chi ca'nataj chika chi nca'kato' ri i-puobra, y jare' ri nitej nuk'ij ni'an. 11Y antok ri Pedro xalka pa tanamet Antioquía, xinch'olij, ruma man otz ta ri nu'on chire'. 12Ruma na'ay, xva' quiq'uin ri hermanos ri man israelitas ta. Pero antok xa'lka nic'aj achi'a' ri i-takuon-pa ruma ri Jacobo, jaja' man xrajo' ta chic xva' quiq'uin ri hermanos ri man israelitas ta, ruma xuxi'ij-ri' chiquivach ri achi'a' ri xa'lka, ri b'anun ri circuncisión chica. 13Y ri hermanos israelitas ri ic'o Antioquía, junan xqui'an riq'uin ri Pedro. Man xa'b'aka ta chic quiq'uin ri hermanos ri man israelitas ta. Can xk'alajin chi ca'ye' quipalaj, ruma na'ay can i-b'anak quiq'uin. Y hasta ri Bernabé xu'on inche'l xqui'an ijeje'. 14Y antok xintz'at chi man niqui'an ta ri ketzij ri nu'ej chupan ri evangelio, chiquivach quinojiel xin'ej cha ri Pedro: Atre' can at israelita, pero xa inche'l niqui'an ri vinak ri man israelitas ta na'an. Y xa quire' na'an atre', ¿karruma na'an chica ri man israelitas ta chi niqui'an ri qui-costumbre ri israelitas? xicha' cha. 15Ojre' ri oj israelitas pa kalaxic, naka'ej chi man oj pecadores ta inche'l ri vinak ri man israelitas ta. 16Pero kata'n chi man ruma ta ri vinak quib'anun nojiel ri nu'ej ri ru-ley ri Dios ntiel chi man jun chic qui-pecado choch ri Dios. Xa nic'atzin chi tiquicukub'a' quic'u'x riq'uin ri Jesucristo chi quire' ntiel chi man jun chic qui-pecado choch. Rumare' man jo'c ta ri man israelitas ta quicukub'an quic'u'x riq'uin ri Jesucristo, xa quire' je' ojre' ri israelitas kaniman, chi quire' ntiel chi man jun chic ka-pecado choch ri Dios. Man ja ta c'a chi naka'an ri nu'ej chupan ri ley ri nib'ano chika chi ntiel chi man jun chic ka-pecado choch ri Dios. 17Xkanimaj ri Cristo ruma xkajo' chi ntiel chi man jun chic ka-pecado choch ri Dios. Y xa c'a naka'an ri pecado, ¿ja came ri Cristo xb'ano-ka pecadores chika? Man quire' ta. 18Y xa niya' chic pa ruk'ij ri ru-ley ri Moisés, ri ya xinya' can, can nik'alajin chi pecado ri xin'an antok xinya' can. 19Ruma inre' can inche'l xicon choch ri ley, rumare' ri ley man chic nic'atzin ta chi ni'an. Vacame inc'as chi ni'an ri nrajo' ri Dios. 20Y antok ri Cristo xquimisas choch cruz, inre' inche'l xa xicon riq'uin. Y rumare' ri nuc'aslien ri c'o vacame, man vichin ta inre', xa can richin ri Cristo ri c'o riq'uin vánima. Y nojiel ri ni'an-el choch-ulief, xtin'an ruma nucukub'an nuc'u'x riq'uin ri Cristo ri Ruc'ajuol ri Dios, ri xirajo' y xuya' rutzij chi xquimisas pa nu-cuenta. 21Inre' manak xtin'ej chi ri ru-favor ri Dios man jun rakalien. Ruma xa ta riq'uin ri ley ntiel chi man jun chic ka-pecado choch ri Dios, ri Cristo man jun ta xc'atzin chi xcon.

will be added

X\