Efesios 6

1Y ixre' ac'ola' ri iniman chic ri ruch'ab'al ri Ajaf, quixniman chica ri itie-itata', ruma quire' otz chi nti'an. 2Inche'l nu'ej chupan ri ruch'ab'al ri Dios ri tz'ib'an can: Ca'b'ana' respetar ri atie-atata'. Jare' ri na'ay mandamiento chupan ri ley ri b'anun prometer chi c'o xtiyo'x chica ri nca'b'ano quire', 3chi quire' otz ncac'ujie' y q'uiy juna' xcac'asie' choch-ulief. Quire' ri tz'ib'an can. 4Y ixre' tata'j, man tak'ax ruve' ri castigo ri ntiya' chica ri ivalc'ual, ruma xa xtipa quiyoval chiva. Xa qui'iq'uiytisaj c'a riq'uin ri nu'ej ri ruch'ab'al ri Ajaf, y antok nic'atzin, qui'b'ana' castigar. 5Y ixre' esclavos, quixniman chica ri ivajaf. Riq'uin nojiel ivánima tib'ana' ri samaj ri niqui'ej chiva y tixi'ij-ivi' chiquivach; inche'l xa ja ri rusamaj ri Cristo nti'an. 6Man ti'an chi jo'c nquixsamaj antok ic'o-apa ri ivajaf iviq'uin, richin ntivajo' nquixtz'iet chi ix otz chi esclavos. Ixre' ix ru-siervos ri Cristo, y rumare' nic'atzin chi riq'uin nojiel ivánima tib'ana' rusamaj ri ivajaf, ruma jare' ri nrajo' ri Dios. 7Can riq'uin nojiel ivánima tib'ana' rusamaj ri ivajaf. Inche'l xa rusamaj ri Ajaf Jesucristo ri nti'an y xa man richin ta ri ivajaf. 8Ixre' ivata'n chi ri Ajaf xtuya' ruc'axiel chiva chi'ijunal ruma ja ri otz ri nti'an, xa ix esclavo o xa ix libre. 9Y quire' je' ixre' ajaf, otz tib'ana' quiq'uin ri iv-esclavos y man jun kax itziel ti'ej o ti'an chica chi nqui'xi'ij. Man timastaj chi c'o jun Ivajaf chicaj, y jaja' can Cajaf je' ijeje'. Y jaja' junan nu'on chica quinojiel. 10Y pa ruq'uisb'al nivajo' ni'ej-el chiva hermanos, chi tic'ujie' más ivuchuk'a' riq'uin ri Ajaf, ruma riq'uin jaja' nem ri poder c'o. 11Can tib'ana' inche'l nu'on ri soldado. Jaja' c'o ri chica nca'rucusaj chi nu'on defender-ri' choch ri enemigo. Y ixre' chi nti'an defender-ivi', ticusaj nojiel ri ruyo'n ri Dios chiva. Y quire' tib'ana' chi quire' man nquixtzak ta pa ruk'a' ri diablo, ruma jaja' ja'al rata'n nu'on maña. 12Ruma ojre' man quiq'uin ta vinak naka'an-ve ayoval, xa quiq'uin qui-jefes ri itzal tak espíritus, xa quiq'uin ri itzal tak espíritus ri c'o poder pa quik'a', xa quiq'uin ri espíritus ri i-c'uayuon quichin ri vinak ri man quiniman ta ri Dios y k'aku'n rub'anun quic'aslien, y xa quiq'uin ri itzal tak espíritus ri ic'o chupan ri cak'iek'. 13Rumare' ni'ej chiva chi ticusaj nojiel ri ruyo'n ri Dios chiva chi nti'an defender-ivi'; chi quire' can nquixtiquir nticoch' antok nipa ri itziel kax chivij. Y antok ik'asan chic ri q'uiy sufrimientos, xa cof quixpi'ie'. 14Rumare' cof c'a quixpi'ie', tixima' ja'al ri ipan riq'uin ri ketzij. Tib'ana' inche'l nu'on ri soldado, jaja' nuxim otz rupan cha jun ch'ich' inche'l cincho antok ni'a pa guerra. Ri soldado nuya' je' jun ch'ich' choch ruc'u'x, chi nu'on defender-ri' choch ri enemigo. Y ixre' chi nti'an defender-ivi' choch ri diablo, ja ri choj c'aslien ticusaj. 15Ri soldado can otz je' ruxajab' nucusaj chi nuto' ri rakan antok ni'a pa guerra. Y ixre' ja ri evangelio ri nuya' paz ticusaj chi nti'an defender-ivi'. 16Y ri soldado je' nucusaj jun escudo ri b'anun cha ch'ich' ri choj cha nu'on-ve defender-ri' chiquivach ri flechas ri quic'uan k'ak'. Y ixre' siempre ticukub'a' ic'u'x riq'uin ri Dios, chi quire' ri itziel man jun chica xtitiquir xtu'on chiva. 17Ri soldado nuya' je' jun casco pa rujaluon chi nu'on defender ri rujaluon choch ri enemigo. Y ixre' chi manak kax nu'on ri diablo chiva, tinimaj chi ya xixcolotaj. Ri soldado nuc'uaj ru-espada chi niyovar riq'uin ri enemigo. Y ixre' chi quire' nti'an cha ri diablo, ticusaj ri nuya' chiva ri Espíritu Santo, y re' ja ri ruch'ab'al ri Dios. 18Y siempre tib'ana' orar. Y antok ixre' nti'an orar, tiya' lugar cha ri Espíritu Santo chi nuya' riq'uin ivánima ri chica nic'atzin nti'ej chupan ri oración y ri chica ntic'utuj cha ri Dios. Man timalij ri oración, xa can titija' ik'ij chi siempre nti'an orar. Y riq'uin nojiel ivánima tic'utuj cha ri Dios pa qui-cuenta quinojiel ri santos hermanos. 19Y tib'ana' je' orar pa nu-cuenta inre'; chi ri Dios xtuya' ch'ab'al pa nuchi' chi antok xtintzijuoj ri evangelio ri c'o pan aval riq'uin ri Dios ojier can tiempo, man nixi'ij ta vi'. 20Ri Dios xirucha' y xirutak chi nitzijuoj ri evangelio. Jare' ri nusamaj, mesque vacame in-tz'amuon cha cadena (yariena) pa cárcel. Tic'utuj cha ri Dios chi quire' man nixi'ij ta vi' nitzijuoj ri ruch'ab'al; y chi otz ri ni'ej. 21Y chi ntivatamaj je' ixre' ri chica nub'anun, nitak-el iviq'uin ri hermano Tíquico. Jaja' jun hermano ri altíra nivajo' y siempre nu'on rusamaj ri Ajaf. Jaja' xti'ru'ej nojiel chiva. 22Rumare' nitak-el iviq'uin chi ntina'iej ri chica kab'anun ojre' vave' y chi nquixru'on consolar. 23Ja ri paz ri nipa riq'uin ri Katata' Dios y ri Ajaf Jesucristo tic'ujie' riq'uin ivánima chi'ixvonojiel ixre' hermanos; xti'an ta chiva ruma ri Dios y ri Jesucristo chi tic'ujie' c'a siempre ri cukb'al c'u'x iviq'uin, chi quire' más xtivajo-ivi'. 24Ja ta ri ru-favor ri Dios tic'ujie' iviq'uin chi'ixvonojiel ixre' ri ketzij ntivajo' ri Kajaf Jesucristo. Amén.

will be added

X\