Efesios 4

1Inre' inc'o pa cárcel ruma rub'e' ri Ajaf. Y ni'ej chiva chi ruma ja ri Dios ri xayuon ivichin chi xixuoc ralc'ual, rumare' nic'atzin ntivuc'uaj jun c'aslien otz choch jaja'. 2Co'l-oc tib'ana', otz ino'j tib'ana', y riq'uin paciencia ticach'o-ivi' y tivajo-ivi'. 3Titija' ik'ij chi siempre junan ta ivach y man jun ta ayoval chicajol, ruma ja ri Espíritu Santo nib'ano chiva chi junan ivach. 4Jo'c jun kab'anun konojiel ri kaniman ri Cristo, y jo'c jun ri Espíritu Santo ri c'o riq'uin kánima. Can konojiel junan ri kayo'ien, ruma ja ri Dios ri xayuon kichin. 5Jo'c jun ri Kajaf, y jo'c jun ri cukul kac'u'x riq'uin y jo'c jun je' ri bautismo ri b'anun chika konojiel. 6Jo'c jun Dios c'o, y jaja' ri Katata' konojiel ojre' y c'o pa kave' konojiel, y nisamaj pa tak kac'aslien konojiel y c'o je' pa kánima konojiel. 7Pero man junan ta ri samaj ri rusipan chika chikajunal ruma ri ru-favor ri Cristo, y ja ri Cristo ri ni'e'n ri chica nuya-pa chika. 8Rumare' chupan ri ruch'ab'al ri Dios nu'ej chirij ri Cristo: Antok xtzalaj-el chicaj, ch'aconak chic c'a el chirij ri diablo y xa'ralasaj-el ri ic'o pa ruk'a'. Y c'o xu'on chica nic'aj chi niqui'an diferente roch samaj. Quire' nu'ej ri ruch'ab'al ri Dios. 9Y ruma nu'ej chi x'a chicaj, k'alaj je' chi xpa choch-ulief. 10Xpa c'a choch-ulief y xtzalaj chic el chicaj, chi quire' nic'ujie' pa quive' quinojiel ri ic'o chicaj y ri ic'o choch-ulief. 11Y jaja' xyo'n ri samaj chica ri quiniman jaja'; xu'on chica nic'aj chi xa'uoc apóstoles, ic'o chi xa'uoc profetas, ic'o chi xa'uoc evangelistas y ic'o chi xa'uoc pastores y maestros. 12Quire' xu'on, ruma nrajo' chi ja'al nu'on quic'aslien ri santos hermanos, chi quire' niqui'an rusamaj ri Dios, chi quire' niq'uiy más quic'aslien ri iru-cuerpo chic ri Cristo. 13Y quire' ta xtib'anataj; chi jo'c jun ta xtaka'an konojiel ruma ri cukb'al c'u'x y ruma kata'n chic roch ri Ruc'ajuol ri Dios, chi quire' nu'on jun c'aslien otz y chi niq'uiy más y más ri kac'aslien hasta c'a ni'rub'ana' inche'l ruc'aslien ri Cristo. 14Y antok quire' chic rub'anun kac'aslien, man xtaka'an ta chic inche'l niqui'an ri ac'ola' ri nca'a cala y nca'a cala y cha'nin nca'an engañar. Ojre' man xtaka'an ta chic quire', chi nakaya' lugar chi nkojuc'uax cuma tzij ri man i-ketzij ta ri nca'c'ut, y nkojka pa quik'a' ri vinak ri ja'al cata'n niqui'an engaño. 15Can nic'atzin chi koj'in chupan ri ketzij y riq'uin amor, chi quire' niq'uiy kac'aslien choch ri Dios y nikila' jun c'aslien ja'al, inche'l ruc'aslien ri Cristo. Jaja' ri jolomaj ri c'o pa kave' konojiel ojre' ri kaniman chic. 16Jaja' c'o kiq'uin, rumare' c'o kachuk'a'. Can inche'l nu'on ru-cuerpo jun vinak, antok nojiel otz c'o, can c'o ruchuk'a'. Quire' je' ojre' ri jo'c jun kab'anun riq'uin ri Cristo, antok jo'c jun kab'anun konojiel y naka'an ri samaj ri yo'n chika chikajunal, chi quire' nakatola-ki', can niq'uiy ri kac'aslien choch ri Dios y c'o amor kiq'uin. 17Pa rub'e' ri Ajaf ni'ej chiva chi man chic ti'an inche'l niqui'an ri nic'aj chic vinak ri man israelitas ta; ruma ijeje' jo'c itziel tak kax c'o pa quijaluon y jare' nca'qui'an; y re' man jun otz nuc'am-pa chica. 18Ijeje' pa k'aku'n c'o-ve ri quino'j. Can k'alaj chi man cata'n ta roch ri Dios ruma cof rub'anun ri cánima. Rumare' ri c'aslien ri nipa riq'uin ri Dios manak quiq'uin. 19Man chic niquina' ta chi c'o qui-pecados; rumare' riq'uin nojiel cánima niqui'an itziel tak kax ri can nuya' q'uix. Can nic'at ri cánima ruma nicajo' niqui'an nojiel itziel kax. 20Pero ixre' ivata'n chi ri Cristo man quire' ta xuc'ut can, 21vi xa ketzij chi xivaxaj ri ruch'ab'al jaja' y vi xa ketzij chi xixtijox riq'uin ri ketzij ri c'o riq'uin. 22Rumare', tiya' can ri itziel c'aslien ri xivuc'uaj na'ay, antok c'a maja' tic'axtaj ri ic'aslien y c'a ix-b'anun engañar cuma ri itziel tak kax ri xirayij. 23Can nic'atzin chi nic'axtaj nojiel ri nti'an pensar. 24Tivuc'uaj ri c'ac'ac' c'aslien ri ruyo'n ri Dios chiva, ri inche'l ruc'aslien jaja'; jun c'aslien ri ketzij chi choj y sak. 25Rumare' tiya' can ri tz'akoj tak tzij, y jo'c ri ketzij ti'ej antok nquixch'o'. Ruma konojiel jo'c jun kab'anun riq'uin ri Cristo. 26Antok nipa ivoyoval, man ti'an pecar-ivi'. Y man tiya' lugar chi c'a c'o ri ivoyoval antok nika-ka ri k'ij. 27Ni man tiya' lugar chi nquixtzak pa ruk'a' ri diablo. 28Xa c'o jun chivach ri xa'ru'on alak' antok maja' tunimaj ri Ajaf, man talak' chic. Vacame tucusaj ri ruk'a' chi nu'on jun samaj otz, chi quire' nitiquir je' nca'ruto' ri manak-oc c'o quiq'uin. 29Man ti'ej itziel tak tzij. Jo'c ri otz ti'ej, chi quire' ri tzij re' nu'on chica ri nca'c'axan ivichin chi nca'q'uiy chupan ri quic'aslien, y chi c'o bendición nuc'am-pa chica. 30Man tiya' b'is cha ri Espíritu Santo richin ri Dios. Jaja' c'o riq'uin ivánima, y jaja' ri sello chi xquixcolotaj choch ri pecado xa jun tiempo chupan ri k'ij antok ri Jesucristo xtipa chi nquixalruma-ka. 31Man itziel tina' cha jun chic. Man tic'ujie-ka ri ayoval riq'uin ivánima, ni man qui'an ri man otz ta ruma c'o ivoyoval. Man quixsiq'uin nquixch'o' ruma ivoyoval. Man jun itziel tzij ti'ej chica nic'aj chic y man chic ti'an ri itziel tak kax. 32Can jo'c ri otz tib'ana' chib'il-ivi', tijoyovaj quivach ri nic'aj chic y tib'ana' perdonar-ivi'. Tib'ana' inche'l xu'on ri Dios, jaja' xu'on perdonar ri ka-pecados ruma ri Cristo.

will be added

X\