Efesios 3

1Inre' Pablo, inc'o pa cárcel ruma xintzijuoj ri ruch'ab'al ri Cristo Jesús chiva ixre' ri man ix israelitas ta. 2Y inre' ni'ej chi ixre' ivaxan chi ri Dios ruyo'n ri samaj re' chuva, chi nitzijuoj chiva ri favor ri ruyo'n chiva ixre'. 3Ojier can, man e'n ta ri ranun-pa pensar ri Dios pan ive'. Pero vacame ri Dios xu'ej chuva inre', inche'l ri xintz'ib'aj b'a' chiva. 4Y antok ixre' xtitz'at ri nu'ej va carta va, xtivatamaj ri xu'ej ri Dios chuva chirij ri Cristo. 5Re' man x'e'x ta chica ri vinak ojier can tiempo. Xa c'aja' vacame x'e'x ruma ri Espíritu Santo chiquivach ri santos apóstoles y profetas, 6chi ruma ri evangelio ixre' ri man ix israelitas ta, c'o je' ri herencia ri xtiyo'x chiva junan kiq'uin ojre' ri oj israelitas. Jo'c jun kab'anun, ruma ri ranun prometer ri Dios chi nuya' ruma ri Cristo Jesús. 7Y ruma ri ru-favor ri Dios, nquirucusaj chi nitzijuoj ri ru-evangelio jaja'. Ri Dios can riq'uin c'a ru-poder xsamaj riq'uin vánima antok xiruya' chupan ri samaj. 8Inre' ri más in co'l-oc chiquivach quinojiel ri santos hermanos. Y mesque quire', ri Dios xuya' ri ru-favor chuva chi nitzijuoj ri evangelio chiva ixre' ri man ix israelitas ta. Y ri evangelio re' can inche'l jun nem b'ayomal ri nuya' ri Cristo, ri man nkojtiquir ta nakajilaj. 9Y ri Dios xuya' je' ri ru-favor chi nitzijuoj chiquivach quinojiel ri ranun-pa pensar ojier can chi nu'on. Antok c'a maja' tu'on ri roch-ulief y nojiel ri ic'o, can ya ranun pensar ri chica nu'on. Jaja' can ojier can tiempo man ru'e'n ta pa, xa c'aja' vacame xu'ej. 10Quire' xu'on ri Dios, ruma nrajo' c'a chi ri c'o nem tak poder pa quik'a' ri ic'o chicaj, niquitz'at ri favor ri nu'on chika ojre' ri kaniman chic jaja' ri ni'e'x iglesia chika. Y quire' ticatamaj c'a chi ri Dios altíra q'uiy no'j ri c'o riq'uin. 11Ri Dios can ranun-pa pensar chi quire' nib'anataj, chi nina'ax ri favor ri xuc'am-pa ri Kajaf Jesucristo. 12Y ojre' ruma kaniman chic ri Cristo, man nakaxi'ij ta ki' chi nkujiel-apa riq'uin ri Dios. Can c'o ka-confianza nkujiel-apa riq'uin ruma cukul kac'u'x riq'uin. 13Rumare' nic'utuj favor chiva, chi man timalij ic'u'x y man quixb'isuon ruma ni'an sufrir ivuma. Xa quixquicuot; ruma antok inre' ni'an sufrir ivuma, can nik'alajin chi ixre' c'o ik'ij. 14Rumare' inre' nquixuquie' choch ri Dios ri Rutata' ri Kajaf Jesucristo. 15Y konojiel ri kaniman, ri ic'o chic chicaj y ri c'a ojc'o vave' choch-ulief, can nuya' kab'e' jaja' ruma oj ralc'ual. 16Ri Dios c'o namalaj ruk'ij ri inche'l jun nem b'ayomal. Rumare' nic'utuj favor cha pan i-cuenta chi ri Ru-Espíritu tuya' más poder riq'uin ivánima. 17Nic'utuj je' cha ri Dios chi nu'on ta chiva chi ticukub'a' ic'u'x riq'uin, chi quire' ri Cristo tic'ujie' siempre riq'uin ivánima, y siempre tic'ujie' ri amor riq'uin ivánima, 18chi quire' xti'ka pan ive' (xti'an entender) junan quiq'uin quinojiel ri santos hermanos ri ru-amor ri Cristo; chi nem roch, chi nem rakan, chi nem rupalien y chi naj kajnak, 19y chi xtivatamaj más ri ru-amor ri Cristo, jun amor ri altíra nem choch ri naka'an pensar ojre'. Jare' nic'utuj cha ri Dios pan i-cuenta ruma nivajo' chi ninuoj ivánima riq'uin jaja'. 20Kaya' ruk'ij ri Dios, jaja' c'o nojiel poder riq'uin y nisamaj riq'uin kánima. Ojre' q'uiy favor ri nakac'utuj cha, pero jaja' man jo'c ta re' ri nitiquir nu'on, xa c'o más ri nitiquir nu'on. Man nkojtiquir ta naka'an pensar nojiel ri nitiquir nu'on jaja'. 21Y kuma ojre' ri kaniman ri Cristo Jesús ri oj ru-iglesia, ri Dios tiyo'x ruk'ij richin nojiel tiempo. Amén.

will be added

X\