Efesios 2

1Ri Dios xuya' ic'aslien antok c'a ix-quiminak chupan ri i-pecados y chupan ri itziel tak kax ri xa'i'an. 2Itziel ri ic'aslien ivuc'uan ri ranun-pa. Junan xi'an quiq'uin ri nic'aj chic vinak, ruma xix'a chirij ri itziel tak kax ri ic'o choch-ulief. Xix'a riq'uin ri Satanás ri cajaf ri itzal tak espíritus ri ic'o chupan ri cak'iek'. Y jaja' ri nisamaj riq'uin cánima ri vinak ri man nca'niman ta cha ri Dios. 3Ruma rub'anun-pa, konojiel ojre' quire' je' xka'an; xojuc'uax ruma ri itziel tak kax ri xa'karayij. Ri itziel tak kax ri xa'ka'an pensar y xa'karayij, jare' ri xa'ka'an. Can xkayac rayoval ri Dios pa kave', ruma ojre' xa-jan antok xojalax man jun otz ri kac'amun-pa pa kac'aslien; can inche'l ri nic'aj chic vinak. 4Pero ri Dios altíra xojrajo' y xujoyovaj kavach. 5Xojrajo' mesque oj-quiminak chupan ri ka-pecados, y xuya' kac'aslien inche'l ruc'aslien ri Cristo ruma jun kab'anun riq'uin. Xojcolotaj-pa chupan ri ka-pecados ruma ri ru-favor ri Dios. 6Y ruma ri Dios xuc'asuoj ri Cristo chiquicajol ri quiminaki', quire' je' xu'on chika ojre', xojruc'asuoj. Y xu'on chika chi xojtz'uye' chila chicaj riq'uin ri Cristo Jesús. 7Quire' xu'on ruma nrajo' chi chupan ri tiempo chakavach-apa, can ta nitz'atataj ri namalaj ru-favor, jun favor ri inche'l jun nem b'ayomal. Can altíra otz ri nu'on kiq'uin ojre' ri jo'c jun chic kab'anun riq'uin ri Cristo Jesús. 8Can ruma ri ru-favor ri Dios xixcolotaj antok xicukub'a' ic'u'x riq'uin. Ruma iyuon ixre' man nquixcovin ta nticol-ivi', re' xa nisipas ruma ri Dios. 9Man ruma ta obras xticolotaj jun, chi quire' man jun xti'e'n chi jaja' xtiquir xucol-ri' ruyuon. 10Ruma ja ri Dios xb'ano chika chi xkuc'uaj jun c'aslien c'ac'ac' antok xkanimaj ri Jesucristo; y chi naka'an utzulaj tak obras; ruma jare' ri ranun-pa pensar ri Dios pa kave' chi naka'an. 11Rumare' ixre' ri man ix israelitas ta, talka pan ive' chi antes, ja ri itziel tak kax ri xirayij ri xuc'uan ivichin, rumare' x'e'x chiva cuma ri nuvanakil israelitas, chi ixre' man ix inche'l ta ijeje' ri b'anun ri circuncisión chica. Y ri circuncisión xa cha ri qui-cuerpo b'anun-ve y xa vinak ri b'anayuon chica. 12Ruma chupan ri tiempo re' maja' c'o ri Cristo iviq'uin. C'a naj ixc'o-ve chi nquixuoc rutanamit ri Dios. Can man ivichin ta ixre' ri ranun prometer ri Dios chupan ri ru-pacto chi nuya'. Man jun esperanza ivichin vave' ri choch-ulief, ni manak je' ri Dios iviq'uin. 13Ri rub'anun-pa, naj ixc'o-ve choch ri Dios. Pero vacame iniman chic ri Cristo Jesús, rumare' cierca chic ixc'o-ve-pa riq'uin ri Dios. Cierca chic ixc'o-ve-pa riq'uin, ruma ri Cristo kuma konojiel ojre' xcon y x'in ruquiq'uiel. 14Ri Cristo xuya' paz chikacajol iviq'uin ixre' ri man ix israelitas ta y xa jun tanamet xu'on chika, ruma xuvulij ri c'o chikacajol. 15Quire' xu'on antok xcon choch cruz. Ri rucamic xu'on cha ri ka-ley ojre' israelitas chi manak chic rakalien, ri nu'ej chika ri chica otz chi naka'an o ri man naka'an ta. Quire' xu'on, chi quire' vacame xc'ujie' ri paz chikacajol iviq'uin ixre' ri man ix israelitas ta, y jo'c jun xu'on chika. Can xojc'axtaj; can c'ac'ac' chic kac'aslien ruma jo'c jun chic kab'anun riq'uin ri Cristo. 16Ruma ri Cristo xcon choch cruz, xu'on chika chi vacame manak chic ayoval chikacajol ojre' israelitas iviq'uin ixre' ri man ix israelitas ta. Jo'c jun xu'on chika konojiel, y ruma je' ri rucamic, ri Dios xu'on chika chi xojuoc chic ru-amigos. 17Antok xpa ri Cristo, xalru'ej ri utzulaj rutzijoxic ri paz chica ri vinak. Xu'ej chiva ixre' ri c'a naj ixc'o-ve choch ri Dios, y xu'ej je' chica ri cierca ic'o-ve choch ri Dios. 18Ruma ri Cristo, konojiel ojre' nkojtiquir nkujiel-apa cierca riq'uin ri Katata' Dios, israelitas y man israelitas ta. Y ja ri Espíritu Santo nito'n kichin chi junan kavach nkujiel-apa riq'uin. 19Rumare' ixre' man ix inche'l ta chic ri vinak ri nca'pa jun chic nación. Xa can ix junan chic quiq'uin ri santos hermanos y ix ralc'ual chic ri Dios. 20Can ixc'o c'a paro' jun cimiento, y ri cimiento re' ja ri ruch'ab'al ri Dios ri nitzijos cuma ri apóstoles y ri profetas. Y ja ri Jesucristo ri Ab'aj ri tz'amayuon ri jay, chi quire' ri jay man nitzak ta. 21Y quinojiel ri xa jun chic quib'anun riq'uin ri Jesucristo, nca'cusas richin ri jay. Y ri jay re' ntuoc jun santo templo richin ri Ajaf. 22Y quire' je' ixre' ri xa jun chic ib'anun riq'uin ri Jesucristo, can nquixrucusaj je' richin ri ru-templo ri Dios, ruma c'o chic ri Espíritu Santo riq'uin ivánima.

will be added

X\