Efesios 1

1Inre' Pablo, in ru-apóstol ri Jesucristo ruma quire' nrajo' ri Dios; nitz'ib'aj-el va carta va chiva ixre' santos hermanos ri ixc'o chupan ri tanamet Efeso; ri iyo'n ivánima riq'uin ri Jesucristo. 2Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 3Kaya' ruk'ij ri Dios, ri Rutata' ri Kajaf Jesucristo. Y ruma jo'c jun kab'anun riq'uin ri Cristo, ri Dios nuya' chika nojiel ri bendiciones espirituales ri richin chicaj. 4Ruma xojrucha' antok c'a maja' c'o ri roch-ulief. Xojrucha' ruma ri Cristo; quire' xu'on ri Dios ruma nrajo' chi sak ri kac'aslien choch jaja' y chi man jun itziel kax c'o pa kac'aslien. 5Ruma ri Dios altíra nkojrajo', rumare' ya ranun chic pa pensar chi xojrucha' chi xojuoc ralc'ual ruma ri Jesucristo. Quire' xu'on ruma quire' xrajo' jaja', 6chi niyo'x ruk'ij ruma ri namalaj favor ri xuya' chika. Y ri Dios, ruma altíra nrajo' ri Ruc'ajuol, rumare' nkuru'on recibir ojre'. 7Ri Ruc'ajuol xcon kuma ojre' y x'in ruquiq'uiel chi xutoj y chi x'an perdonar ri ka-pecados. Can k'alaj chi ri namalaj ru-favor ri Dios can inche'l jun nem b'ayomal ri xuya' chika, 8ruma nuya' q'uiy kano'j y nu'on chika chi ni'ka pa kave' (naka'an entender) q'uiy kax. 9Can xu'ej c'a chakavach ri nrajo' jaja' ri man e'n ta ojier can tiempo, y re' can riq'uin ránima jaja' xpa-ve chi xu'ej chakavach ri ranun-pa pensar. 10Jaja' ranun-pa pensar antok xtalka ri ruq'uisb'al tiempo richin ri roch-ulief xtuya' nojiel pa ruk'a' ri Cristo, nojiel ri c'o chicaj y nojiel ri c'o vave' choch-ulief. 11Ruma ri Cristo c'o ka-herencia, ojre' ri oj-cho'n chic ruma ri Dios. Xojrucha' ruma jare' ri ranun-pa pensar; jaja' nu'on nojiel ri ranun pensar, 12ruma nrajo' chi ojre' nakaya' ruk'ij. Jare' nrajo' chika ojre' ri na'ay kayo'ien-apa ri Cristo. 13Y ixre' je' xivaxaj ri ruch'ab'al ri Dios. Can ketzij c'a ri ch'ab'al ri xivaxaj, ja ri evangelio ri xixcalo. Ixre' antok xinimaj ri Cristo, ri Dios xuya' ri Espíritu Santo chiva, ruma quire' ranun-pa prometer. Y ri Espíritu Santo, jare' ri sello chi ix richin chic ri Dios. 14Y ri Espíritu Santo ri c'o kiq'uin, re' jun ratal chi c'o ka-herencia. Ri Espíritu Santo xtic'ujie' kiq'uin hasta c'a xkojcolotaj-el richin xa jun tiempo choch ri pecado, ojre' ri oj richin chic ri Dios y chi nakaya' ruk'ij. 15Inre' vaxan chi ixre' cukul ic'u'x riq'uin ri Ajaf Jesús. Y vaxan je' chi nqui'vajo' quinojiel ri nic'aj chic santos hermanos. 16Rumare' antok ni'an orar, can nquixnataj chuva y siempre niya' tiox b'a' cha ri Dios ivuma. 17Can nic'utuj cha ri Dios chi ri Espíritu Santo ri niyo'n no'j, q'uiy ta no'j xtuya' chiva. Q'uiy ta ri xtu'ej ri Espíritu Santo chivach, chi ntivatamaj más roch ri Dios. Jare' ri nic'utuj cha ri Katata' Dios ri nem ruk'ij; ri Ru-Dios ri Kajaf Jesucristo. 18Nic'utuj cha ri Dios chi tub'ana' alumbrar ri ino'j, richin chi ni'ka ta pan ive' (nti'an ta entender) ri chica kayo'ien ojre' ri xojayox ruma ri Dios. Nic'utuj ruma nivajo' chi ni'ka ta pan ive' (nti'an ta entender) chi ri herencia ri xtiyo'x chika altíra ja'al, jun herencia ri inche'l jun nem b'ayomal. Y ri herencia re' junan xtiyo'x chika quiq'uin quinojiel ri santos hermanos. 19Nic'utuj je' ruma nivajo' chi ixre' xti'ka ta pan ive' (xti'an ta entender) chi altíra nem ri ru-poder ri Dios ri c'o kiq'uin ojre' ri kaniman. Ri ru-poder ri c'o kiq'uin ojre' junan riq'uin ri ru-poder ri xucusaj, 20antok xuc'asuoj ri Cristo chiquicajol ri quiminaki' y xu'on cha chi xb'atz'uye' chila chicaj pa ru-derecha jaja', 21y xuya' pa quive' ri ángeles, ri autoridades, ri nic'aj chic ri c'o poder pa quik'a' y ri c'o quik'ij. Jaja' más nem chiquivach quinojiel; man jo'c ta chupan ri tiempo vacame, xa quire' je' chupan ri tiempo ri patanak. 22Ri Dios xuya' nojiel chuxie' rakan ri Cristo, y xu'on je' cha chi jaja' ri jolomaj pa kave' konojiel ojre' ri kaniman, ri oj ru-iglesia. 23Can ojre' ri oj-acunak ru-cuerpo jaja'. Jaja' c'o kiq'uin y nuya' ka-poder. Jaja' nojiel lugar c'o-ve, y runojsan nojiel.

will be added

X\