Colosenses 4

1Ixre' ajaf, jo'c ri otz y ri choj tib'ana' quiq'uin ri esclavos; ruma talka pan ive' chi ixre' je' c'o jun Ivajaf chicaj. 2Can siempre tib'ana' orar, y c'as ta ri ijaluon antok nti'an orar, y siempre tiya' tiox b'a' cha ri Dios. 3Y tib'ana' je' orar pa ka-cuenta ojre', chi quire' ri Dios nujak ta puerta chakavach chi quire' nakatzijuoj chica ri vinak ri man e'n ta chica ojier can, chi jo'c ruma ri Cristo nkojcolotaj. Y ruma nitzijuoj re', xiyo'x pa cárcel. 4Tic'utuj cha ri Dios chi otz y k'alaj rub'ixic ni'an antok xtintzijuoj ri ruch'ab'al. 5Y ixre' tivatamaj quixc'ujie' chiquicajol ri vinak ri man quiniman ta ri Cristo. Can otz ino'j tib'ana' quiq'uin. Man tiya' chi choj quire' nak'ax ri tiempo. 6Can otz ta nojiel ri nti'ej. Can ta inche'l c'o atz'an riq'uin ri itzij chi quire' c'o ruqui'al, chi quire' antok c'o nic'utux chiva, ivata'n ri chica nti'ej. 7Ri hermano Tíquico xtalrutzijuoj chiva ri chica nub'anun. Jaja' jun hermano ri altíra nivajo' y rujachuon-ri' chi nu'on ri rusamaj ri Ajaf y vach'il c'a chupan ri samaj. 8Y jaja' ri nitak-el iviq'uin chi nuna'iej-pa ri chica ib'anun y chi ni'ruya' ruchuk'a' ivánima. 9Y riq'uin jaja' nitak-el je' ri hermano Onésimo, ri alanak-pa iviq'uin ixre'. Ri Onésimo ruyo'n ránima riq'uin ri Dios, y altíra nivajo'. Ri ica'ye' hermanos re' xtiqui'ej chiva nojiel ri nib'anataj vave'. 10Ri hermano Aristarco, ri c'o viq'uin pa cárcel, nutak-el jun saludo chiva; ri hermano Marcos, ri ru-sobrino ri hermano Bernabé, nutak-el je' jun saludo chiva, y ya xin'ej chiva chi xa nib'aka iviq'uin ri Marcos, can otz tib'ana' recibir; 11y nutak-el je' jun saludo chiva ri hermano Jesús, ri ni'e'x je' Justo cha. Ri hermanos re' israelitas inche'l inre' y b'anun ri circuncisión chica. Ijeje' ri nca'to'n vichin chi nakatzijuoj ri ru-reino ri Dios chica ri vinak. Man jun chic nuvanakil nisamaj viq'uin, jo'c ijeje', y nquinqui'an consolar. 12Ri hermano Epafras nutak-el jun saludo chiva. Ixre' can ivata'n roch jaja' ruma chila iviq'uin ixre' patanak-ve, y jun utzulaj ru-siervo ri Cristo. Jaja' riq'uin nojiel ránima nu'on orar pan i-cuenta. Can siempre nuc'utuj cha ri Dios chi ixre' cof quixpi'ie' pan ic'aslien choch ri Dios, can ta niq'uiy otz ri ic'aslien y can ta xti'an nojiel ri nrajo' ri Dios. 13Inre' nitz'at chi ri hermano Epafras altíra nquixruc'uxlaj ruma ri nu'on ivuma ixre' y cuma je' ri hermanos ri ic'o pa tanamet Laodicea y ri ic'o pa tanamet Hierápolis. 14Y ri hermano Lucas ri doctor, nutak-el je' jun saludo chiva; inre' altíra nivajo' jaja'. Ri hermano Demas nutak-el je' jun saludo chiva. 15Tiya' jun saludo chica ri hermanos ri ic'o pa tanamet Laodicea. Y tiya' jun saludo cha ri Ninfas y cha ri iglesia ri niquimol-qui' pa rachuoch jaja'. 16Y antok ixre' ib'anun chic leer va carta va chiquivach ri hermanos, titaka-el chi ti'an je' leer choch ri iglesia ri c'o pa tanamet Laodicea. Y quire' je' ri jun chic carta ri ni'an-el chica ijeje', nivajo' chi ixre' nti'an leer je'. 17Y tib'ana' favor ti'ej cha ri hermano Arquipo chi tub'ana' ri samaj ri yo'n cha ruma ri Ajaf. 18Inre' Pablo riq'uin nuk'a' nitz'ib'aj-el va saludo va. Y man timastaj chiva chi inc'o pa cárcel. Ja ta ri ru-favor ri Dios tic'ujie' iviq'uin. Amén.

will be added

X\