Colosenses 3

1Y ruma ixre' ya xixc'astaj riq'uin ri Cristo antok jaja' xc'astaj, can qui'canuj ri kax ri i-richin ri chicaj, pache' c'o-ve ri Cristo, tz'uyul pa ru-derecha ri Dios. 2Can ja ri kax ri c'o chila chicaj qui'b'ana' pensar y man ja ta ri kax ri ic'o choch-ulief. 3Ruma ixre' ya xixcon choch ri itziel tak kax ri i-richin ri roch-ulief, y vacame c'o chic ic'aslien riq'uin ri Cristo, y jo'c jun ib'anun riq'uin ri Dios ruma ri Cristo. 4Y ja c'a ri Cristo ri ic'aslien, y antok jaja' xtipa chic jun b'ay, can riq'uin namalaj ruk'ij y ixre' je' can xtik'alajin chi c'o ik'ij. 5Rumare', man chic qui'an ri itziel tak kax ri nca'irayij, ri xa i-richin ri roch-ulief; xa tiquimisaj ri itziel tak kax ri nca'pa pan ijaluon. Ri achi'a' y ri ixoki' man tiquicanuj-qui' chi niqui'an pecado. Man ti'an kax tz'il. Man tiya' lugar chica ri itziel tak kax ri nca'irayij, xa qui'iya' can nojiel re'. Man tirayij chi jo'c ta iviq'uin ixre' c'o ta nojiel; ruma xa quire' nti'an, can itziel, can junan riq'uin chi ntiya' quik'ij ri ídolos. 6Y ruma quire' ri nca'qui'an ri vinak ri man quiniman ta ri ruch'ab'al ri Dios, rumare' nika ri castigo ri xtuya' ri Dios pa quive'. 7Ixre' je' quire' xi'an ojier can, antok c'a ivuc'uan ri itziel c'aslien. 8Pero vacame man chic ti'an quire'. Man chic tic'ujie' ri ayoval riq'uin ivánima, ni man chic qui'an kax ri man i-otz ta ruma ivoyoval. Man tirayij chic nti'an jun kax itziel chica ri nic'aj chic, man jun kax itziel ti'ej chica ri vinak, man ca'iel itziel tak tzij pan ichi'. 9Man titz'ak chic tzij chib'il-ivi'. Ruma ixre' ya xiya' can ri vieja c'aslien ri xivuc'uaj. 10Vacame ivuc'uan jun c'ac'ac' c'aslien ri ruyo'n ri Dios chiva. Y jaja' nu'on cha ri c'aslien re' chi niq'uiy y nquixuoc inche'l jaja'. Quire' nu'on chiva, chi quire' otz xtivatamaj roch jaja'. 11Y ruma ri c'ac'ac' c'aslien, man jun diferencia nu'on xa israelita o xa man israelita ta, xa b'anun ri circuncisión cha o xa man b'anun ta cha, xa c'o ruk'ij o xa manak, xa esclavo o xa libre. Ri nic'atzin ja chi ri Cristo c'o riq'uin kánima konojiel. 12Ri Dios altíra nkojrajo'; can xojrucha' y oj santos ralc'ual. Rumare' nic'atzin chi siempre nakajoyovaj quivach quinojiel. Nic'atzin chi kab'ana' ch'ute'n, otz kano'j quiq'uin quinojiel, kacach'o' nojiel ri nipa chikij, tic'ujie' ka-paciencia. 13Antok c'o jun nu'on jun kax itziel chiva, ticach'o'. Y can inche'l xu'on ri Cristo chi xu'on perdonar ri i-pecados ixre', can quire' je' tib'ana' ixre' chica ri nic'aj chic. 14Pero ri más nic'atzin ja chi nic'ujie' ri amor iviq'uin. Ruma xa nqui'vajo' ri nic'aj chic, can nu'on chiva chi junan ivach. 15Y riq'uin ivánima can nic'atzin je' chi tic'ujie' ri paz ri nuya' ri Dios, y ja ta re' ri nuc'uan ivichin. Rumare' xixrayuoj ri Dios, chi xi'an jun cuerpo quiq'uin quinojiel ri quiniman chic. Nic'atzin je' chi siempre tiya' tiox b'a' cha ri Dios. 16Can nic'atzin je' chi ri ivánima nojnak riq'uin ri ruch'ab'al ri Cristo. Can riq'uin nojiel no'j titijuoj-ivi' y tiya' ruchuk'a' ri ivánima chib'il-ivi'. Y tib'ixaj rub'e' ri Ajaf ruma ri ivánima nuya' tiox b'a' cha. Qui'ib'ixaj salmos, himnos y nic'aj chic b'ix ri nca'lax riq'uin ivánima ruma c'o ri Espíritu Santo iviq'uin. 17Nojiel ri nti'an, tib'ana' pa rub'e' ri Ajaf Jesús. Y nojiel ri nti'ej, ti'ej pa rub'e' jaja'. Y siempre tiya' tiox b'a' cha ri Katata' Dios. Jo'c ruma ri Jesús nquixtiquir ntiya' tiox b'a' cha ri Dios. 18Ixre' ixoki', tinimaj quitzij ri ivachajil, can otz nti'an quire' ruma iniman chic ri Ajaf. 19Y ixre' achi'a', qui'ivajo' ri ivaxjayil, y man ti'an ivoyoval chica, xa siempre otz ino'j tib'ana' quiq'uin. 20Ixre' ac'ola', siempre quixniman chica ri itie-itata', ruma jare' ri nika choch ri Ajaf. 21Y ixre' tata'j, man tiyac quiyoval ri ivalc'ual. Man otz ta chi nak'ax ruve' nti'an chica, ruma xa xtiquimalij quic'u'x. 22Ixre' esclavos, siempre quixniman chica ri ivajaf. Man ti'an chi jo'c nquixsamaj antok ic'o ri ivajaf iviq'uin, jo'c chi ntivajo' chi nquixtz'iet chi ix utzulaj tak esclavos. Nic'atzin chi riq'uin nojiel ivánima tib'ana' ri quisamaj, ruma ri Dios can nquixrutz'at-pa chicaj. 23Nojiel c'a ri nti'an, can riq'uin nojiel ivánima tib'ana'. Inche'l xa ja ri rusamaj ri Ajaf Jesucristo ri nti'an y man quichin ta ri vinak. 24Y ri Ajaf Jesucristo xtuya' jun i-premio ruma rusamaj jaja' ri nti'an; y ri premio re' ja ri herencia ri c'o chicaj. 25Pero ri nib'ano itziel tak kax, xtiyo'x ruc'axiel cha ruma ri nu'on. Ruma ri Dios man nutz'at ta xa c'o ruk'ij jun vinak o manak; ri nutz'at ja ri chica nca'ru'on.

will be added

X\