Colosenses 2

1Nojiel re' ni'ej chiva ruma nivajo' chi ixre' ntivatamaj chi ixc'o riq'uin vánima y altíra ni'an orar pan i-cuenta. Y quire' je' ni'an pa qui-cuenta ri hermanos ri ic'o pa tanamet Laodicea, y pa qui-cuenta quinojiel ri hermanos ri man jun b'ay quitz'atuon noch. 2Quire' ni'an ruma nivajo' chi nquix'an consolar ixvonojiel y chi ntivajo-ivi'. Nivajo' chi niq'uiy ta ri no'j ri c'o iviq'uin, ri inche'l jun b'ayomal, chi ntivatamaj ri man e'n ta chiquivach ri vinak ojier can tiempo chirij ri Katata' Dios y chirij ri Cristo. 3Riq'uin ri Cristo nilitaj nojiel ri utzulaj tak no'j y nojiel ri kata'n, ri inche'l b'ayomal. 4Y nojiel re' xin'ej chiva, ruma inre' nivajo' chi ixre' man quix'an engañar cuma ri vinak ri nca'quicusaj utzulaj tak tzij jo'c chi nquixka pa quik'a'. 5Y mesque man inc'o ta apa iviq'uin, ni man in-pa'l ta apa iviq'uin, ri nu-espíritu c'o-apa iviq'uin. Can nquiquicuot ruma vata'n chi choj ix-b'anak y cof ib'anun chi icukub'an ic'u'x riq'uin ri Cristo. 6Ixre' iniman ri Ajaf Jesucristo, rumare' tivuc'uaj jun c'aslien otz; quire' tib'ana' ruma jo'c jun ib'anun riq'uin jaja'. 7Can quixc'ujie' riq'uin ri Cristo, y tic'ujie-ka ixie' riq'uin. Can siempre ticukub'a' ic'u'x riq'uin, inche'l xivatamaj antok xc'ut chivach. Y siempre tiya' tiox b'a' cha ri Dios. 8Can tib'ana' cuenta-ivi' chi quire' man nquix'an ta engañar cuma ri vinak ri xa ja ri nima'k tak no'j richin ri roch-ulief ri niquic'ut, no'j ri xa man jun rakalien. Ruma xa tradiciones y pensamientos quichin vinak y man riq'uin ta ri Cristo patanak-ve. 9Ruma riq'uin ri Cristo nik'alajin-ve chica ri Dios; ruma jaja' can Dios je'. 10Ixre' man jun chic kax nquixrajo' ruma c'o chic ri Cristo riq'uin ivánima. Y ja ri Cristo ri c'o pa quive' ri ángeles y ri c'o autoridad pa quik'a' ri ic'o chicaj. 11Ixre' ri c'o ri Cristo riq'uin ivánima, can b'anun chic ri circuncisión chiva, pero ri circuncisión re' man junan ta riq'uin ri niqui'an ri vinak. Ri circuncisión ri xu'on ri Cristo chiva, ja ri xralasaj ri itziel tak kax ri c'o riq'uin ivánima; ri nib'ano chiva chi nti'an pecar. 12Antok xix'an bautizar, can inche'l xixmuk junan riq'uin ri Cristo, y can inche'l xixc'astaj je' junan riq'uin. Quire' xi'an ruma xicukub'a' ic'u'x riq'uin ri ru-poder ri Dios, poder ri xc'asuon richin ri Cristo chiquicajol ri quiminaki'. 13Rub'anun-pa, xa ix-quiminak chupan ri i-pecados, y xi'an ri itziel tak kax ri xirayij. C'a maja' ti'an ri circuncisión chiva ruma ri Cristo. Pero vacame ri Dios xu'on chiva chi junan xixc'astaj riq'uin ri Cristo ruma xu'on perdonar ri i-pecados. 14Y rub'anun-pa, chi konojiel ojre' nika ri castigo pa kave', ruma man xojtiquir ta xka'an nojiel ri nu'ej chupan ri ru-ley ri Dios. Pero ri Dios xojrucol choch ri castigo re'. Quire' xu'on ruma ri Cristo xb'ajix choch cruz kuma ojre'. 15Y antok ri Cristo xcon choch cruz, xralasaj ri poder ri c'o pa ruk'a' ri Satanás y pa quik'a' quinojiel ri c'o autoridad ri ic'o chicaj. Can xch'acuon chiquij y xk'alajin chi xukasaj quik'ij. 16Ruma ri Cristo ya xixrucol, mare' man jun tich'o' itziel chivij ixre' ruma ri ntitej o ruma ri ntikun, o ruma je' man nquixk'oyie' ta ri k'ij antok nalax ri ic' y ri k'ij richin uxlanien y nic'aj chic namak'ej. 17Ruma nojiel re' xa rumuch'uch'il ri Cristo. Pero vacame, jaja' c'o kiq'uin y man chic nic'atzin ta ri rumuch'uch'il. 18Man jun timajo chiva ri premio ri c'o chicaj, man quixka pa quik'a' ri vinak ri niqui'an chi man jun quikalien, y niquiya' quik'ij ri ángeles. Ri vinak ri niqui'an quire', niqui'an chi q'uiy cata'n chirij ri man i-quitz'atuon ta. Ijeje' mesque i-ch'ute'k-oc niqui'an, xa niquina' chi i-nima'k y jo'c niqui'an pensar ri itziel tak kax ri niquirayij. 19Ijeje' xa man ic'o ta riq'uin ri Cristo ri jolomaj, ri c'o pa kave' konojiel ri kaniman chic. Jaja' nib'ano chika ojre' ri oj-acunak ru-cuerpo chi niq'uiy ri kac'aslien. Y nu'on chika chi jo'c jun kab'anun konojiel inche'l nrajo' ri Dios. Xa can inche'l ri ru-cuerpo jun vinak, ja'al quic'uan-qui' y quitz'amuon-qui' ruma ri ib'ach'. 20Ixre' can inche'l xixcon riq'uin ri Cristo antok jaja' xcon, rumare' ix-quiminak chic choch ri no'j richin ri roch-ulief. Y xa quire' ib'anun, ¿karruma c'a nti'an ixre' ri niqui'ej ri vinak ri xa richin ri roch-ulief? 21Ruma ijeje' niqui'ej chiva: Man ticusaj la, man titej la, ni man titz'om la, nca'cha' chiva. 22Nojiel ri tzij inche'l re' ri nca'e'x y ri nca'c'ut, xa quino'j vinak. Ruma chirij ri kax, kata'n chi ri Dios ruyo'n chi nca'q'uis. 23Can ketzij chi nojiel re' can inche'l c'o q'uiy no'j ruc'uan. Niqui'ej chi kaya' quik'ij ri ángeles. Niqui'ej chi kab'ana' ch'ute'n y kab'ana' castigar ri ka-cuerpo. Pero nojiel re' man nicovin ta chirij ri itziel tak kax ri nurayij ri ka-cuerpo.

will be added

X\