Colosenses 1

1Inre' Pablo, in ru-apóstol ri Jesucristo ruma quire' nrajo' ri Dios. Can junan ojc'o riq'uin ri hermano Timoteo, 2antok nakatak-el va carta va chiva ixre' santos hermanos ri ixc'o pa tanamet Colosas, ri iyo'n ivánima riq'uin ri Cristo. Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 3Siempre naka'an orar pan i-cuenta ixre', y nakaya' tiox b'a' cha ri Dios ri Rutata' ri Kajaf Jesucristo, 4ruma xkaxaj chi cukul ic'u'x riq'uin ri Cristo Jesús y can nqui'vajo' quinojiel ri santos hermanos, 5ruma ivoyo'ien ri ruyacuon ri Dios chiva chicaj. Y re' xina'iej chi c'o, antok xivaxaj ri evangelio, ri can ketzij. 6Y antok xivaxaj y can ketzij xi'ka pan ive' (xi'an entender) ri ru-favor ri Dios, can ix q'uiy ri xinimaj. Y ri evangelio b'anak nojiel tanamet choch-ulief. Can iq'uiy ri vinak ri xquinimaj y niq'uiy ri quic'aslien, inche'l ixre'. 7Y riq'uin ri hermano Epafras xivatamaj ri ruch'ab'al ri Dios. Ojre' altíra nakajo' jaja' y junan naka'an ri samaj, jaja' otz nisamaj pa rusamaj ri Cristo chire' chicajol. 8Y antok jaja' xalka kiq'uin, xalru'ej chika chi ixre' can altíra ntivajo-ivi', ruma c'o ri Espíritu Santo iviq'uin. 9Rumare', xa-jan antok xkaxaj re', ojre' man oj-tanal ta chi naka'an orar pan i-cuenta. Nakac'utuj cha ri Dios chi tu'on chiva chi xtivatamaj otz ri nrajo' jaja', y chi tuya' je' nojiel no'j espiritual chiva y chi xti'ka pan ive' (xti'an entender) nojiel kax espiritual. 10Quire' nakac'utuj cha ri Dios, ruma nakajo' chi ixre' ntivuc'uaj jun c'aslien inche'l ri c'aslien ri nic'atzin niquic'uaj ri quiniman chic ri Ajaf Jesucristo. Chi ixre' siempre ntivuc'uaj ta jun c'aslien ri nika choch jaja'. Can ta más y más nti'an ri otz, y ntivatamaj ta más chirij ri Dios. 11Nakajo' c'a chi ri Dios nuya' q'uiy i-poder, ruma jaja' c'o ruk'ij y can nem ri ru-poder. Y ri poder ri xtuya', can xtic'atzin chiva chi nic'ujie' i-paciencia y chi nticoch' nojiel. 12Y nquixquicuot ntiya' tiox b'a' cha ri Katata' Dios, ruma rub'anun chika konojiel chi nuya' ka-herencia chila chicaj, junan quiq'uin ri nic'aj chic santos hermanos. 13Ri Katata' Dios ya xojrucol pa ruk'a' ri rajaval ri k'aku'n y xojruya' pa ruk'a' ri Ruc'ajuol ri altíra nrajo'. 14Ri Ruc'ajuol ri Dios xcon kuma ojre' y x'in ruquiq'uiel, y rumare' ya xojcolotaj y x'an perdonar ri ka-pecados. 15Ri Dios man k'alaj ta nitz'iet, pero nik'alajin ruma ri Ruc'ajuol. Ri Ruc'ajuol c'o na'ay y más nem chiquivach quinojiel ri kax ri c'o. 16Ruma jaja' xb'ano nojiel ri c'o chila chicaj y ri ic'o choch-ulief. Ri nca'tz'atataj y ri man nca'tz'atataj ta, mesque ángeles, o gobiernos ri ic'o chicaj, o nem quik'ij ri ic'o chicaj, o c'o poder pa quik'a' ri ic'o chicaj; can quinojiel ruma jaja' ic'o, y nojiel ri xa'ru'on, can richin chi niquiya' ruk'ij jaja'. 17Ri Cristo can c'o-ve na'ay choch nojiel ri kax, y jaja' c'uayuon quichin. 18Jaja' ri jolomaj ri c'o pa kave' ojre' ri kaniman, ri oj ru-iglesia y oj-acunak ru-cuerpo. Jaja' ri niyo'n kac'aslien, jaja' ri xc'astaj-pa na'ay chiquicajol ri quiminaki'. Rumare' jaja' más c'o ruk'ij chiquivach nojiel ri ic'o. 19Can ja-ve re' xrajo' ri Dios, chi ri Ruc'ajuol i-junan riq'uin jaja'. Ri Ruc'ajuol, can Dios je'. 20Y antok ri Ruc'ajuol x'in ri ruquiq'uiel, ri Dios xu'on chica quinojiel ri ic'o choch-ulief y ri ic'o chicaj, chi nca'jiel chic pa riq'uin jaja' mismo ruma xu'on chi xc'ujie' ri paz chiquicajol ruma ri Ruc'ajuol xcon choch cruz. 21Y rub'anun-pa, ixre' nem icajol riq'uin ri Dios ruma ri itziel tak ino'j y ri itziel tak kax ri xa'i'an. Ruma nojiel ri xa'i'an, xic'ut chi ix ru-enemigos ri Dios. Pero vacame ixre' xixjiel chic pa riq'uin ri Dios, 22ruma ri samaj ri xu'on ri Ruc'ajuol ri Dios antok xpa choch-ulief. Can xuoc vinak inche'l ojre' y xcon choch cruz, chi quire' ixre' can sak ic'aslien, manak chic i-pecado y man jun itziel kax nilitaj chivij antok xquixb'aka choch, 23xa ketzij chi cof ixc'o chupan ri cukb'al c'u'x riq'uin ri Dios y man jun kax nisiluon ivichin. Nic'atzin chi riq'uin nojiel ivánima ntivoyo'iej-apa ri nu'ej chupan ri evangelio. Ixre' can ivaxan chic otz, y ja je' re' ri ya xb'aka quiq'uin quinojiel ri vinak ri ic'o choch-ulief. Y chi nitzijos, ri Dios xu'on chuva inre' Pablo chi xinuoc rusamajiel. 24Ivuma ixre' inre' ni'an sufrir vacame. Pero man nquib'isuon ta, inre' xa nquiquicuot. Ruma ri sufrimiento ri nik'asaj, can inche'l ri sufrimiento ri xuk'asaj ri Cristo ruma ri iglesia, ri ru-cuerpo jaja'. 25Y inre' xinuoc samajiel richin ri iglesia re', y ri samaj ri xuya' ri Dios chuva inre', can chicajol ixre' ri man ix israelitas ta. Y jaja' nrajo' chi caval ri ruch'ab'al nitzijuoj chiva. 26Ri ruch'ab'al ri Dios xa inche'l avan-pa chiquivach ri vinak ojier can tiempo. Xa c'a vacame xc'ut chakavach ojre' ri oj santos ralc'ual. 27Can chika ojre' ri Dios xuc'ut ri c'o riq'uin ri inche'l jun nem b'ayomal y c'o ruk'ij, y vacame ri Cristo c'o chic riq'uin ivánima ixre' ri man ix israelitas ta y rumare' ivoyo'ien ri k'ij chi xquixb'ac'ujie' riq'uin jaja' chupan ri utzulaj lugar ri c'o chicaj. 28Ojre' ja ri Cristo nakatzijuoj. Naka'ej chica quinojiel chi tiquiya' can ri pecado, y riq'uin nojiel utzulaj no'j nca'katijuoj quinojiel. Quire' naka'an ruma nakajo' chi niq'uiy otz quic'aslien quinojiel ri niquinimaj ri Cristo Jesús. 29Inre' nitej nuk'ij chi niq'uiy quic'aslien quinojiel. Y chi ni'an ri samaj re', nicusaj nojiel ri poder ri ruyo'n ri Cristo chuva y ri poder re' can nem.

will be added

X\