Hechos 8

1Ri Saulo can xka choch chi ri Esteban xquimisas. Y ja k'ij re' chire' Jerusalén, ri quiniman ri Jesucristo xqui'an-ka sufrir, ruma itziel nca'tz'iet. Rumare' quinojiel xquiquiraj-qui'; ic'o xa'a nic'aj chic tanamet chire' Judea, y ic'o xa'a Samaria, pero ri apóstoles xa'c'ujie' can Jerusalén. 2Y ri Esteban xmuk cuma utzulaj tak achi'a' ri c'o ri Dios riq'uin cánima y altíra xcok'iej. 3Y ri Saulo can altíra itziel nu'on cha ri iglesia, y ntuoc pa tak jay chi nca'b'aralasaj-pa, chi ixoki' chi achi'a' nca'ruchiririej-pa y nca'rutz'apij pa cárcel. 4Y ri quiniman ri Jesucristo xquiquiraj-qui'. Y nojiel lugar pache' xa'b'aka-ve, can niquitzijuoj ri evangelio. 5Y ri Felipe xb'aka chupan ri tanamet Samaria. Y antok c'o chic chire', xutz'om c'a rutzijoxic rub'e' ri Cristo chica ri ic'o chire'. 6Y q'uiy vinak ri niquimol-qui' riq'uin ri Felipe, chi nica'xaj ri nu'ej jaja', y niquitz'at ri señales ri nu'on chiquivach. 7Can iq'uiy vinak ri xa'iel-el ri itziel tak espíritus ri ic'o quiq'uin. Y ri itziel tak espíritus re' can altíra nca'siq'uin nca'iel-el. Ic'o je' ri nca'jaco nca'in, y ic'o ri paralítico qui-cuerpo, xa'an sanar. 8Rumare' ri vinak ri ic'o chire' pa tanamet can altíra nca'quicuot. 9Y chupan ri tanamet re', antok maja' tib'aka ri Felipe, c'o jun ache aj-itz rub'inan Simón. Can i-rub'anun engañar ri aj-Samaria. Jaja' ru'e'n je' chica chi jaja' jun ache ri c'o ruk'ij. 10Y quinojiel ri vinak chi ch'ute'k chi nima'k nca'niman ri rutzij ri aj-itz re' y niqui'ej chirij: Ri namalaj ru-poder ri Dios c'o riq'uin ri Simón, nca'cha'. 11Y q'uiy yan tiempo i-rub'anun-pa engañar ri vinak riq'uin nojiel ri magia ri nca'ru'on. Rumare' ri vinak niquinimaj ri rutzij. 12Pero antok ri vinak xquinimaj ri nutzijuoj ri Felipe chirij ri Jesucristo y ri evangelio ri nich'o' chirij ri ru-reino ri Dios, chi achi'a' chi ixoki' xa'an bautizar. 13Y ri Simón je', ri ache aj-itz, xunimaj ri ruch'ab'al ri Dios y x'an bautizar. Ri Simón re', can pache' b'anak ri Felipe, can ja b'anak riq'uin. Pero jaja' can chapatajnak antok nca'rutz'at ri nima'k señales y milagros ri nca'ru'on ri Felipe chiquivach ri vinak. 14Y ri apóstoles ri ic'o can Jerusalén, xca'xaj chi ri aj-Samaria xquinimaj ri ruch'ab'al ri Dios. Rumare' xa'quitak c'a el ri Pedro y ri Juan quiq'uin. 15Y antok xa'b'aka, xqui'an orar pa qui-cuenta ri quiniman ri Jesucristo ri ic'o chire' Samaria, chi quire' nika-pa ri Espíritu Santo pa quive', 16ruma man jun chiquivach ijeje' ri kajnak-pa ri Espíritu Santo paro', jo'c i-b'anun bautizar pa rub'e' ri Jesús. 17Y ri Pedro y ri Juan xquiya' quik'a' pa quive', y xqui'an recibir ri Espíritu Santo. 18Y antok ri Simón xutz'at chi xka-pa ri Espíritu Santo pa quive' ri vinak antok ri apóstoles xquiya' quik'a' pa quive', ri Simón xusuj miera chica, 19y xu'ej chica: Tiya' chuva ri poder inche'l c'o iviq'uin ixre', chi quire' antok niya' nuk'a' paro' jun vinak, xtu'on recibir ri Espíritu Santo, xcha' chica. 20Y ri Pedro xu'ej cha ri Simón: C'a pa k'ak' xcab'aka-ve junan riq'uin ri a-miera; ruma atre' na'an pensar chi riq'uin miera nalok' ri nusipaj ri Dios. 21Atre' man jun ak'a' cha ri samaj re', ruma ri avánima man choj ta c'o choch ri Dios. 22Taya' can ri man otz ta ri c'o pan avánima, y tac'utuj c'a favor cha ri Dios chi nu'on perdonar ri a-pecado, ruma choch jaja', man otz ta ri xa'an pensar. 23Inre' nitz'at chi ri itziel c'a c'o pan ac'aslien y ri pecado c'a at-ruximuon, xcha' ri Pedro. 24Pero ri Simón xu'ej chica ri apóstoles: Tib'ana' rogar pa nu-cuenta inre' cha ri Ajaf Dios, chi quire' man jun kax nipa pano' inche'l ri xi'ej, xcha'. 25Y antok ri apóstoles quitzijuon y quic'utun chic ri ruch'ab'al ri Dios chica ri vinak ri ic'o Samaria, ja xa'a; pero can niquitzijuoj ri evangelio nic'aj chic tanamet ri ic'o chupan ri Samaria, ri pache' nca'k'ax-ve. C'ajare' xa'a chic Jerusalén. 26Y c'o jun ángel richin ri Ajaf xch'o' cha ri Felipe, y xu'ej cha: Capalaj, y ca'in chupan ri jun b'ay ri ntiel-el Jerusalén y nixulie-ka pa tanamet Gaza. Ri b'ay re' man q'uiy ta vinak nca'k'ax chupan. 27Y ri Felipe can xpalaj-pa, y x'a. Y antok b'anak, xutz'at jun ala' aj-Etiopía. Ri ala' re' jun eunuco, y c'o paro' nojiel ri rub'ayomal ri reina Candace richin ri nación Etiopía. Ri ala' re' yo'n autoridad cha ruma ri Candace, y xpa Jerusalén chi xalruya' ruk'ij ri Dios. 28Y antok nitzalaj chic pa ru-nación, tz'uyul-el chupan ri ru-carruaje. Y jaja' nu'on leer b'anak. Y ri nu'on leer, ja ri rutz'ib'an can ri profeta Isaías. 29Y ri Espíritu Santo xu'ej cha ri Felipe: Cajiel-apa riq'uin ri carruaje pache' b'anak-ve ri ala' eunuco, y ca'in riq'uin. 30Y antok ri Felipe xjiel-apa riq'uin ri carruaje, xra'xaj ri nu'on leer ri ala' b'anak, ja ri rutz'ib'an can ri profeta Isaías. Mare' ri Felipe xuc'utuj cha: ¿Ni'ka pan ave' (na'an entender) ri na'an leer? xcha' cha. 31Pero ri ala' re' xu'ej: ¿Che'l c'a xti'ka pano' (xtin'an entender) xa man jun nic'utu chinoch? Y ri ala' xu'on rogar cha ri Felipe chi tijotie-el y titz'uye-el riq'uin. 32Ri ruch'ab'al ri Dios ri nu'on leer ri ala' re', nu'ej: Xuc'uax chi niquimisas, inche'l ni'an cha jun oveja. Can inche'l nu'on ri alaj oveja ri man nisiq'uin ta antok nisocas rij, quire' je' xu'on jaja', man jun kax xu'ej. 33Man jun ruk'ij x'an cha, y mesque man jun ru-pecado, paro' jaja' xka-ve nojiel pecado. Y ri nca'niman richin, ¿chica came nicovin nijilan quichin? Ruma xquimisas-el ri choch-ulief. Quire' nu'ej ri nu'on leer. 34Y ri ala' eunuco xuc'utuj cha ri Felipe: Tab'ana' favor ta'ej chuva: ¿Choj chirij nich'o-ve ri profeta vave'? ¿Chirij jaja' mismo nich'o-ve, o chirij jun chic? xcha'. 35Ri Felipe xutz'om rub'ixic riq'uin ri rutz'ib'an can ri profeta Isaías, richin chi xch'o' chirij ri ru-evangelio ri Jesús. 36Y antok xa'b'aka jun lugar ri pache' c'o-ve ya', ri ala' eunuco xu'ej cha ri Felipe: Vave' c'o ya'. ¿Chica ta nib'ano impedir chi ni'an bautizar? xcha'. 37Y ri Felipe xu'ej cha ri ala' re': Xa riq'uin nojiel avánima nanimaj ri Jesucristo, otz chi na'an bautizar, xcha'. Y ri ala' xu'ej c'a: Ninimaj chi ja ri Jesucristo ri Ruc'ajuol ri Dios, xcha'. 38Y rumare' ri ala' xu'ej chi tipi'ie' ri carruaje. Y xa'ka-ka ri ica'ye' pa ya', y ri Felipe xu'on bautizar ri ala'. 39Antok i-alanak chic pa pa ya', ri Felipe xuc'uax ruma ri Ru-Espíritu ri Ajaf. Y ri ala' eunuco man xutz'at ta chic ri Felipe, pero niquicuot xutz'om chic el b'ay. 40Y ri Felipe xb'aka pa tanamet Azoto. Y xak'ax nic'aj chic tanamet, nutzijuoj ri evangelio. Quire' xu'on c'a hasta xb'aka pa tanamet Cesarea.

will be added

X\