Hechos 6

1Chupan ri tiempo re', ri discípulos más nca'q'uiyir-ka. Y ri nca'ch'o' griego niqui'ej chiquij ri nca'ch'o' hebreo, chi ri malca'n-ixoki' ri ic'o chiquicajol ri nca'ch'o' griego, man nca'an ta atender otz antok nijach k'ij-k'ij ri chica niquitej. 2Rumare' ri doce (cab'alajuj) apóstoles xa'quimol quinojiel ri discípulos, y xqui'ej chica: Man otz ta chi ojre' nakaya' can ri nakatzijuoj ri ruch'ab'al ri Dios, richin chi nquixkilij. 3Vacame c'a hermanos, qui'icha-pa i-siete (ivuku') achi'a' chi'icajol, ri ivata'n chi can choj ri quic'aslien, c'o quino'j y nojnak cánima riq'uin ri Espíritu Santo, chi quire' ijeje' ri nca'kaya' choch ri samaj chi niquijach ri chica nitij. 4Y chi quire' ojre' naka'an ri samaj inche'l ri kab'anun-pa. Naka'an orar, y nakac'ut ri ruch'ab'al ri Dios, xa'cha' chica. 5Y quinojiel xka chiquivach ri x'e'x chica cuma ri apóstoles, y xa'quicha' i-siete (ivuku') achi'a'. Jun ja ri Esteban, jun ache ri can ja'al-ve rucukub'an ruc'u'x riq'uin ri Dios y nojnak ránima riq'uin ri Espíritu Santo. Ri nic'aj chic ja ri Felipe, ri Prócoro, ri Nicanor, ri Timón, ri Parmenas y ri Nicolás ri aj-Antioquía. Ri ache Nicolás rub'e' man israelita ta, pero can runiman ri nu'ej ri ru-ley ri Moisés. 6Y ja ri i-siete (ivuku') achi'a' re' ri xa'quipab'a' chiquivach ri apóstoles. Xa'pa ri apóstoles xqui'an orar, y xquiya' quik'a' pa quive' ri achi'a' re'. 7Y ri ruch'ab'al ri Dios riq'uin ruchuk'a' b'anak, y nca'q'uiyir je' ri discípulos chire' pa tanamet Jerusalén. Y iq'uiy je' chiquivach ri sacerdotes ri niquicukub'a' quic'u'x riq'uin ri Jesucristo. 8Ri Esteban jun ache ri c'o ri ru-poder ri Dios riq'uin, y c'o je' ri ru-favor ri Dios riq'uin. Y nca'ru'on nima'k tak milagros y señales chiquivach ri vinak. 9Pero ic'o vinak ri xa'b'apalaj-pa y xquitz'om-qui' chi tzij riq'uin ri Esteban. Ri vinak re' i-richin jun sinagoga ri ni'e'x quichin ri Esclavos Libertados cha, y quichin je' ri vinak aj-Cirene, aj-Alejandría, aj-Cilicia y aj-Asia. 10Y ri Esteban ja ri Espíritu Santo ri xyo'n runo'j, rumare' antok jaja' xch'o', ri vinak man xa'tiquir ta chirij. 11Rumare' xa'quitoj nic'aj chi tiqui'ej chi xca'xaj chi ri Esteban itziel xch'o' chirij ri ru-ley ri Moisés y chirij je' ri Dios. 12Y antok ri mama'a' tak achi'a' ri niqui'an gobernar, ri achi'a' escribas y ri vinak ri ic'o quiq'uin xca'xaj re', ja xa'b'apalaj-pa chirij ri Esteban; xb'aquitz'ama-pa y xquic'uaj chiquivach ri autoridades richin ri tanamet chi ti'an juzgar. 13Y ic'o je' achi'a' xa'quiya' chi niquitz'ak tzij chirij ri Esteban. Ri achi'a' re' niqui'ej: Va ache va man nitanie' ta nca'ru'ej itziel tak kax chirij ri santo templo y chirij ri ru-ley ri Moisés. 14Ruma kaxan c'a ri nu'ej chi ri Jesús aj-Nazaret xtuvulij ri templo y xtuc'ax nojiel ri costumbres ri xuya' ri Moisés chika. 15Y quinojiel ri achi'a' ri i-tz'uyul pache' ic'o-ve ri autoridades richin ri tanamet, xquitz'at chi ri rupalaj ri Esteban xc'axtaj, y can inche'l titzu'n jun ángel xu'on-ka.

will be added

X\