Hechos 4

1Ri Pedro y ri Juan c'a nca'ch'o' chica ri vinak, antok xa'lka ri sacerdotes y ri achi'a' saduceos y ri qui-jefe ri achi'a' ri niquichajij ri templo. 2Y ri achi'a' re' can yacatajnak quiyoval chiquij ri Pedro y ri Juan, ruma nca'quitijuoj ri vinak. Can niquitzijuoj chi ri Jesús quiminak chic el y xc'astaj-pa chiquicajol ri quiminaki', y rumare' ri quiminaki' can xca'c'astaj chic pa je'. 3Rumare' xa'quitz'om-el ri ica'ye' apóstoles re', y choj xa'b'aquiya' pa cárcel; xa c'a chuca'n k'ij xa'qui'an arreglar, ruma tarde chic. 4Y can iq'uiy chiquivach ri vinak ri xca'xaj ri ruch'ab'al ri Dios ri k'ij re', xquinimaj. Quinojiel ri quiniman y ri xquinimaj ri k'ij re', jo'c ri achi'a' ic'o la'k jun ivu'uo' mil. 5Y chuca'n k'ij, xquimol-qui' chire' Jerusalén ri achi'a' ri nca'b'ano gobernar chiquicajol ri israelitas, ri mama'a' tak achi'a', ri achi'a' escribas, 6ri Anás ri sacerdote ri más c'o ruk'ij, ri Caifás, ri Juan, ri Alejandro, y quinojiel ri quimáma ri sacerdotes ri más c'o quik'ij. 7Y ri Pedro y ri Juan xa'b'ac'amar-pa y xa'yo'x pa nic'aj. Y xquic'utuj chica: ¿Chica xyo'n poder chiva o chica choj b'e' xi'ej chi x'an sanar ri ache? xa'cha' chica. 8Y ri Pedro, nojnak c'a ránima riq'uin ri Espíritu Santo xu'ej chica: Ixre' achi'a' ri nquixb'ano gobernar chupan ri katanamit Israel, y ixre' je' mama'a' tak achi'a': 9Ixre' ntic'utuj chika chirij ri favor ri xka'an cha jun ache ri man otz ta rakan, chi chica xkacusaj chi x'an sanar. 10Tivatamaj c'a ixre' ri ixc'o-pa vave', y ticatamaj je' quinojiel ri nic'aj chic israelitas, chi ri jun ache ri c'o vave' chivach, x'an sanar antok xka'ej ri rub'e' ri Jesucristo ri aj-Nazaret, ri Jesucristo ri xi'ej chi tiquimisas choch cruz, pero ri Dios xu'on cha chi xc'astaj-pa chiquicajol ri quiminaki'. 11Ri Jesús man jun rakalien ib'anun cha, can inche'l niqui'an ri achi'a' ri i-b'anoy-jay cha jun ab'aj, niqui'ej chi man nic'atzin ta. Pero xa ja ri ab'aj re' ri xyo'x ri lugar ri más nic'atzin chi quire' ri jay man nitzak ta. 12Y man jun chic ri nicalo kichin. Ruma ri choch-ulief xa man jun chic b'i'aj yo'n-pa chika chi nkojcolotaj, xcha' ri Pedro. 13Y antok ri achi'a' ri nca'b'ano gobernar xa'quitz'at ri Pedro y ri Juan, can xa'chapataj. Ruma mesque manak qui-estudio y i-sencillo-oc, man niquixi'ij ta qui'. Can k'alaj chi ijeje' xa'c'ujie' riq'uin ri Jesús. 14Y man jun chica xa'tiquir xqui'ej chica ri ica'ye' apóstoles, ruma ri ache ri xc'achoj, pa'l-apa quiq'uin. 15Entonces xqui'ej chi ca'lasas-el chire' ri Pedro y ri Juan, y jo'c ijeje' xa'c'ujie' can chi niqui'an pensar chica niqui'an. 16Y ri achi'a' re' niqui'ej chiquivach: ¿Chica xtaka'an chica? Ruma quinojiel ri vinak vave' Jerusalén cata'n chi xb'anataj jun nem milagro. Y ojre' man nkojtiquir ta nakavaj. 17Pero chi man titzijos más ri xb'anataj, ca'kaxib'ij-el, chi quire' man niquitzijuoj ta chic ri Jesús chica ri vinak. 18Y xa'cayuoj chic apa ri Pedro y ri Juan, y xqui'ej chica chi man chic ca'quitijuoj ri vinak, y man chic tiquitzijuoj ri Jesús chica. 19Pero ri Pedro y ri Juan xa'ch'o-apa, y xqui'ej chica: Ti'ej-na c'a chika: ¿Otz came choch ri Dios, xa ja ri nti'ej ixre' ri naka'an y man naka'an ta ri nu'ej jaja'? 20Ojre' manak che'l chi man ta naka'ej chica ri vinak ri xkatz'at y xkaxaj, xa'cha'. 21Y ri achi'a' ri nca'b'ano gobernar altíra xa'quixi'ij-el ri Pedro y ri Juan y ja xa'quitzokopij-el. Can man jun kax ri xquil chiquij chi xa'qui'an ta castigar, ruma ri vinak can niquiya' ruk'ij ri Dios ruma ri xb'anataj riq'uin ri ache. 22Ruma ri ache ri x'an sanar ruma ri milagro re', xa más cuarenta rujuna'. 23Y antok ri Pedro y ri Juan xa'tzokopis-el, xa'a pache' ic'o-ve ri nic'aj chic discípulos, y xb'aquitzijuoj chica nojiel ri e'n-el chica cuma ri principales sacerdotes y ri mama'a' tak achi'a' ri niqui'an gobernar. 24Y antok ijeje' xca'xaj ri xquitzijuoj ri Pedro y ri Juan, quinojiel junan xqui'an orar y cava xqui'ej chupan ri qui-oración: Namalaj Dios, atre' ri xa'an nojiel; xa'an ri rocaj y ri ic'o choch, xa'an ri roch-ulief y ri ic'o choch, xa'an ri mar y ri ic'o chupan. 25Y atre' xa'e'n cha ri asamajiel David, chi xu'ej: ¿Karruma ri vinak ri pa tak naciones xa itziel tak kax nicajo' niqui'an, y ri vinak ri ic'o pa tak tanamet xa man jun rakalien ri niqui'an pensar? 26Y xa'palaj-pa ri reyes ri ic'o choch-ulief. Y ri gobernadores xquimol-qui', chi xqui'an xa jun, chavij atre' Ajaf Dios, y chirij je' ri Cristo. Quire' rutz'ib'an can ri David. 27Y can ketzij, chi inche'l ri tz'ib'an can chupan ri ruch'ab'al ri Dios, can quire' xb'anataj. Ruma ri Herodes y ri gobernador Poncio Pilato, ri israelitas y ri man israelitas ta, xquimol-qui' vave' pa tanamet Jerusalén chi xa'palaj chirij ri Jesús ri Santo Ac'ajuol ri xatak-pa. 28Quire' xqui'an richin chi xb'anataj ri can pan ak'a' atre' c'o-ve, y a'e'n-pa chi xb'anataj. 29Y vacame Ajaf, tatz'ata' ri vinak re' ri nca'xi'in, ruma yacatajnak quiyoval chikij ojre' ri asamajiel. Y rumare' ojre' nakac'utuj chava chi taya' ka-valor chi quire' man nakaxi'ij ta ki' nakatzijuoj ri atzij. 30Y nakac'utuj je' chava, chi riq'uin ri a-poder nca'an sanidad, señales, y milagros pa rub'e' ri Jesús ri Santo Ac'ajuol, xa'cha'. 31Y antok xa'tanie' riq'uin ri oración, can xsiluon ri lugar pache' quimaluon-ve-qui'. Y xnuoj ri cánima riq'uin ri Espíritu Santo, rumare' man niquixi'ij ta qui' chi niquitzijuoj ri ruch'ab'al ri Dios. 32Y quinojiel ri vinak ri quiniman ri Jesucristo, junan niqui'an pensar y xa jun cánima quib'anun. Y man jun ni'e'n chi jo'c richin jaja' ri c'o riq'uin, sino que nojiel ri kax quichin, niquijach chiquivach. 33Ri apóstoles riq'uin ru-poder ri Dios niquitzijuoj chi ri Ajaf Jesús xc'astaj-pa chiquicajol ri quiminaki', y ri Dios can altíra nca'ru'on bendecir quinojiel. 34Y chiquicajol ri quiniman chic ri Jesucristo, man jun kax nu'on falta chiquivach, ruma ri c'o culief o c'o cachuoch, nca'quic'ayij y ri rajal niquic'am-pa, 35y nalquiya' chica ri apóstoles, y ri apóstoles niquiya' chica ri can nic'atzin chi nca'to'x. 36Y c'o jun ache chiquicajol ri José rub'e'. Y ri José re' aj-Chipre, rumáma can ri Leví. Y ri apóstoles xquiya' jun chic rub'e'. Y ri rub'e' ri xquiya', Bernabé. (Ri tzij Bernabé nu'ej: Nca'ru'on consolar quinojiel.) 37Y ri Bernabé re' xuc'ayij jun rulief, y ri rajal xalruya' pa quik'a' ri apóstoles.

will be added

X\