Hechos 3

1Ri Pedro y ri Juan junan i-b'anak-el chi nca'a pa templo a las tres ri nakak'ij, ruma ja huora re' richin ri oración. 2Y chuchi' ri jun puerta ri rub'inan La Hermosa richin ri templo, k'ij-k'ij c'o ri nca'b'ayo'n can jun ache chi nuc'utuj limosna. Ri jun ache re' xa-jan antok xalax ri manak che'l ni'in. Jaja' nuc'utuj limosna chica ri vinak ri nca'uoc pa templo. 3Y antok ri Pedro y ri Juan nca'uoc pa templo, ri ache nu'on rogar chi nuc'utuj ru-limosna chica ijeje'. 4Pero ri Pedro xuca'yiej-xuca'yiej otz ri ache, y quire' je' xu'on ri Juan, y c'ajare' ri Pedro xu'ej cha ri ache: Kojatz'ata', xcha' cha. 5Y ri ache can xa'rutz'at, y royo'ien ri chica ri xtiquiya' can cha. 6Pero ri Pedro xu'ej cha: Inre' manak oro ni plata viq'uin chi niya' ta chava. Pero ri c'o viq'uin, jare' ri niya' chava, xcha'; y ja xu'ej cha: Pa rub'e' ri Jesucristo ri aj-Nazaret, capalaj y ca'in, xcha' cha. 7Y ri Pedro xutz'om ri ruk'a' derecha ri ache chi xupab'a', y ri rakan ja xa'c'ujie-ka quichuk'a' y quire' je' ri rukul-rakan. 8Y xiruc'aka-pa-ri', xpi'ie' y x'in. Y junan xuoc quiq'uin ri Pedro y ri Juan ri chire' pa templo. Nuc'akala-ri' b'anak, y nuya' je' ruk'ij ri Dios. 9Y iq'uiy vinak ri xa'tz'ato chi ri ache re' ni'in y nuya' ruk'ij ri Dios. 10Ri vinak cata'n chi ja ri ache re' ri nuc'utuj limosna, ri nic'ujie' chuchi' ri puerta richin ri templo; ri puerta ri ni'e'x La Hermosa cha. Rumare' ri vinak re' xa'chapataj y xquixi'ij-qui' ruma ri xb'anataj. 11Y ri ache ri x'an sanar man nca'rutzokopij ta can ri Pedro y ri Juan. Y q'uiy vinak ri xa'lka chiquitz'atic ri chire' chupan jun corredor ri ni'e'x Richin ri Salomón cha. Cha'nin xquimol-apa-qui', ruma man jun b'ay quitz'atuon chi nib'anataj quire'. 12Y antok ri Pedro xa'rutz'at ri vinak, xu'ej chica: Achi'a' israelitas, ¿karruma ixre' nquixchapataj ruma ri xb'anataj? ¿Y karruma xa ojre' nkojitz'at como si fuera riq'uin ka-poder ojre' o ja ri otz ri naka'an choch ri Dios ri xb'ano chi x'in va ache va? 13Ri Katata' Dios, ri Qui-Dios je' ri ojier tak kate't-kamama', ri Abraham, ri Isaac, ri Jacob; can xu'on c'a cha ri Jesús, ri Ruc'ajuol, chi c'o ruk'ij. Pero ixre' man xivajo' ta xinimaj chi jaja' ri Ruc'ajuol ri Dios. Xa xiya' pa ruk'a' ri Pilato, ri gobernador. Y antok ri Pilato ru'e'n chic chi nucol-el, ixre' man xivajo' ta. 14Xa ja ri jun ache quimisaniel xic'utuj chi ticuol-el, y ri Santo y Choj ri ruc'aslien, xa jare' ri man xivajo' ta. 15Y can xi'an cha chi xquimisas ri Jesús ri niyo'n c'aslien. Pero ri Dios xu'on cha chi xc'astaj-pa chiquicajol ri quiminaki'. Naka'ej quire' chiva ruma ojre' can xkatz'at antok c'astajnak chic pa. 16Y ri jun ache ri ntitz'at-pa ixre' kiq'uin y ivata'n je' roch, x'an sanar, ruma pa rub'e' ri Jesús xkac'utuj-ve. Y ri ache x'an sanar chivach ixre' ruma ri cukb'al c'u'x. 17Y ojre' kata'n chi antok ixre' nuvanakil y ri achi'a' ri nquixb'ano gobernar xi'ej chi tiquimisas ri Jesús, quire' xi'an ruma man ivata'n ta chica jaja'. 18Pero ri Dios nu'on cumplir inche'l ri ru'e'n-pa. Jare' xqui'ej quinojiel ri profetas ri xa'c'ujie' ojier can tiempo, chi ri Cristo can nu'on-na-ve sufrir. 19Vacame titzalaj-pa ivánima riq'uin ri Dios y tib'ana' ri nrajo' jaja' y tic'axa' ri ic'aslien, chi quire' ni'an perdonar ri i-pecados. Y xca'pa tiempos richin uxlanien, antok ri Ajaf xtic'ujie' chi'icajol. 20Y ri Ajaf Dios xtutak-pa ri Jesucristo ruca'n mul, ri inche'l tzijuon-pa chiva. 21Pero vacame nic'atzin chi jaja' nic'ujie' chicaj, c'a xtalka-na ri k'ij antok xtuchojmij nojiel. Quire' nu'ej ri Dios chupan ri quitz'ib'an can ri santos profetas ri xa'c'ujie' ojier can tiempo. 22Ri Moisés xu'ej chica ri kate't-kamama' can: Ri Kajaf Dios xtupilisaj-pa jun profeta chiquicajol ri iviy-imáma ri xca'c'ujie' más chakavach-apa; jun inche'l inre'. Can tivaxaj nojiel ri xtu'ej chiva. 23Y ri man xca'c'axan ta ri profeta re', can xca'lasas-el richin xa jun tiempo chiquicajol ri rutanamit chic ri Dios. Quire' ri rutz'ib'an can ri Moisés. 24Y ri Pedro xu'ej je' chica ri vinak: Quinojiel ri profetas ri xa'c'ujie' ojier can tiempo desde Samuel, xa'ch'o' can chirij ri tiempo ri ojc'o vacame. 25Can ivichin ixre' ri qui'e'n can ri profetas ri xa'c'ujie' ojier can tiempo. Y can ivichin ixre' ri xu'ej ri Dios antok xu'on ri jun pacto quiq'uin ri kate't-kamama' can, antok xu'ej cha ri Abraham chi ri vinak ri ic'o choch-ulief nca'an bendecir ruma ri jun rumáma ri xtic'ujie'. 26Y antok ri Dios xupilisaj-pa ri Jesús ri Ruc'ajuol, chi'icajol ixre' xutak-ve na'ay. Quire' xu'on chi xuya' ri bendición chiva, ruma jaja' nrajo' chi ixvonojiel ntiya' can ri itziel ic'aslien.

will be added

X\