Hechos 2

1Y antok xalka ri k'ij richin ri namak'ej Pentecostés, ri quiniman ri Ajaf Jesús quimaluon-qui'. Can junan cánima quib'anun quinojiel. 2Y jun arapienta, xk'ajan-pa chicaj, y can inche'l jun nem cak'iek' ri nik'ajan patanak. Y re' altíra xu'on ri pa jay ri pache' i-tz'uyul-ve. 3Y ri ic'o chire', xquitz'at chi xa'b'a'iel-pa inche'l ruxak tak k'ak' ri xujachala-ri' y xc'ujie' pa quive' chiquijunal. 4Ri Espíritu Santo xunojsaj ri cánima, y ja xa'ch'o-ka nic'aj chic ch'ab'al, según ri xuya' ri Espíritu chica chi xa'ch'o'. 5Y ri chire' pa tanamet Jerusalén ri k'ij re', ic'o iq'uiy achi'a' israelitas ri niquiya' ruk'ij ri Dios, ri i-patanak nojiel naciones ri ic'o choch-ulief. 6Pero ruma ri xk'ajan, ri vinak xquimol-apa-qui'. Ri vinak re' can xa'chapataj, ruma chiquijunal nica'xaj ri ch'ab'al ri nca'ch'o' ijeje'. 7Can i-chapatajnak ruma ri xca'xaj, y niqui'ej chiquivach: Titz'ata', ¿man i-aj-Galilea ta c'a quinojiel la nca'ch'o' c'a? 8¿Che'l chi ojre' can nakaxaj ri niqui'ej y xa man junan ta kach'ab'al chikajunal? 9Ruma ic'o chakavach ojre' ri aj-vave' Judea, ic'o i-patanak Partia, Media, Elam, Mesopotamia, Capadocia, Ponto, Asia, 10Frigia, Panfilia, Egipto, y ic'o ri i-patanak más c'a cala choch ri tanamet Cirene, ri c'o chupan ri Africa. Ic'o je' ri i-patanak pa tanamet Roma. Y chikacajol ojre' ic'o ri i-calc'ual ri israelitas, y ic'o je' ri i-acunak israelitas ruma niquinimaj ri nu'ej ri ru-ley ri Moisés. 11Y ic'o je' ri i-patanak Creta y Arabia. Y konojiel xkaxaj pa tak kach'ab'al ri namalaj rusamaj ri Dios, xa'cha'. 12Y quinojiel xa'chapataj y man niquil ta chica niqui'an pensar y niqui'ej chiquivach: ¿Chica nrajo' nu'ej ri nib'anataj? nca'cha'. 13Pero ic'o vinak ri xa nca'tze'n-apa chiquij y niqui'ej: La xa i-k'ab'arala', nca'cha'. 14Y ri Pedro y ri once (julajuj) chic apóstoles xa'b'api'ie-pa chiquivach ri vinak. Y ri Pedro xch'o' y xu'ej: Achi'a' israelitas ri ix-patanak juviera y ixre' je' ri ixc'o vave' Jerusalén ri k'ij vacame, tivaxaj c'a ri xtin'ej chiva y tivatamaj: 15Konojiel ri kamaluon-ki' vave', man jun k'ab'ariel c'o. Man inche'l ta ri nti'an pensar ixre'. Ruma xa c'a cumaj, xa c'a ja a las nueve. 16Ri xb'anataj vacame, can tz'ib'an can ruma ri profeta Joel. 17Y chupan ri rutz'ib'an can jaja', ri Dios nu'ej: Chupan ri ruq'uisb'al tak k'ij, xtinya-pa ri Nu-Espíritu pa quive' ri vinak, y chi xtani' chi alab'o xtiquitzijuoj ri ni'ej chica. Y ri c'a i-c'ojola', chupan jun inche'l achic' xtiquitz'at ri nitzijuoj chica. Y ri i-mámix chic, pan achic' ri xtin'ej chica. 18Can xtinya' je' ri Nu-Espíritu pa quive' ri nu-siervos y ri nu-siervas chupan ri k'ij re', y ijeje' xtiquitzijuoj ri xtin'ej chica. 19Y choch ri rocaj xtin'an milagros ri man jun b'ay i-tz'atuon, y xca'n'an je' señales ri choch-ulief. Can xtin'an chi xca'tz'iet quic', k'ak', y seb' ri can inche'l mukul. 20Y ri k'ij man xtuya' ta chic rusakil. Ri ic' inche'l quic' xtu'on. Jare' ri xca'b'anataj na'ay antok maja' talka ri k'ij richin ri Ajaf, chupan ri nem k'ij antok xca'an juzgar quinojiel ri vinak. 21Y quinojiel ri xtiquic'utuj cha ri Ajaf chi ca'rucalo', can xca'colotaj-ve. 22Y ri Pedro xu'ej je': Achi'a' israelitas, tivaxaj c'a ri xtin'ej chiva: Ri Jesús ri aj-Nazaret, ja ri Dios ri b'anayuon-pa cha chi q'uiy ri xa'ru'on chi'icajol. Xa'ru'on milagros ri man jun b'ay i-tz'atuon. Y c'o je' señales xa'ru'on. Ja ri Dios xb'ano nojiel re' chi'icajol por medio jaja'. Ixre' ivata'n ja'al. 23Pero ri Dios xuya' lugar chi xjach ri Jesús pan ik'a', ruma quire' ranun-pa pensar. Y ixre' xiya' pa quik'a' itziel tak vinak chi xquiquimisaj choch cruz. 24Pero riq'uin ri ru-poder ri Dios, ri Jesús xb'ac'astaj-pa, y xcolotaj-pa pa ruk'a' ri camic, ruma ri camic man xcovin ta xutz'om richin nojiel tiempo. 25Ri David ru'e'n can chirij ri Jesús: Can siempre nitz'at chi ri Ajaf b'anak chinoch. Man jun chica xtib'ano chuva chi nixi'ij-vi', ruma c'o viq'uin pa nu-derecha. 26Y rumare' niquicuot ri vánima, y nquiquicuot je' nquich'o'. Y mesque xquicon, can vata'n chi xquic'astaj chic pa. 27Ruma atre' Nu-Dios, can man xquinaya' ta can chiquicajol ri quiminaki', man xtaya' ta je' lugar chuva inre' ri in Santo Ac'ajuol chi nik'ay ri nu-cuerpo. 28Can nac'ut ri utzulaj b'ay richin ri c'aslien chinoch, y can xtiquicuot ri vánima antok xquic'ujie' aviq'uin. Quire' ru'e'n can ri David. 29Y ri Pedro xu'ej je': Achi'a' nuvanakil, ixre' ivata'n chi ri kamama' David xcon y xmuk. Y pache' mukun-ve, c'a c'o chupan ri tiempo vacame. 30Ri David jun profeta ri xc'ujie' ojier can tiempo. Jaja' rata'n chi ri Dios can xu'on-ve jurar chi chupan ru-familia jaja' xtiel-pa ri Cristo, y jare' ri xtuoc can rey pa ruc'axiel jaja'. 31Y ri David, can inche'l ya xutz'at ri xca'b'anataj. Rumare' xch'o' y xu'ej chi ri Cristo xtic'astaj chic, y chi ri ránima man xtic'ujie' ta can chire' chiquicajol ri quiminaki', y ni ri ru-cuerpo man nik'ay ta. 32Y konojiel ojre' kata'n y nakatzijuoj chi ja ri Dios ri xb'ano chi ri Jesús xc'astaj-pa. 33Y xuc'uax je' chicaj ruma ri ru-poder ri Dios. Y xyo'x ri Espíritu Santo cha, ri ranun prometer ri Rutata' chi nuya' cha. Y antok yo'n chic ri Espíritu Santo cha, jaja' xutak-pa chika ojre', y ja yan c'a re' ri xitz'at y xivaxaj kiq'uin vacame. 34Ruma ri David man x'a ta chicaj cha'nin, y jaja' mismo rutz'ib'an can: Ri Ajaf Dios xu'ej cha ri Vajaf: Catz'uye' pa nu-derecha, 35hasta c'a xca'nya' ri av-enemigos chuxie' avakan. Quire' rutz'ib'an can ri David. 36Tivatamaj c'a ixre' ri ix rumáma can ri Israel; chi ketzij chi ri Jesús ri xiquimisaj choch cruz, ja ri Dios ri b'anayuon-pa cha chi jaja' ri Cristo y chi jaja' ri Rajaf nojiel, xcha' ri Pedro. 37Y antok ri vinak xca'xaj ri xu'ej ri Pedro, xk'axo cánima, y xquic'utuj cha ri Pedro y chica ri nic'aj chic apóstoles: Kavanakil, ¿chica naka'an? xa'cha'. 38Y ri Pedro xu'ej chica: Titzalaj-pa ivánima riq'uin ri Dios y tib'ana' ri nrajo' jaja', y pa rub'e' ri Jesucristo tib'ana' bautizar-ivi', chi quire' ni'an perdonar ri i-pecados. Y ri Dios xtuya' ri Espíritu Santo chiva. 39Ruma jare' ri ranun prometer ri Dios chi nuya' chiva ixre', y chica ri ivalc'ual, y chica quinojiel vinak ri ic'o naj; chica quinojiel ri nca'rayuoj ri Kajaf Dios. 40Y ri Pedro c'o nic'aj chic tzij ri xa'ru'ej chica. Jaja' xu'ej c'a chica ri vinak: Quixiel-pa chiquicajol ri vinak richin ri tiempo vacame, ri man choj ta nca'in choch ri Dios, chi quire' nquixcolotaj, nicha' chica. 41Y ri vinak ri xquinimaj ri ruch'ab'al ri Dios chupan ri k'ij re', xa'an bautizar y ic'o la'k jun oxe' mil vinak xa'uoc quiq'uin ri quiniman antes. 42Y man niquimalij ta quic'u'x, xa siempre niquimol-qui' chi nica'xaj ri niquic'ut ri apóstoles, xa junan cánima quib'anun, xa junan niquic'ux ri simíta chi niquinataj ri rucamic ri Ajaf Jesús, y junan je' niqui'an orar. 43Y chiquij quinojiel ri vinak xpa xib'inre'l. Y q'uiy milagros y señales ri niqui'an ri apóstoles. 44Y quinojiel ri quiniman ri Jesucristo, nicajo-qui' y junan ic'o, y niquijach chiquivach nojiel ri kax ri c'o quiq'uin. 45Y niquic'ayij ri chica c'o quiq'uin chi nca'quito' ri nic'aj chic antok nic'atzin chi nca'to'x. 46Y pa templo k'ij-k'ij niquimol-qui', y junan cánima quinojiel. Y antok niqui'an va'en pa tak jay, can riq'uin nojiel cánima y nca'quicuot. 47Y niquiya' ruk'ij ri Dios, y otz nca'tz'iet cuma ri vinak. Y k'ij-k'ij ic'o más ri nca'b'aka chupan ri iglesia, ruma ja ri Ajaf ri nib'ano chi nca'colotaj.

will be added

X\