Hechos 18

1Y después antok xb'anataj nojiel re', ri Pablo xuya' can ri tanamet Atenas, y x'a pa tanamet Corinto. 2Y chire' xril jun ache israelita rub'inan Aquila, jaja' alaxnak chupan ri lugar Ponto. Jaja' y ri Priscila ri raxjayil, xa c'aja' jub'a' tiempo ca'lka Corinto. Ijeje' i-alanak-pa Italia ruma ri Claudio ri emperador xu'on mandar chi ri vinak israelitas ca'iel-el pa tanamet Roma. Y ri Pablo x'a chiquitz'atic. 3Y ruma xa junan quisamaj ri iyoxe', ri Pablo xc'ujie-ka quiq'uin. Ri iyoxe' re' xa i-b'anoy-jay cha tziak, y junan xa'samaj. 4Y ri pa tak k'ij richin uxlanien, ri Pablo ni'a chupan ri sinagoga, nutzijuoj ri ruch'ab'al ri Dios chiquivach ri israelitas y chiquivach ri man israelitas ta. Can nutej ruk'ij quiq'uin chi niquinimaj ri ruch'ab'al ri Dios. 5Y antok ri Silas y ri Timoteo xa'tzalaj-pa Macedonia, ri Pablo can rujachuon-ri' chi nutzijuoj ri ruch'ab'al ri Dios. Y nu'ej chica ri israelitas ri ic'o chire', chi ri Jesús can ja-ve ri Cristo. 6Pero ri israelitas re' man nika ta chiquivach ri nu'ej ri Pablo, y q'uiy itziel tak tzij ri nca'qui'ej. Rumare' ri Pablo xutota' can ri rutziak, chi quire' tiquina'iej chi man otz ta ri xqui'an. Y xu'ej c'a chica: Ixre' c'o i-pecado; xa xtika pan ive' ri castigo ri xtuya' ri Dios, inre' ya xiniel choch ruma ya xintzijuoj chiva. Y vacame nquixya' can, chi nqui'a quiq'uin ri vinak ri man israelitas ta, xcha' chica. 7Y can xiel-pa ri Pablo chire' chupan ri sinagoga y x'a chirachuoch ri jun ache rub'inan Justo. Ri ache re' nuxi'ij-ri' nu'on pecado choch ri Dios, y ri rachuoch can junan c'o riq'uin ri sinagoga. 8Y ri Crispo, ri principal chire' chupan ri sinagoga, xunimaj ri Ajaf Jesucristo y quire' je' xqui'an ri ic'o pa rachuoch. Y ic'o je' iq'uiy chic vinak aj-Corinto, xquinimaj ri Jesucristo antok xca'xaj ri ruch'ab'al ri Dios. Y xa'an bautizar. 9Y ri Ajaf xch'o' cha ri Pablo chak'a' chupan jun inche'l achic', y xu'ej cha: Man taxi'ij-avi' y man catanie' chi natzijuoj ri nuch'ab'al chica ri vinak. 10Ruma inre' inc'o aviq'uin vave', y man jun c'a kax itziel xtac'ul pa quik'a' ri vinak. Ruma vave' pa tanamet Corinto iq'uiy vinak ri can i-vichin chic inre', xcha' ri Ajaf. 11Rumare' jun juna' riq'uin nic'aj xc'ujie' ri Pablo chire' Corinto, jaja' can nuc'ut ri ruch'ab'al ri Dios. 12Y chupan ri tiempo re', ja ri Galión ri gobernador chire' chupan ri Acaya, pache' c'o-ve ri tanamet Corinto. Ri tiempo re' ri israelitas xquimol-qui' chi xa'palaj chirij ri Pablo. Y xquic'uaj pa tribunal, 13y xb'aqui'ej cha ri Galión: Ri jun ache re' nu'ej chica ri vinak chi tiquiya' ruk'ij ri Dios, pero man inche'l ta nu'ej ri ley richin ri Moisés. 14Ri Pablo xrajo' xch'o-pa, pero xa ja ri Galión ri xch'o-pa na'ay y xu'ej chica ri israelitas: Man jun c'a chica ti'ej-pa chuva. Ruma xa ta camic o jun ta chic ch'o'j rub'anun va ache va, otz chi nti'ej-pa chuva. Pero xa manak. 15Ruma ri ruch'o'j ri ache re' xa chivach-ka ixre'. Xa chirij tzij, ri i-ley y ri b'i'aj Jesús. Inre' man nivajo' ta ni'an juzgar. Xa tib'ana' juzgar chivach ixre', xcha'. 16Y xa'rutarariej-pa chire' pa tribunal. 17Y ri vinak xquitz'om ri Sóstenes choch ri Galión ri c'o pa tribunal y xquich'ey. Ri Sóstenes jun principal chire' chupan ri sinagoga. Pero ri Galión can xu'on inche'l man xutz'at ta ri xqui'an cha. 18Ri Pablo q'uiy k'ij ri xc'ujie-ka chire' Corinto, después xa'ru'on can despedir ri hermanos ri ic'o chire', y x'a Cencrea chi ntuoc-el chupan jun barco chi ni'a chupan ri lugar rub'inan Siria. Y chire' Cencrea, ri Pablo xusocaj-el nojiel ri ruve', ratal chi jaja' ya xuq'uis ri ru'e'n cha ri Dios chi nu'on. Y ri Priscila y ri Aquila xa'a riq'uin. 19Y antok xa'k'ax-apa juc'an-ya', xa'b'aka chupan ri tanamet Efeso. Ri Pablo xa'ruya' can ri Priscila y ri Aquila, y jaja' x'a pa sinagoga. Y chiquivach ri israelitas nutzijuoj ri ruch'ab'al ri Jesucristo. 20Y ri israelitas re' xquic'utuj favor cha chi tic'ujie-ka más tiempo quiq'uin chire' Efeso, pero jaja' man xrajo' ta. 21Xa xu'ej c'a chica: Can nic'atzin chi nquic'ujie' Jerusalén ri k'ij richin ri namak'ej ri patanak. Pero xquitzalaj chic pa jun b'ay iviq'uin, vi xa quire' nrajo' ri Dios, xcha' chica. Y xa'ru'on can despedir quinojiel y ja xuoc chic el chupan ri barco y xuya' can ri tanamet Efeso. 22Y antok xb'aka pa tanamet Cesarea, choj x'a Jerusalén chi xiruna' saludar ri iglesia, y después x'a Antioquía. 23Y xc'ujie-ka jub'a' chire'; después xtzalaj chic jun b'ay chi nuya' ruchuk'a' cánima ri discípulos ri ic'o chupan ri lugar rub'inan Galacia, y ri ic'o je' chupan ri lugar rub'inan Frigia. 24Y chire' pa tanamet Efeso ri tiempo re', xalka jun ache israelita rub'inan Apolos, jun ache aj-tanamet Alejandría. Y can ja'al rata'n ri ruch'ab'al ri Dios ri tz'ib'an can, y ja'al rata'n nich'o' chiquivach ri vinak, rumare' ja'al rub'ixic nu'on cha. 25Y can otz c'a c'utun choch ri ruch'ab'al ri Ajaf Jesús. Y riq'uin nojiel ránima nutzijuoj ri ruch'ab'al ri Ajaf chica ri vinak. Can ja'al nuc'ut mesque jaja' xa jo'c ri bautismo richin ri Juan el Bautista rata'n. 26Y man nuxi'ij ta ri' nutzijuoj chiquivach ri vinak pa sinagoga. Y antok ri Priscila y ri Aquila xca'xaj, ijeje' xa'ch'o' riq'uin antok ruyuon c'o can, y xquic'ut choch más chirij ri ruch'ab'al ri Dios. 27Y can nrajo' jaja' chi ni'a chupan ri lugar rub'inan Acaya. Rumare' ri hermanos ri ic'o Efeso xqui'ej cha chi otz ri nu'on pensar, y xqui'an je' jun carta chi nuya' chica ri discípulos ri ic'o Acaya. Ri carta re' nu'ej chi tiquib'ana' recibir ri Apolos. Y antok ri Apolos xb'aka, altíra xuya' ruchuk'a' cánima ri ic'o chire'. Ijeje' quiniman ri Jesús ruma ri ru-favor ri Dios. 28Y ri Apolos chiquivach c'a quinojiel xu'ej chi ri israelitas ri man quiniman ta ri Jesucristo, xa man ketzij ta ri niqui'an. Ri Apolos can nucusaj ri ruch'ab'al ri Dios ri tz'ib'an can, richin nuc'ut chi ri Jesús ja ri Cristo.

will be added

X\