Hechos 14

1Y ri Pablo y ri Bernabé xa'lka c'a pa tanamet Iconio. Ijeje' xa'a c'a chupan ri qui-sinagoga ri israelitas. Y ri ruch'ab'al ri Dios ri xquitzijuoj ijeje' chica ri vinak, can xu'on c'a chi iq'uiy xquinimaj ri Jesucristo. Ic'o israelitas y ic'o ri man israelitas ta. 2Y ri israelitas ri man xquinimaj ta, itziel nca'quitz'at ri xquinimaj. Rumare' ijeje' xquiya' quino'j nic'aj chic ri man israelitas ta, chi quire' itziel ca'quitz'at ri xa'niman. 3Rumare' ri Pablo y ri Bernabé q'uiy k'ij xa'c'ujie' chire'. Y ruma quiyo'n cánima riq'uin ri Ajaf Jesucristo, man niquixi'ij ta qui' niquitzijuoj ri ru-favor ri Dios chica ri vinak. Y ri Dios nu'on chi nik'alajin chiquivach ri vinak, chi ri niqui'ej ri Pablo y ri Bernabé can ketzij. Rumare' q'uiy señales y milagros nca'qui'an. 4Rumare' ri vinak ca'ye' quib'anun. Nic'aj ic'o quiq'uin ri israelitas ri man quiniman ta, y ri nic'aj chic ic'o quiq'uin ri apóstoles. 5Y ri vinak israelitas y ri man israelitas ta y ri autoridades, xqui'ej chiquivach chi nca'quiya' pa q'uix ri Pablo y ri Bernabé y xca'quiquimisaj cha ab'aj. 6Pero ri Pablo y ri Bernabé xquina'iej nojiel ri b'anun pensar chiquij; rumare' xa'numaj c'a Listra y Derbe, ri ic'o chupan ri Licaonia, y xa'a je' nic'aj chic lugar ri ic'o-pa cierca ri ca'ye' tanamet re', 7y chire' xquitzijuoj-ve ri evangelio. 8Y chire' pa tanamet Listra, c'o jun ache tz'uyul, xa-jan antok xalax man nitiquir ta ni'in. Can man jun b'ay c'a b'ayejnak. 9Jaja' nra'xaj ri nu'ej ri Pablo. Y ri Pablo xuca'yiej pa roch ri ache re' chi rucukub'an ruc'u'x riq'uin ri Dios chi ni'an sanar. 10Rumare' ri Pablo riq'uin ruchuk'a' xch'o' cha ri ache, y xu'ej cha: Capi'ie' choj. Y ri ache xiruc'aka-pa-ri', y xpi'ie' y otz x'in. 11Antok ri vinak xquitz'at ri xu'on ri Pablo, xa'ch'o' pa Licaónica, ri quich'ab'al. Y riq'uin quichuk'a' xqui'ej: Ri nca'katz'at, can ika-dios ri i-kajnak-pa chikacajol ri quib'anun-pa i-inche'l achi'a'. 12Ijeje' niqui'ej chi ri Bernabé jare' ri qui-dios rub'inan Júpiter, y ri Pablo jare' ri qui-dios rub'inan Mercurio, ruma jaja' ri nich'o'. 13Ri Júpiter, ri qui-dios ri vinak re', c'o jun ru-sacerdote, y ri dios re' c'o ri ru-templo chuchi' ri tanamet. Ri ru-sacerdote ri Júpiter xa'ruc'am-pa váquix ri i-vakuon-pa cha cotz'e'j, c'a chuchi' ri puertas. Jaja' y ri vinak nicajo' nca'quiquimisaj ri váquix chiquivach ri Pablo y ri Bernabé chi niquiya' quik'ij. 14Pero antok ri apóstol Bernabé y ri apóstol Pablo xquina'iej ri niqui'an pensar ri vinak, xa'b'isuon-ka, y rumare' xquirak'ach'ij-ka ri quitziak chiquij. Y xa'uoc chiquicajol ri vinak, y niqui'ej chica: 15¿Karruma ixre' nti'an quire'? Ojre' oj vinak inche'l ixre', y oj-patanak iviq'uin chi naka'ej chiva chi man chic ti'an inche'l ri nti'an vacame, ruma man jun otz nuc'am-pa chiva; pa ruc'axiel re', tinimaj ri c'aslic Dios ri b'anayuon nojiel. Ri b'anayuon ri rocaj y ri ic'o choch, ri b'anayuon ri roch-ulief y ri ic'o choch, ri b'anayuon ri mar y ri ic'o chupan. 16Y mesque ri ojier can tiempo, ri Dios can xuya' lugar chica ri vinak chi xa'quic'uaj ri b'ay ri xa'ka chiquivach, 17pero jaja' can ruc'utun-pa-ri' chiquivach chi otz ruma nuya-pa ri job' ri chicaj, nuya-pa ri tico'n, y nuya-pa nojiel ri nitij, chi quire' niquicuot ri cánima. Can ruyo'n-ve-pa ri ru-favor pa kave' konojiel, xa'cha'. 18Y mesque ri Pablo y ri Bernabé xqui'ej quire' chica ri vinak re', c'arunaj xa'tiquir xa'quik'at chi man xa'quiquimisaj ta ri váquix chi niquiya' quik'ij ijeje'. 19Y chire' pa tanamet Listra ic'o israelitas ri xa'lka ri i-patanak c'a pa tanamet Antioquía y Iconio. Ijeje' xa'quitakche'j ri vinak aj-chire' y xa'covin chiquij, rumare' xquic'ak cha ab'aj ri Pablo, y xquichiririej-el y xb'aquic'aka' chuchi' ri tanamet, ruma xqui'an pensar chi ri Pablo quiminak chic. 20Y antok ri discípulos quimaluon-apa-qui' chirij ri Pablo, jaja' xa xb'api'ie-pa y xtzalaj chic pa tanamet. Y chuca'n k'ij jaja' y ri Bernabé xa'a c'a ri pa tanamet Derbe. 21Y chire' pa tanamet Derbe xquitzijuoj ri evangelio. Y iq'uiy vinak xquinimaj ri Jesús. Y después xa'tzalaj chic Listra, Iconio y Antioquía, 22y niquiya' can ruchuk'a' cánima ri discípulos, y niqui'ej can chica chi siempre tiquicukub'a' quic'u'x riq'uin ri Jesucristo. Y xqui'ej je' chica: Can q'uiy naka'an sufrir pa kac'aslien ruma nkojuoc pa ru-reino ri Dios. 23Y xa'quiya' can ancianos pa tak iglesias, y xqui'an ayuno y oración, y xa'quijach can pa ruk'a' ri Ajaf ri ya quiniman. 24Y después xa'k'ax Pisidia, y xa'lka Panfilia. 25Y xquitzijuoj ri ruch'ab'al ri Dios chire' pa tanamet Perge. Y c'ajare' xa'a ri pa tanamet Atalia. 26Y chire' Atalia xa'a chupan jun barco chi nca'tzalaj c'a pa tanamet Antioquía, ri pache' i-quijachuon-el pa ruk'a' ri Dios, chi ja ta ri ru-favor ri Dios nca'c'uan chi niquib'ana' ri samaj. Y vacame ri samaj re' ya xc'achoj can. 27Y antok ri Pablo y ri Bernabé xa'lka Antioquía, xa'quimol quinojiel ri hermanos richin ri iglesia, y xquitzijuoj nojiel ri xu'on ri Dios chica chi xa'ruto' riq'uin ri samaj, y xqui'ej chica chi ri Dios xuya' lugar chica ri vinak ri man israelitas ta, chi xquicukub'a' quic'u'x riq'uin ri Jesucristo y xa'colotaj. 28Y ri Pablo y ri Bernabé xa'c'ujie' c'a ka q'uiy k'ij quiq'uin ri discípulos ri ic'o chire' Antioquía.

will be added

X\