Hechos 12

1Chupan ri mismo tiempo re', ri rey Herodes xa'rutz'om nic'aj miembros richin ri iglesia chi niqui'an sufrir pa ruk'a'. 2Y xu'ej chi xquimisas cha espada ri Jacobo ri quichak'-quinimal-qui' riq'uin ri Juan. 3Y ruma ri Herodes xutz'at chi ri xu'on cha ri Jacobo can xka chiquivach ri israelitas ri man quiniman ta ri rutzij ri Jesucristo, rumare' xu'ej chi titz'am je' ri Pedro. Y xtz'am chupan ri namak'ej Pascua, antok nic'ux ri simíta ri manak levadura riq'uin. 4Antok tz'amuon chic ri Pedro, ri Herodes xuya' pa cárcel. Y ranun pensar chi tak'ax-na ri namak'ej Pascua, c'ajare' xtalasaj-pa chi nu'on juzgar chiquivach ri vinak, rumare' xuya' pa quik'a' icaje' grupos chajiniel chi niquichajij ri Pedro. Y i-cajcaj achi'a' ic'o chupan jujun grupo. 5Ri Pedro c'o pa cárcel y chajin otz. Pero ri iglesia ri c'o chire' pa tanamet, man nitanie' ta nu'on orar pa ru-cuenta ri Pedro. 6Y chupan ri mismo ak'a', antok ri Herodes nrajo' nralasaj-pa ri Pedro y nu'on juzgar chiquivach ri vinak, ri Pedro tz'amuon cha ca'ye' cadenas (yariena) y nivar chiquicajol ica'ye' soldados. Y chuchi' ri cárcel ic'o je' ri nca'chajin. 7Y chire' pa cárcel xalka jun ángel richin ri Ajaf, y sakil xu'on chire'. Ri ángel re' xutz'om ri ruc'alc'a'x ri Pedro chi xuc'asuoj, y xu'ej cha: Capalaj cha'nin. Y ri cadenas (yariena) ri choj cha tz'amuon-ve ruk'a' ri Pedro, xa'tzak-el. 8Y ri ángel xu'ej cha ri Pedro: Tachojmij-avi', y tacusaj ri axajab'. Y antok ruchojmin chic ri' ri Pedro, ri ángel xu'ej cha: Tab'olkotij-el ri tziak chavij, y catam-pa chuvij, xcha' ri ángel. 9Ri Pedro b'anak chirij ri ángel, pero man rata'n ta vi xa ketzij chi nicuol-el ruma ri ángel, o xa nachic'. 10Ri Pedro y ri ángel xa'k'ax chiquicajol ri na'ay grupo chajiniel y riq'uin je' ri jun chic grupo. Y antok xa'b'aka choch ri puerta ri b'anun cha ch'ich', ri c'o chuchi' ri b'ay, ri puerta re' ruyuon xjakataj chiquivach; y ijeje' xa'iel-el pa b'ay y antok ca'in jun cuadra, ri ángel xuya' can ri Pedro. 11C'ajare' ri Pedro xuna' y xu'ej: Vacame vata'n chi ri ángel can ketzij chi takuon-pa ruma ri Ajaf chi xirucol pa ruk'a' ri Herodes y choch nojiel ri canun pensar chi niqui'an chuva ri nuvanakil israelitas, xcha' ri Pedro. 12Jaja' nu'on pensar ri chica xtu'on, y antok ranun chic pensar, x'a chirachuoch ri María ri rutie' ri Juan ri ni'e'x je' Marcos cha. Y chupan ri jay re' iq'uiy quimaluon-qui' chi niqui'an orar. 13Y antok ri Pedro xuc'osc'a-apa ri puerta ri c'o chi b'ay, ja xpa jun xtan rub'inan Rode chi xalra'xaj. 14Pero antok ri xtan xra'xaj chi ja ri Pedro ri nich'o-apa, altíra xquicuot. Pero ruma altíra xquicuot, man xujak ta can ri puerta choch ri Pedro, xa jun-anin xuoc chic oc pa jay chi xb'aru'ej chi ri Pedro c'o chuchi' ri puerta. 15Pero ri quimaluon-qui' pa jay man xquinimaj ta ri nu'ej ri Rode chica. Xa xqui'ej cha ri xtan: Xa at ch'u'j, xa'cha' cha. Y ri xtan nu'ej chi ja ri Pedro ri xra'xaj jaja'. Y xqui'ej cha ri xtan: ¡Re' xa ja ri ru-ángel! xa'cha'. 16Pero ri Pedro quire' nuc'osc'a-apa ri puerta. Y antok xquijak ri puerta, xquitz'at chi ja ri Pedro. Rumare' can xa'chapataj. 17Pero jaja' xu'on seña cha ri ruk'a' chi ca'tanie-ka. Y ja xutzijuoj chica ri chica xu'on ri Ajaf Dios chi xralasaj-pa pa cárcel, y xu'ej chica chi ti'qui'ej cha ri Jacobo y chica ri nic'aj chic hermanos. Y jaja' xiel-el y x'a jun chic lugar. 18Y antok xsakar-pa ri k'ij re', ri soldados man niquil ta chica niqui'an, ruma man cata'n ta pache' x'a-ve ri Pedro. 19Y ri Herodes xutak rucanuxic ri Pedro, pero ri xa'b'acanun richin man xquil ta pa. C'ajare' ri Herodes xa'rayuoj ri achi'a' ri xa'c'ujie' ri k'ij re' chi xquichajij, y xuc'utuj chica pache' x'a-ve ri Pedro. Y ruma man jun ta'mayuon pache' x'a-ve, xu'ej chi ca'quimisas ri chajiniel re'. Y ri Herodes xiel-el Judea, y xb'ac'ujie' Cesarea. 20Ri rey Herodes can royoval c'a chiquij ri aj-Tiro y ri aj-Sidón. Pero ri aj-Tiro y ri aj-Sidón xqui'ej c'a chiquivach chi nca'a riq'uin ri Herodes. Y xquiya' miera cha ri ache Blasto, ri nichojmin ri lugar pache' nivar-ve ri Herodes, chi nca'ruc'uaj choch ri rey chi niqui'ej chi tiq'uis ri ayoval chiquivach, ruma chire' Israel ntiel-ve-el nic'aj kax ri niquitej. 21Y x'e'x ri chica k'ij niquimol-qui'. Y antok xalka ri k'ij re', ri rey Herodes can xucusaj ri tziak richin namak'ej. Xb'atz'uye' pa tribunal, y xb'ach'o-pa chiquivach ri vinak ri quimaluon-qui' chire'. 22Y ri vinak riq'uin nojiel quichuk'a' nca'siq'uin-apa, y niqui'ej: ¡La nich'o-pa, can Dios y man ache ta! 23Y chupan ri misma huora re', jun ángel richin ri Ajaf xuya' jun extraña yab'il paro' ri Herodes, ruma jaja' man xu'ej ta chica ri vinak chi man tiquiya' ruk'ij, y man xuya' ta ruk'ij ri Dios. Ri Herodes jut xa'tijo richin, y jare' ri xquimisan-el. 24Y ri ruch'ab'al ri Dios x'a c'a rutzijoxic, y chica-na lugar nitzijos-ve, y iq'uiy vinak ri niquinimaj. 25Ri Bernabé y ri Saulo xa'tzalaj c'a pa tanamet Antioquía. Ijeje' xalquiya' c'a Jerusalén nojiel ri quitakuon-pa ri aj-Antioquía. Y antok xa'tzalaj chic Antioquía, xquic'uaj ri Juan ri ni'e'x je' Marcos cha.

will be added

X\