Hechos 11

1Ri apóstoles y ri nic'aj chic hermanos ri ic'o Judea xca'xaj chi ic'o vinak ri man israelitas ta ri xquinimaj ri ruch'ab'al ri Dios. 2Rumare', antok ri Pedro xtzalaj chic Jerusalén, ri hermanos israelitas ri nca'e'n chi ti'an ri circuncisión chica quinojiel ri niquinimaj ri Jesucristo, xquich'ojij cha ri Pedro, 3y xqui'ej cha: ¿Karruma atre' xatuoc pa cachuoch ri vinak ri man niqui'an ta ri circuncisión y xava' je' quiq'uin? xa'cha' cha. 4Jare' antok ri Pedro xutz'om rutzijoxic nojiel ri xb'anataj. Jaja' xu'ej: 5Inre' pa tanamet Jope inc'o-ve. Y antok ni'an orar, xintz'at chupan jun inche'l achic', inche'l jun nem tziak ri i-ximuon-pa ri caje' rutza'n, ri patanak chicaj y nika-pa c'a viq'uin inre'. 6Y antok xintz'at, ja xintz'at chi nojiel quivach chicop ic'o-pa chupan ri jun inche'l nem tziak re'. Ic'o chicop ri caje' cakan, y ic'o chicop i-c'uxuniel, y ic'o cumatz, y ic'o chicop ri c'o quixic'. 7Y xinva'xaj chi c'o Jun ri nich'o-pa chuva, y nu'ej: Pedro, capalaj. Ca'aquimisaj ri chicop y ca'c'uxu', xcha-pa. 8Y inre' xin'ej cha ri xch'o-pa chuva: Ajaf, inre' man xca'nc'ux ta la chicop la. Inre' man jun b'ay i-nuc'uxun chicop inche'l la, ri man i-sak ta, ruma man otz ta nca'c'ux, xicha' cha. 9Pero ri Jun ri nich'o' viq'uin, xch'o' chic pa ruca'n mul chuva chicaj y xu'ej: Nojiel ri ranun sak ri Dios cha, can i-otz; man ta'ej atre' chi man i-sak ta, xinuche'x. 10Y oxe' mul quire' xb'anataj, y c'ajare' ri inche'l nem tziak xuc'uax chic el chicaj. 11C'aja' oc xintz'at inre' re', antok ic'o iyoxe' achi'a' xa'lka chuchi' ri jay pache' inc'o-ve. Ri achi'a' re' i-takuon-pa viq'uin c'a pa tanamet Cesarea i-patanak-ve. 12Y ri Espíritu Santo xu'ej chuva chi nqui'a quiq'uin y man tin'an dudar. Y ri ivaki' hermanos la xa'a c'a viq'uin. Y xojb'aka ri pa rachuoch ri Cornelio. 13Y jaja' xutz'om rutzijoxic chika chi c'o jun ángel ri xuc'ut-ri' choch pa rachuoch; y ri ángel re' xpi'ie' choch y xu'ej cha: Ca'taka-el achi'a' pa tanamet Jope chi nicayuoj ri Simón ri ni'e'x je' Pedro cha. 14Y jaja' ri xti'e'n chava ri chica xta'an chi ncacolotaj atre' y ri ic'o pan avachuoch, xuche'x can ruma ri ángel. 15Y antok inre' xintz'om chi xich'o' cha ri Cornelio y chiquivach ri vinak ri ic'o riq'uin, xka-pa ri Espíritu Santo pa quive', can inche'l antok xka-pa pa kave' ojre' na'ay. 16Y rumare' xalka pano' ri tzij ri ru'e'n can ri Ajaf Jesús, chi ri Juan cha ya' xa'ru'on-ve bautizar ri vinak. Pero ixre' riq'uin ri Espíritu Santo xquix'an-ve bautizar. Quire' ru'e'n can ri Jesús. 17Y xa ja ri Dios xyo'n ri Espíritu Santo pa quive' ri vinak re', inche'l xu'on je' chika ojre' ri kaniman ri Ajaf Jesucristo, ¿in chica ta c'a inre' chi ni'ej cha ri Dios chi man tu'on quire'? 18Y antok xca'xaj ri ic'o Jerusalén ri xu'ej ri Pedro chica, man chic xa'ch'o' ta apa, xa niquiya' ruk'ij ri Dios, y niqui'ej: ¡Ri Dios can xuya' je' lugar chica ri man israelitas ta chi nitzalaj-pa cánima riq'uin y niqui'an ri nrajo' jaja', chi niquil ri c'aslien ri man niq'uis ta! xa'cha'. 19Y ri quiquiran-el-qui' ruma ri sufrimiento ri xpa chiquij antok xquimisas ri Esteban, ic'o xa'a c'a Fenicia, Chipre, y Antioquía, y niquitzijuoj ri ruch'ab'al ri Dios jo'c chica ri israelitas. 20Pero ic'o nic'aj achi'a' aj-Chipre y aj-Cirene chiquicajol, ri xa'lka Antioquía, man jo'c ta chica ri vinak israelitas xquitzijuoj-ve ri ru-evangelio ri Ajaf Jesús, xa can xquitzijuoj je' chica ri vinak ri man israelitas ta. 21Ri ru-poder ri Ajaf Dios can c'o quiq'uin ri achi'a' re'. Rumare' can iq'uiy vinak ri xquinimaj ri Ajaf. Can xtzalaj c'a pa cánima riq'uin ri Ajaf Jesucristo. 22Y nojiel c'a re' xalka rutzijoxic riq'uin ri iglesia ri c'o pa tanamet Jerusalén, y mare' xqui'ej cha ri Bernabé chi ti'a c'a Antioquía. 23Y antok ri Bernabé xb'aka, xutz'at chi ri Dios can ruyo'n-ve ruk'a' paro' ri quisamaj; rumare' altíra xquicuot, y xa'ru'on animar chi ca'c'ujie' siempre riq'uin ri Ajaf Jesucristo riq'uin nojiel cánima. 24Ri Bernabé jun utzulaj ache, ri rucukub'an ruc'u'x riq'uin ri Dios y nojnak ránima riq'uin ri Espíritu Santo. Y iq'uiy ri vinak ri xquinimaj ri Ajaf Jesucristo. 25Después ri Bernabé x'a pa tanamet Tarso chi xirucanuj ri Saulo. Y antok xril, xuc'am-pa c'a Antioquía. 26Y jun juna' xa'c'ujie' quiq'uin ri hermanos, y xa'quitijuoj iq'uiy vinak riq'uin ri ruch'ab'al ri Dios. Y chire' c'a Antioquía ri na'ay mul x'e'x cristianos chica ri ru-discípulos ri Jesucristo. 27Y chupan ri tiempo re', ic'o nic'aj profetas ri xa'iel-el Jerusalén, y xa'a c'a Antioquía. 28Y jun chiquivach ri profetas re', rub'inan Agabo. Ri Espíritu Santo c'o xu'ej cha jaja'; rumare' xpi'ie' chiquivach ri hermanos, y xu'ej chi xtipa jun tiempo richin jun nem vi'jal ri vave' choch-ulief. Y re' xb'anataj chupan ri ru-tiempo ri emperador Claudio. 29Y rumare' ri discípulos ri ic'o Antioquía xqui'an-ka pensar chi nca'quito' ri hermanos ri ic'o Judea riq'uin ri jane' (jaro') nca'tiquir niquiya' chiquijunal. 30Y ja ri Bernabé y ri Saulo ri xa'tak-el chi xquic'uaj ri jane' (jaro') xmolotaj chi nca'quito' ri ic'o Judea. Y nojiel c'a ri quic'uan ri Bernabé y ri Saulo, xb'aquijacha' pa quik'a' ri ancianos richin ri iglesia.

will be added

X\