Hechos 10

1Y ri pa tanamet Cesarea c'o jun ache rub'inan Cornelio. Jaja' jun capitán ri ic'o cien soldados pa ruk'a', y ri soldados re' i-richin ri grupo ri ni'e'x Italiana chica. 2Ri Cornelio y ri ru-familia niquiya' ruk'ij ri Dios, y niquixi'ij-qui' niqui'an ch'o'j choch ri Dios. Y jaja' siempre nu'on orar, y nca'ruto' ri i-puobra, y nusipaj qui-miera. 3Y jun nakak'ij antok a las tres la'k, jaja' chupan jun inche'l achic' xutz'at chi c'o jun ángel richin ri Dios ri xuoc riq'uin, y xu'ej cha: Cornelio, xcha' ri ángel cha. 4Y ri Cornelio choj nutz'at ri ángel, y ruxi'in-ri'. Y xu'ej cha ri ángel: ¿Chica ri navajo', Ajaf? xcha'. Y ri ángel xu'ej cha: Ri oraciones ri nca'an, can nca'ka choch ri Dios, y nika je' choch chi c'o nasipaj chica ri vinak, y rumare' ri Dios ncanataj cha vacame. 5Mare' vacame ca'taka-el achi'a' pa tanamet Jope, chi nicayuoj ri Simón ri ni'e'x je' Pedro cha. 6Jaja' c'o pa rachuoch ri jun ache Simón je' rub'e', ri Simón ri nutzac y nuk'omaj rij chicop y ri rachuoch chuchi' ri mar c'o-ve. Y ja ri Pedro xti'e'n chava ri nic'atzin chi na'an, xcha' ri ángel cha ri Cornelio. 7Y antok x'a ri ángel ri xch'o' cha ri Cornelio, jaja' xa'rayuoj ica'ye' ru-siervos y jun soldado ri nuya' ruk'ij ri Dios je'. Ri soldado re', jare' ri can siempre c'o riq'uin ri Cornelio, y nu'on ri ni'e'x cha. 8Y ri Cornelio xutzijuoj nojiel chica, y xa'rutak-el pa tanamet Jope. 9Y chuca'n k'ij antok i-b'anak ri achi'a', y xa jub'a' chic nrajo' chi nca'b'aka pa tanamet Jope, pa nic'aj-k'ij la'k re', ri Pedro xjotie-el c'a paro' ri jay chi xb'arub'ana' orar. 10Jaja' can ninem rupan y nrajo' niva' yan. Pero antok royo'ien chi nic'achoj ri chica xtutej, ri Dios xu'on cha chi xu'on jun inche'l achic'. 11Jaja' xutz'at chi ri rocaj jakal, y nika-pa inche'l jun nem tziak, y ximuon ri caje' rutza'n. Y ri inche'l tziak re' akal nika-pa choch ri roch-ulief. 12Y antok xka-pa, ri Pedro xutz'at chi chupan ic'o-pa nojiel quivach chicop. Ic'o ri chicop ri caje' cakan, y ic'o cumatz, y ic'o ri chicop ri c'o quixic'. 13Y jare' antok ri Pedro xra'xaj chi c'o Jun ri nich'o-pa cha y nu'ej: Pedro, capalaj. Ca'aquimisaj ri chicop y ca'c'uxu'. 14Y ri Pedro xu'ej: Ajaf, inre' man xca'nc'ux ta la chicop la. Inre' man jun b'ay i-nuc'uxun chicop inche'l la, ri man i-sak ta, y ri man i-otz ta nca'c'ux, xcha'. 15Y ri nich'o-pa cha ri Pedro xu'ej chic pa cha ruca'n mul: Nojiel ri ranun sak ri Dios cha, can i-otz; man ta'ej atre' chi man i-sak ta. 16Oxe' mul quire' xb'anataj, y c'ajare' ri inche'l nem tziak xuc'uax chic el chicaj. 17Ri Pedro c'a c'o chire', y man niril ta chica nrajo' nu'ej ri inche'l achic' ri xu'on, antok ri achi'a' ri i-takuon-el ruma ri Cornelio xa'b'aka, niquic'utuj c'a ri rachuoch ri Simón rub'e'. Y antok xa'b'aka chuchi' ri jay, 18xquic'utuj-apa vi chire' c'o-ve ri Simón ri ni'e'x je' Pedro cha. 19Y ri Pedro c'a nu'on pensar chirij ri inche'l achic', antok ri Espíritu Santo xu'ej cha: Ic'o iyoxe' achi'a' ri ncatquicanuj. 20Capalaj y caka-ka, y man ta'an dudar chi nca'a quiq'uin, ruma inre' xitako-pa quichin. 21Y ri Pedro xka-pa quiq'uin ri iyoxe' achi'a' ri i-takuon-el ruma ri Cornelio, y xu'ej chica: Inre' ri Pedro. ¿Choj-uma ix-patanak ixre'? xcha'. 22Y ri achi'a' xqui'ej cha ri Pedro: Jun capitán Cornelio rub'e' oj-rutakuon-pa chi ncatalkayuoj. Jaja' jun ache choj y nuxi'ij-ri' nu'on ch'o'j choch ri Dios. Quinojiel ri vinak israelitas can nicajo' y otz nca'ch'o' chirij. Y jun santo ángel ri xalch'o' cha jaja', y ri ángel re' xu'ej can cha chi carayuoj atre' chirachuoch chi nra'xaj ri chica xta'ej cha, xa'cha' ri achi'a' ri i-takuon-el. 23Y ri Pedro xa'rucusaj-oc pa jay ri achi'a' re', y xa'c'ujie-ka riq'uin. Y chuca'n k'ij ri Pedro x'a quiq'uin c'a pa tanamet Cesarea. Y ic'o nic'aj hermanos aj-chire' pa tanamet Jope xa'a riq'uin ri Pedro. 24Y chuca'n k'ij ri ca'iel-pa, c'ajare' xa'b'aka pa tanamet Cesarea. Y ri Cornelio i-rayuon ri rach'alal y i-rayuon je' ri ru-amigos ri más nca'rajo', y quiyo'ien-apa ri Pedro. 25Y antok ri Pedro ya ntuoc-oc pa jay, ri Cornelio xiel-pa chi nu'on recibir y xxuquie' chukul rakan chi xuya' ruk'ij. 26Pero ri Pedro xupilisaj y xu'ej cha: Capi'ie'. Man caxuquie' chinoch; inre' xa in ache je' inche'l atre'. 27Ri Pedro y ri Cornelio nca'tzijuon, xa'uoc pa jay. Y jare' antok ri Pedro xutz'at chi iq'uiy vinak quimaluon-qui' chire'. 28Y jaja' xu'ej chica ri vinak re': Ixre' ivata'n chi ojre' israelitas man yo'n ta lugar chika chi naka'an xa jun iviq'uin y manak che'l nkojuoc pa tak ivachuoch je' ruma man ix israelitas ta. Pero ri Dios xuc'ut chinoch chi man otz ta ni'ej cha jun vinak chi man sak ta, ruma man israelita ta. 29Rumare', jo'c xa'b'aka ri achi'a' ri i-takuon-el chi xinb'acayuoj, man xin'ej ta chica chi man nquipa ta, xa xipa quiq'uin. Y vacame nic'utuj: ¿Karruma xinivayuoj? xcha' ri Pedro. 30Y ri Cornelio xu'ej: Pa caje' can k'ij, como cava huora a las tres ri nakak'ij, antok inre' ni'an ayuno y oración, jare' antok xuc'ut-ri' chinoch jun ache ri nich'ich'an rutziak. 31Y xu'ej chuva: Cornelio, ri Dios can otz raxan ri av-oración, y nika je' choch ri Dios chi c'o nasipaj chica ri vinak, y rumare' ncanataj cha vacame. 32Y ca'taka-el achi'a' c'a pa tanamet Jope chi nicayuoj ri Simón ri ni'e'x je' Pedro cha, ri c'o pa rachuoch jun ache ri Simón je' rub'e'. Y ri rachuoch c'o chuchi' ri mar, y nutzac y nuk'omaj rij chicop. Y antok ri Pedro xtalka aviq'uin, c'o c'a kax xtu'ej chava, xcha' chuva. 33Rumare' xintak avayoxic, y tiox b'a' chi xapa. Y choch ri Dios ojc'o-ve konojiel ri kamaluon-ki' ri vave', y nakajo' nakaxaj ri xtatzijuoj chakavach, ri ru'e'n ri Dios chava atre', xcha' ri Cornelio cha ri Pedro. 34Y ri Pedro xch'o' y xu'ej: Can ketzij ni'ka pano' (ni'an entender) vacame chi ri Dios nkojrajo' konojiel. Man jo'c ta jun nrajo'. 35Chica-na ri katanamit, ri Dios can nkojka choch konojiel xa nakaxi'ij-ki' naka'an pecado choch y xa naka'an ri choj. 36Y ri Dios can xutak-pa ri Jesucristo vave' choch-ulief, ri Jesucristo ri Cajaf quinojiel vinak, y xalrutzijuoj-ka ri evangelio, ri niyo'n paz riq'uin kánima. Y chikacajol ojre' israelitas xalrutzijuoj-ka. 37Ixre' nalka pan ive' nojiel ri xb'anataj chupan ri tiempo re' chupan nojiel Judea. Na'ay, ja ri Juan el Bautista ri xtzijuon ri ruch'ab'al ri Dios y xa'ru'on bautizar ri vinak. Después ri Jesús xutz'om-pa rutzijoxic ri ruch'ab'al ri Dios chupan Galilea. 38Ivata'n je' chi ri Jesús ri aj-Nazaret, can c'o-ve ri Espíritu Santo riq'uin, ri yo'n-pa cha ruma ri Dios, y rumare' c'o poder pa ruk'a'. Y jo'c ri otz xa'ru'on chica ri vinak. Xa'ru'on je' sanar vinak ri ic'o pa ruk'a' ri diablo. Quire' xa'ru'on ri Jesús, ruma c'o ri Dios riq'uin. 39Y nojiel ri xa'ru'on ri Jesús pa tanamet Jerusalén y nic'aj chic lugar richin ri Judea, can xkatz'at ojre' ri ru-apóstoles. Ri Jesús xb'ajix choch jun cruz chi xquimisas. Y jare' ri nakatzijuoj chiquivach ri vinak. 40Y chi oxe' k'ij, ri Dios xuc'asuoj-pa chiquicajol ri quiminaki'. Y antok c'astajnak chic pa, xu'on cha chi xuc'ut-ri'. 41Y man chiquivach ta chica-na vinak xuc'ut-ri', xa jo'c chakavach ojre' ri can ranun-pa pensar ri Dios ojier can chi nakatzijuoj chi ri Jesús xc'astaj-pa. Y junan xojva' y xkakun ya' riq'uin ri Jesús, después antok xc'astaj-pa chiquicajol ri quiminaki'. 42Y jaja' xu'on can mandar chika chi katzijuoj ri rub'e' y ka'ej chi ri Dios xu'on cha jaja' chi xuoc Juez pa quive' ri vinak ri ic'as y ri i-quiminak chic. 43Ojier can je' qui'e'n can ri profetas, chi quinojiel ri xtiquinimaj ri Cristo, can xti'an perdonar ri qui-pecados. Quire' qui'e'n can ijeje' chirij ri Jesús. 44Y c'a nitzijuon ri Pedro chiquivach ri vinak ri quimaluon-qui' pa rachuoch ri Cornelio, antok ri Espíritu Santo xka-pa pa quive' quinojiel ri nca'c'axan richin. 45Mare' ri hermanos israelitas, ri i-patanak chirij ri Pedro, xa'chapataj antok xquitz'at chi ri Espíritu Santo can xka-pa je' pa quive' ri vinak re' ri man israelitas ta. 46Ruma nca'ca'xaj ri man israelitas ta chi nca'ch'o' nic'aj chic ch'ab'al ri xuya' ri Espíritu Santo chica, y chi niquiya' je' ruk'ij ri Dios. 47Y ri Pedro xu'ej: ¿C'o came jun nib'ano impedir chi nca'an bautizar cha ya', ri xyo'x yan ri Espíritu Santo chica ruma ri Dios, inche'l ri xyo'x chika ojre'? xcha'. 48Y ri Pedro xu'ej chi ca'an bautizar pa rub'e' ri Ajaf Jesús ri Cornelio y quinojiel ri quimaluon-qui' riq'uin. Y ri xa'an bautizar, xquic'utuj favor cha ri Pedro chi tic'ujie-ka nic'aj chic k'ij quiq'uin.

will be added

X\