Hechos 1

1Chupan ri jun libro ri xintak-el chava na'ay, Teófilo, nutz'ib'an-el ri xutz'om rub'anic ri Jesús, y ri xuc'ut can chiquivach ri vinak, 2hasta c'a chupan ri k'ij antok jaja' x'a chicaj. Pero antok jaja' c'a maja' ti'a chicaj, riq'uin ri ru-poder ri Espíritu Santo xu'ej chica ri ru-apóstoles ri i-rucho'n, ri chica nic'atzin chi niqui'an can. 3Y después antok xu'on sufrir y xquimisas y antok c'astajnak chic pa, xuc'ut-ri' chiquivach cuarenta k'ij. Y c'o nic'aj chic kax ri xa'ru'on chi xquina'iej chi c'as. Y xutzijuoj je' chica chirij ri ru-reino ri Dios. 4Y jun b'ay antok ri Jesús y ri ru-apóstoles quimaluon-qui', ri Jesús xu'on mandar chica: Quixc'ujie' vave' pa tanamet Jerusalén y tivoyo'iej hasta c'a xtalka ri ranun prometer ri Nata' Dios chiva. Inche'l ri nu'e'n chiva. 5Ruma ri Juan cha ya' xa'ru'on bautizar ri vinak; pero ixre', chi jun jane' apa (jaro' apa) k'ij, riq'uin ri Espíritu Santo xquix'an bautizar, xcha' ri Jesús. 6Y ri quimaluon-qui' xquic'utuj cha ri Jesús: Ajaf, ¿na'an chi jun chikacajol ojre' israelitas nib'ano chic gobernar kichin chupan ri tiempo vacame? xa'cha' cha. 7Y ri Jesús xu'ej chica: Ja ri Dios xti'e'n jampe' xtib'anataj re', y man nic'atzin ta chi ntina'iej ixre'. 8Pero ixre' xti'an recibir poder antok ri Espíritu Santo xtika-pa pan ive', y xquinitzijuoj chiquivach ri vinak pa tanamet Jerusalén, y chiquivach ri vinak ri ic'o nic'aj chic tanamet richin ri Judea y ri Samaria, y chiquivach je' quinojiel vinak ri ic'o choch-ulief, xcha' ri Jesús. 9Y después que xu'ej ri tzij re', ri ic'o riq'uin chire', xquitz'at antok x'a chicaj y xuoc-el chupan jun mukul ri xravaj chiquivach. 10Y c'a nca'tzu'n-el chicaj antok ri Jesús x'a-el. Antok xquina', ic'o yan chic ica'ye' achi'a' quiq'uin, ri quicusan sak tziak. 11Y ri ica'ye' achi'a' re' xqui'ej chica ri ru-apóstoles ri Jesús: Achi'a' aj-Galilea, ¿karruma ixre' nquixtzu'n-el chicaj? Ri Jesús ri xitz'at chi x'a chicaj vacame, can inche'l xu'on chi x'a, can quire' je' xtu'on antok xtipa chic jun b'ay, xa'cha' chica. 12Y ri apóstoles xa'iel-pa chire' paro' ri juyu' rub'inan Olivos, y xa'tzalaj pa tanamet Jerusalén. Ri juyu' Olivos cierca c'o-ve riq'uin ri Jerusalén, xa jo'c la'k jun kilómetro. 13Y antok xa'lka, xa'jotie-el ruca'n piso ri jay ri pache' niquimol-ve-qui' ri Pedro, ri Jacobo, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo ri ruc'ajuol ri Alfeo, ri Simón ri c'o quiq'uin ri achi'a' ri ni'e'x Zelotes chica, y ri Judas ri quichak'-quinimal-qui' riq'uin ri Jacobo. 14Y quinojiel ijeje' junan cánima y siempre niqui'an orar. Ic'o je' ixoki', y ri María je' ri rutie' ri Jesús, y ri i-ruchak' ri Jesús. 15Y jun k'ij antok quimaluon-qui' jun la'k ciento veinte hermanos, ri Pedro xb'api'ie-pa chiquicajol y xu'ej chica: 16Hermanos, can xc'atzin chi nu'on cumplir ri ruch'ab'al ri Dios ri xuya' ri Espíritu Santo cha ri David, antok xu'ej chirij ri Judas ri xuc'uan quichin ri vinak chi xb'aquitz'ama' ri Jesús. 17Y ri Judas re' xuoc kach'il, y xsamaj je' kiq'uin. 18Y riq'uin ri miera ri xyo'x cha ruma xujach ri Jesús, xluok' jun ulief. Ri Judas xuquimisaj-ri'. Jaja' xtzak-pa pan ulief y ja ri rujaluon xutic, xb'uos ri rupan, y nojiel xpichcan pan ulief. 19Y antok xb'anataj re', quinojiel ri vinak aj-Jerusalén xquina'iej, y rumare' Acéldama x'e'x cha ri ulief re'. Ri tzij Acéldama pa quich'ab'al ijeje' nu'ej, Ulief richin Quic'. 20Quire' xb'anataj, ruma chupan ri libro rub'inan Salmos b'e'n can: Xa tiyo'x can ri rachuoch y man jun vinak tic'ujie' chupan. Y nu'ej je': Jun chic tuoc pa ruc'axiel chi nu'on ri rusamaj. Quire' nu'ej ri b'e'n can. 21Rumare' nic'atzin chi nakacanuj jun ruc'axiel, pero chiquicajol ri achi'a' ri nojiel tiempo ic'o kiq'uin y can i-b'anak kiq'uin antok xc'ujie' ri Ajaf Jesús. 22Nitz'ucutaj-pa antok x'an bautizar ri Jesús ruma ri Juan, hasta c'a antok x'a chicaj, y xiel-el chikacajol. Nic'atzin chi nutzijuoj junan kiq'uin ojre' chi ri Jesús xc'astaj-pa chiquicajol ri quiminaki', xcha' ri Pedro. 23Y xquiya-apa ca'ye' b'i'aj: Jun, ja ri José ri ni'e'x Barsabás cha y ni'e'x je' Justo cha, y ri jun chic, ja ri Matías. 24Y xqui'an orar, y quire' xqui'ej: Ajaf, atre' ri natz'at ri kánima konojiel, tac'utu' chakavach chica chiquivach ri ica'ye' achi'a' re' ri xacha', 25chi ntuoc can apóstol pa ruc'axiel ri Judas y nu'on ri samaj. Ruma ri Judas xa xuya' can ri samaj, ruma ri itziel ri xu'on. Y vacame jaja' ya xb'aka chupan ri lugar ri pache' chi nib'aka-ve, xa'cha'. 26Entonces xqui'an sortear ri quib'e' ri ica'ye' chi chica xtic'ujie' pa ruc'axiel ri Judas chi ntuoc cach'il ri once (julajuj) apóstoles. Y ja ri Matías ri xch'acuon.

will be added

X\