2 Timoteo 4

1Choch ri Dios y ri Ajaf Jesucristo ri xtipa chic jun b'ay, chi xtalrub'ana' reinar y xca'ru'on juzgar ri ic'as y ri i-quiminak chic el, ni'ej c'a chava Timoteo, 2chi pak'ij chi chak'a' tatzijuoj ri ruch'ab'al ri Dios chica ri nicajo' nica'xaj y chica ri man nicajo' ta nica'xaj. Ta'ej chica ri niqui'an ri man otz ta chi tiquib'ana' ri otz, ta'ej chica ri quic'uan jun c'aslien itziel chi tiquic'axa' ri quic'aslien. Y ca'ch'olij y ca'tijuoj quinojiel riq'uin nojiel paciencia. 3Ruma xtalka ri k'ij antok ri vinak xa man xticajo' ta chic nica'xaj ri utzulaj tak ch'ab'al ri nca'c'ut. Xa más xtiquirayij chi nica'xaj ri tzij ri man i-ketzij ta ri nca'c'ut, y xca'quicanuj chica xca'tijuon quichin jo'c riq'uin ri nca'quirayij ijeje'. 4Xa man xticajo' ta chic xtica'xaj ri ruch'ab'al ri Dios, ruma xa ja yan chic ri tzij ri choj i-maluon-ka ri xtica'xaj. 5Pero atre' tab'ana' pensar otz nojiel ri na'an. Tacach'o' ri sufrimiento ri nipa chavij. Man catanie' chi natzijuoj ri evangelio. Tab'ana' nojiel ri samaj ri yo'n chava ruma ri Dios. 6Ruma inre' jo'c chic voyo'ien ri k'ij chi nquiquimisas. Ri k'ij chi nqui'a y niya' can ri roch-ulief, can cierca chic c'o-ve. 7Can xintej nuk'ij xin'an ri nrajo' ri Dios, y xin'an nojiel ri samaj ri xuya' chuva, y siempre nucukub'an nuc'u'x riq'uin jaja'. 8Y rumare' vacame jo'c chic voyo'ien ri k'ij chi nqui'a chicaj pache' yacuon-ve jun corona vichin, ruma xinvuc'uaj jun c'aslien choj. Y ja ri Ajaf ri Utzulaj Juez xtiyo'n re' chuva, y man jo'c ta chuva inre' xtuya-ve. Xa can xtuya' je' chica quinojiel ri can riq'uin nojiel cánima quiyo'ien chi nalka ri k'ij antok xtipa chic jun b'ay jaja'. 9Atre' Timoteo, tatija' ak'ij chi ncapa vave' viq'uin cha'nin, 10ruma ri Demas x'a pa tanamet Tesalónica. Xiruya' can, ruma jaja' xa más xrajo' ri c'aslien ri vave' choch-ulief. Ri hermano Crescente b'anak pa tak tanamet ri ic'o chupan ri Galacia. Y ri hermano Tito b'anak je' pa tak tanamet ri ic'o chupan ri Dalmacia. 11Y vacame jo'c ri hermano Lucas ri c'o can viq'uin. Tac'ama-pa ri hermano Marcos antok xcapa, ruma jaja' nic'atzin chuva chi nquiruto' riq'uin ri samaj. 12Ri hermano Tíquico xintak-el pa tanamet Efeso. 13Antok xcapa, tac'ama-pa je' ri nu-capa ri xinya' can pa rachuoch ri hermano Carpo pa tanamet Troas. Y ca'c'ama-pa je' ri nu-libros; y ri más nivajo' ja ri i-tz'ib'an choch tz'un, ri ni'e'x pergamino cha. 14Ri Alejandro ri herrero, q'uiy itziel tak kax rub'anun chuva. Ja ri Ajaf ri xtiyo'n ruc'axiel cha riq'uin ri nca'ru'on. 15Rumare' atre', tab'ana' cuenta-avi' choch, ruma choch jaja' altíra itziel ri ruch'ab'al ri Dios ri nakatzijuoj ojre'. 16Antok na'ay xinuc'uax pa tribunal, man jun xc'ujie' viq'uin. Pero man nivajo' ta chi ri Dios xtuya' ta ruc'axiel chica ri xinquiya' can nuyuon. 17Pero ri Ajaf can c'o viq'uin. Xuya' vuchuk'a' y xirucol-pa pa ruchi' ri león (coj). Y rumare' xitiquir xinq'uis chi xintzijuoj ri ruch'ab'al chica quinojiel ri vinak ri man israelitas ta. 18Y inre' vata'n chi ri Ajaf xquirucol choch nojiel itziel. Vata'n chi xquiruchajij chi quire' xquinuoc pa ru-reino chila chicaj. Jaja' can tiyo'x ruk'ij richin nojiel tiempo. Amén. 19Taya' jun saludo cha ri hermana Priscila y cha ri hermano Aquila, y quinojiel je' ri ic'o pa rachuoch ri hermano Onesíforo. 20Ri hermano Erasto xc'ujie' can pa tanamet Corinto, y ri hermano Trófimo xinya' can pa tanamet Mileto ruma niyavaj. 21Y atre' Timoteo, tatija' ak'ij chi ncapa vave' viq'uin antes ri ru-tiempo job'. Ri hermano Eubulo nutak-el jun saludo chava, y ri Pudente, ri Lino, ri Claudia, y quinojiel ri hermanos vave' niquitak-el je' jun saludo chava. 22Ri Ajaf Jesucristo tic'ujie' pan avánima. Ja ta ri ru-favor ri Dios tic'ujie' iviq'uin ri ixc'o chire'. Amén.

will be added

X\