2 Timoteo 3

1Nic'atzin chi navatamaj chi chupan ri ruq'uisb'al tak k'ij, xtipa tiempo ri altíra cuesta chi navuc'uaj jun c'aslien otz choch-ulief. 2Ruma xca'c'ujie' iq'uiy vinak ri altíra xticajo-qui' ijeje' mismo y man jun nquinataj chica ri nic'aj chic, ri xti'a cánima chirij ri miera, ri xtiquina' chi i-nima'k, xtiqui'an chi c'o quik'ij, ri itziel xca'ch'o' chirij ri Dios, ri man xca'niman ta chica ri quitie-quitata', ri man cata'n ta niquiya' tiox b'a' y man nicajo' ta ri Dios. 3Ijeje' man xtiquijoyovaj ta quivach ri vinak, ni man xca'cach'uon ta jub'a', xtiquik'ab'aj tzij chiquij nic'aj chic, man niquik'il ta qui' chi niqui'an pecado, can xtak'ax ruve' ri niqui'an chica ri nic'aj chic vinak, man xticajo' ta ri otz. 4Ijeje' xca'quisujuj ri qui-amigos, man xtiqui'an ta pensar jub'a' ri niqui'an. Can i-nima'k tak vinak xtiquina-qui'. Más xca'quicuot riq'uin ri niqui'an choch-ulief, que choch chi xticajo' ri Dios. 5Ijeje' xtiqui'ej chi quiniman chic ri Dios, pero xa man xtiquiya' ta lugar cha ri Dios chi nuc'ax ri quic'aslien. Man c'a tayuj-avi' quiq'uin ri nca'b'ano quire'. 6Ruma chiquicajol ijeje' ic'o ri nca'b'aka pa tak jay y niquic'ut ri man ketzij ta. Y ja ri nacanak tak ixoki' ri nca'ka pa quik'a', ixoki' ri i-nojnak riq'uin pecado, y ri i-c'uayuon ruma ri niquirayij. 7Ri ixoki' re' siempre nicajo' nicatamaj nic'aj chic kax, pero man jun b'ay nicatamaj ri ketzij. 8Y inche'l xqui'an ri Janes y ri Jambres ri ojier can, chi man xka ta chiquivach ri xu'ej ri Moisés, quire' je' niqui'an ri achi'a' re', man nicajo' ta ri ketzij. Can c'axtajnak ri quino'j ruma ri itziel. Can k'alaj chi man cukul ta quic'u'x riq'uin ri Dios. 9Pero xtalka ri tiempo antok man xca'nimax ta chic, ruma xca'na'ax cuma quinojiel, chi xa i-nacanak riq'uin ri niquic'ut; inche'l xb'anataj quiq'uin ri Janes y ri Jambres ri ojier can. 10Pero atre' Timoteo, animan ri nuc'utun can chavach. Atre' avata'n chi ri nuc'aslien, can otz choch ri Dios. Avata'n chi inre' nquinajin riq'uin nojiel ri e'n chuva ruma ri Dios. Avata'n chi nucukub'an nuc'u'x riq'uin ri Dios, man nuc'akuon ta nuc'u'x, c'o nu-paciencia, y nca'nvajo' quinojiel. 11Nuk'asan-pa sufrimiento pa quik'a' ri vinak. Nojiel re' nucach'uon-pa. Y avata'n je' nojiel ri x'an chuva chupan ri oxe' tanamet, ri Antioquía, ri Iconio, y ri Listra. Altíra xin'an sufrir pa quik'a'. Pero chupan nojiel re' ri Ajaf can xirucol. 12Y can ketzij chi quinojiel ri nicajo' niquic'uaj jun c'aslien ri nika choch ri Jesucristo, can xtiqui'an sufrir pa quik'a' nic'aj chic. 13Pero ri vinak ri quic'uan jun itziel c'aslien y ri nca'qui'an maña chica ri vinak, más itziel xtiqui'an-ka. Xca'qui'an maña chica ri vinak, y ijeje' je' xti'an maña chica. 14Pero atre' Timoteo, man taya' can ri xavatamaj y ayo'n avánima riq'uin. Atre' avata'n ja'al ri choj-iq'uin xavatamaj-ve. 15Y c'a at ac'ual antok xavatamaj-pa ri tz'ib'an can chupan ri santo ruch'ab'al ri Dios. Y ri ch'ab'al re' xuya' ano'j chi xacukub'a' ac'u'x riq'uin ri Cristo Jesús chi xacolotaj chupan ri a-pecado. 16Nojiel ri tz'ib'an can chupan ri ruch'ab'al ri Dios, ja ri Dios b'iyuon-pa. Y rumare' otz chi nicusas chi nca'tijox ri vinak. Otz chi nicusas chi ni'e'x ri pecado. Otz chi nicusas chi nca'ch'olix ri man otz ta niqui'an, y otz je' nicusas chi nic'ut chica rub'anic jun c'aslien choj choch ri Dios. 17Chi quire' ri i-rusamajiel ri Dios, can otz tic'ujie' quino'j riq'uin ri i-tz'ib'an can. Chi quire' i-preparados chi niqui'an nojiel utzulaj samaj.

will be added

X\