1 Ni'ej chava Timoteo ri can at inche'l nuc'ajuol: Tatija' ak'ij chi siempre nic'ujie' avuchuk'a' riq'uin ri favor ri patanak riq'uin ri Cristo Jesús. 2 Ri tzij ri xavaxaj antok xin'ej chava chiquivach iq'uiy hermanos, jare' ta'ej je' atre' chica nic'aj chic hermanos ri nca'tiquir nca'quitijuoj nic'aj chic y chi can xtiqui'an ri samaj. 3 Can tacach'o' ri sufrimiento ruma at jun utzulaj ru-soldado ri Jesucristo. 4 Ruma antok jun c'o pa cuartel, man xtiel ta pa chi niruna' jun chic samaj, nic'ujie' chire' chi quire' nu'on nojiel ri ni'e'x cha ruma ri nib'ano mandar richin. 5 Atre' can otz tab'ana' cha ri rusamaj ri Dios, can tab'ana' inche'l niqui'an ri niqui'an participar chupan jun competencia. Xa ijeje' man niquitej ta quik'ij y man niqui'an ta inche'l nrajo' ri competencia, man xca'ch'acuon ta. 6 Inche'l nu'on jun aj-samajiel pan avan; jaja' chi niril otz cosecha, nic'atzin chi jaja' nisamaj na'ay. 7 Tab'ana' pensar otz nojiel re', y ri Ajaf xtu'on chava chi xti'ka pan ave' otz (xta'an entender otz). 8 Talka pan ave' chi ri Jesucristo xcon y xc'astaj-pa chiquicajol ri quiminaki'. Jaja' jun rumáma can ri rey David ri xc'ujie' ojier can. Y jare' ri evangelio ri nitzijuoj. 9 Y ruma nitzijuoj ri evangelio, ni'an sufrir. Inre' inc'o vave' pa cárcel y b'anun chuva inche'l in itziel ache. Pero ri ruch'ab'al ri Dios man c'o ta pa cárcel. 10 Y ruma nca'nvajo' ri i-cho'n chic ruma ri Dios, inre' nicoch' nojiel sufrimientos; chi quire' ijeje' je' nca'colotaj ruma ri Cristo Jesús, y nca'a chicaj y nic'ujie' quik'ij richin nojiel tiempo. 11 Ri tzij va can ketzij-ve: Ojre' ri kaniman chic ri Jesucristo, can inche'l xojcon riq'uin jaja' antok xcon choch cruz, y rumare' xkojb'ac'asie' je' riq'uin jaja', ruma jaja' can c'as-ve. 12 Xa xtakacoch' ri sufrimientos ruma kaniman jaja', xtalka ri k'ij antok junan xtaka'an gobernar riq'uin jaja'. Y xa man xtakajo' ta xtaka'ej chi oj richin chic jaja', jaja' je' xtu'ej chi ojre' man oj richin ta jaja'. 13 Y mesque ojre' man oj choj ta riq'uin, jaja' can choj kiq'uin ojre'. Jaja' man nuc'ax ta ri'. 14 Rumare' tanataj nojiel re' chica ri hermanos. Y ta'ej chica pa rub'e' ri Ajaf Dios chi man tiqui'an ayoval chirij tzij ri man jun quikalien, ruma xa man jun otz nuc'am-pa chica. Xa nuc'ax quino'j ri nca'c'axan quichin. 15 Can tatija' ak'ij chi otz na'an cha ri rusamaj ri Dios inche'l nika choch jaja', chi quire' man xcaq'uix ta chi otz natzijuoj ri ruch'ab'al ri Dios ri ketzij. 16 Man c'a tavaxaj ri tzij ri xa man riq'uin ta ri Dios i-patanak-ve, ri xa i-richin ri roch-ulief y man jun nca'c'atzin-ve. Ruma ri nca'quinimaj ri tzij re', xa más itziel nu'on-ka ri quic'aslien. 17 Y ri tzij re' nuquimisaj ri cánima, inche'l nu'on ri itziel yab'il ri nik'ay-ka ri ru-cuerpo jun vinak. Quire' niqui'an ri Himeneo y ri Fileto. 18 Ijeje' xquiya' can ri ketzij, ruma niqui'ej chi ri quiminaki' ya xa'c'astaj. Y rumare' ic'o nic'aj ri man nicajo' ta chic niquicukub'a' quic'u'x riq'uin ri Dios. 19 Pero ri Dios rub'anun c'a chika ojre' ri kacukub'an kac'u'x riq'uin ri Jesucristo inche'l ru-cimiento jun jay ri otz b'anun cha. Y paro' ri cimiento re', nu'ej: Ri Ajaf rata'n quivach ri i-richin chic jaja'. Y quinojiel ri nca'yo'n ruk'ij ri rub'e' ri Ajaf, ca'iel-el chupan ri itziel tak kax. 20 Chupan jun nem jay q'uiy trastos ic'o. Ic'o ri i-b'anun cha oro, ri i-b'anun cha plata, ri i-b'anun cha chie', y ri i-b'anun cha barro. Ic'o nca'cusas richin kax otz, y ic'o nca'cusas richin kax ri man otz ta. 21 Y xa ojre' xtakaya' can nojiel ri itziel tak kax, can oj inche'l ri trastos ri nca'cusas richin kax otz, oj-cho'n chic ruma ri Ajaf, y nkojc'atzin cha chi naka'an nojiel utzulaj samaj. 22 Y ruma ri c'ajola' q'uiy itziel tak kax niquirayij, atre' man ta'an inche'l niqui'an ijeje', xa can tatija' ak'ij chi tavuc'uaj jun choj c'aslien, can tacukub'a' ac'u'x riq'uin ri Dios, ca'vajo' quinojiel y tic'ujie' ri paz quiq'uin ri nic'aj chic ri riq'uin jun sak cánima nca'ch'o' riq'uin ri Ajaf. 23 Man c'a tavaxaj ri tzij ri man jun nca'c'atzin-ve y man jun kax nach'ec chiquij, ruma ri tzij inche'l re' niquic'am-pa ayoval. 24 Ruma jun ru-siervo ri Ajaf Dios, man otz ta nu'on ayoval. Can nic'atzin chi otz runo'j nu'on quiq'uin quinojiel. Y nic'atzin je' chi nicovin nca'rutijuoj otz ri hermanos, y nucoch' ri ni'an cha, 25 y akal tich'o' chica ri vinak ri man otz ta niqui'an pensar chirij ri ruch'ab'al ri Dios, chi tiquic'axa' quino'j. Chi quire', xa ri Dios nrajo', can xtu'on chica chi xtitzalaj-pa cánima riq'uin ri Dios y xtiqui'an ri nrajo' y xticatamaj ri ketzij, 26 y quire' xca'colotaj pa ruk'a' ri diablo. Ruma vacame pa ruk'a' jaja' ic'o-ve, y nu'on chica chi niqui'an ri nrajo' jaja'.
