2 Timoteo 1

1Inre' Pablo, in ru-apóstol ri Jesucristo ruma quire' nrajo' ri Dios chi nitzijuoj chica ri vinak chi ri Dios nuya' ri c'aslien ri ranun prometer chica ri vinak ri niquiya' cánima riq'uin ri Cristo Jesús. 2Nitz'ib'aj-el va carta va chava atre' Timoteo, ri can at inche'l nuc'ajuol y altíra ncanvajo'. Ja ta ri favor, ri misericordia y ri paz ri nuya' ri Katata' Dios y ri Kajaf Jesucristo tic'ujie' riq'uin avánima. 3Inre' Pablo niya' tiox b'a' cha ri Dios, cha ri Dios ri ni'an rusamaj riq'uin jun sak vánima, inche'l xqui'an ri vate't-numama'. Y can ncanataj c'a chuva y rumare' pak'ij chi chak'a' ni'an orar pan a-cuenta. 4Y ni'ej je' chava atre' Timoteo chi atc'o riq'uin vánima ruma xinavok'iej antok xiniel-pa aviq'uin. Y nivajo' nquinalka chic jun b'ay aviq'uin chi quire' niquicuot chic jun b'ay ri vánima. 5Y nalka je' pano' chi ketzij acukub'an ac'u'x riq'uin ri Dios, inche'l ri xqui'an ri avate't Loida y ri atie' Eunice. Ijeje' ri xquicukub'a' quic'u'x riq'uin ri Dios na'ay chavach atre'. Y inre' vata'n chi atre' je' ketzij acukub'an ac'u'x riq'uin ri Dios. 6Rumare' ni'ej chava chi taya' avuchuk'a', man tichup-ka chi na'an ri samaj ri rusipan ri Dios chava, ri xyo'x chava antok inre' xinya' nuk'a' pan ave'. 7Y ri Espíritu ri ruyo'n ri Dios chika ojre' ri kaniman chic jaja', man richin ta chi nakaxi'ij-ki'. Xa nuya' poder chika, y nu'on chika chi nca'kajo' quinojiel ri vinak y nu'on chika chi nkojtiquir nakak'il-ki' chi man naka'an ta pecar-ki'. 8Man caq'uix chi natzijuoj ri ruch'ab'al ri Kajaf. Ni man caq'uix je' na'ej chi avata'n noch inre', mesque inc'o pa cárcel ruma ri Kajaf. Y man tac'akuoj ac'u'x atre' chupan ri sufrimiento ruma natzijuoj ri evangelio. Xa tacach'o' nojiel riq'uin ri poder ri yo'n chava ruma ri Dios. 9Ri Dios xojrucol chupan ri ka-pecados, y xojrayuoj chi nakuc'uaj jun sak c'aslien. Y nojiel ri xu'on man ruma ta chi c'o otz i-kab'anun, xa ruma ri ru-favor, y ruma je' quire' ranun-pa pensar chikij ojier can tiempo antok maja' c'o ri roch-ulief. Ri Dios can ranun-pa pensar chi nutak-pa ri Jesucristo chi nu'on ri favor chika chi nkojrucol. 10Y vacame xalka ri Jesucristo ri nicalo kichin. Jaja' xralasaj ri ru-poder ri camic. Jaja' xuc'ut chakavach ri evangelio, y riq'uin re' xuc'ut chakavach ri c'aslien ri man niq'uis ta. 11Ri Dios xirucha' inre' chi nitzijuoj ri ruch'ab'al, y chi xinuoc apóstol y maestro quichin ri vinak ri man israelitas ta. 12Rumare' ni'an sufrir vacame. Pero man nquiq'uix ta; ruma inre' vata'n ri chica nuniman y vata'n je' chi jaja' c'o ru-poder chi nquiruchajij y nujachuon-vi' pa ruk'a' c'a xtalka-na ri k'ij antok xtipa chic jaja'. 13Inre' ni'ej chava Timoteo chi inche'l ri utzulaj tak kax ri nuc'utun chavach, jare' tac'utu' atre'. Can tik'alajin c'a chi acukub'an ac'u'x riq'uin ri Jesucristo, y siempre ca'vajo' quinojiel ruma jo'c jun ab'anun riq'uin ri Jesucristo. 14Tab'ana' cuenta ri samaj ri yo'n chava ruma ri Dios. Y ri Espíritu Santo ri c'o riq'uin kánima xtito'n avichin. 15Atre' avata'n chi quinojiel ri hermanos ri ic'o pa tak tanamet ri ic'o Asia in-quiyo'n chic can, inche'l ri Figelo y ri Hermógenes. 16Ri Ajaf tujoyovaj quivach ri ic'o pa rachuoch ri hermano Onesíforo, ruma q'uiy mul xuya' ruchuk'a' vánima. Jaja' man xq'uix ta xinalrutz'ata' vave' pa cárcel. 17Ruma antok xalka vave' pa tanamet Roma, can xirucanuj y c'arunaj xiril. 18Y atre' avata'n otz chi jaja' altíra xojruto' antok xojc'ujie' aviq'uin pa tanamet Efeso. Ri Ajaf tujoyovaj roch chupan ri k'ij antok xtipa chic jun b'ay.

will be added

X\