2 Thessalonians 3

1Pa ruq'uisb'al hermanos, naka'ej chiva chi tib'ana' orar pa ka-cuenta y tic'utuj cha ri Dios chi cha'nin ta xti'in rutzijoxic ri ruch'ab'al ri Ajaf y xtiyo'x ruk'ij, inche'l xu'on iviq'uin, 2y chi quire' je' man nkojka ta pa quik'a' itziel tak achi'a', ruma man quinojiel ta vinak niquicukub'a' quic'u'x riq'uin ri Jesucristo. 3Pero ri Ajaf man jun b'ay xquixruya' can, xa xtuya' ivuchuk'a' y xquixruchajij choch ri itziel. 4Y ojre' can kacukub'an kac'u'x riq'uin ri Ajaf chi ixre' nti'an ri xka'ej can chiva y siempre quire' xti'an. 5Ri Ajaf tub'ana' c'a chiva chi can xtina' riq'uin ivánima chi ri Dios altíra nquixrajo', y chi nic'ujie' i-paciencia inche'l xu'on ri Cristo. 6Hermanos, naka'ej chiva pa rub'e' ri Kajaf Jesucristo chi xa c'o jun hermano chicajol ri man nrajo' ta nisamaj chi nuch'ec ruvay y man nu'on ta ri xka'ej chiva, man tivuc'uaj-ivi' riq'uin. 7Ruma ixre' ja'al ivata'n ri chica xka'an antok xojc'ujie' iviq'uin. Ojre' can pa ruchojmil xkuc'uaj ri kac'aslien chicajol. Y inche'l ri xka'an ojre', quire' je' tib'ana' ixre'. 8Ojre' xkatoj nojiel ri xkatej. Altíra xojcuos, ruma pak'ij chi chak'a' xojsamaj, ruma man xkajo' ta xkaya' jun aka'n chivij. 9Xa ta xkac'utuj kavay chiva, can otz ta, ruma can rusamaj ri Dios xka'an chicajol. Pero man jun xkac'utuj, ruma xa xojsamaj chi xkach'ec kavay, chi xkac'ut chivach chi quire' je' tib'ana' ixre'. 10Y antok xojc'ujie' iviq'uin, xka'ej chiva: Xa c'o jun ri man nrajo' ta nisamaj, man tiva' je', xojcha' chiva. 11Y ojre' kaxan chi chire' chicajol, ic'o ri man nicajo' ta nca'samaj, y jo'c tzij niqui'an y niquiju-qui' pache' na, mesque man quiq'uin ta ijeje'. 12Chica ijeje' naka'ej, y can pa rub'e' ri Ajaf Jesucristo naka'ej chica chi ca'samaj, man tiquich'ujirisaj-qui' y akal ca'samaj chi niquich'ec quivay. 13Y ixre' hermanos, man quixcuos c'a nti'an ri otz. 14Xa c'o jun ri man nrajo' ta nu'on ri ya xka'ej chupan va carta va, tib'ana' señalar chica re', y man tivuc'uaj-ivi' je' riq'uin, chi quire' tiq'uix. 15Pero man ti'an cha chi jun iv-enemigo, xa tich'olij, ruma jaja' jun hermano. 16Hermanos, ri Ajaf ri niyo'n paz, tuya' paz riq'uin ivánima ixre', y siempre tic'ujie' ri paz iviq'uin chupan nojiel ri ntik'asaj. Ri Ajaf tic'ujie' iviq'uin ixvonojiel. 17Inre' Pablo riq'uin nuk'a' nitz'ib'aj-el va saludo va. Y titz'ata' c'a chi vichin inre' va carta va, ruma quire' nquitz'ib'an inre', y quire' ni'an chica ri cartas ri nca'ntak-el inre'. 18Ja ta ri ru-favor ri Kajaf Jesucristo tic'ujie' iviq'uin chi'ixvonojiel. Amén.

will be added

X\