2 Thessalonians 1

1Inre' Pablo, ri Silvano y ri Timoteo, nakatak-el va carta va chiva ixre' ri iglesia ri c'o Tesalónica. Ixre' jo'c jun ib'anun riq'uin ri Katata' Dios y ri Ajaf Jesucristo. 2Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 3Hermanos, siempre nakaya' tiox b'a' cha ri Dios ivuma ixre'. Y can rakalien nakaya' tiox b'a' cha, ruma ixre' k'ij-k'ij icukub'an más ic'u'x riq'uin ri Dios y k'ij-k'ij más ntivajo-ivi'. 4Y antok ojre' nkub'aka nic'aj chic iglesias, nakatzijuoj chica chi altíra niquicuot kánima iviq'uin ixre', ruma mesque c'o sufrimientos ik'asan y q'uiy kax ic'ulun, can icach'uon nojiel y can icukub'an ic'u'x riq'uin ri Dios. 5Riq'uin re' nik'alajin chi ri Dios can choj-ve nu'on juzgar nojiel. Y nuc'ut chi rakalien chi nquixuoc pa ru-reino ri Dios, mare' nti'an sufrir vacame. 6Ri Dios can choj-ve nu'on juzgar nojiel, rumare' jaja' xca'ru'on castigar ri vinak ri nca'b'ano chiva chi nti'an sufrir. 7Y chiva ixre' ri nti'an sufrir vacame, can xtuya' ri uxlanien. Chika ojre' je' xtuya' ri uxlanien re', chupan ri k'ij antok ri Ajaf Jesús xtika-pa chicaj i-rich'ilan-pa ri ru-ángeles ri yo'n chic pa poder chica. 8Chupan jun ruxak-k'ak' xtipa chi nca'ru'on castigar ri man xquinimaj ta ri Dios y man xquinimaj ta je' ri ru-evangelio ri Kajaf Jesucristo. 9Ri castigo ri xtiyo'x chica, can nem-ve y can richin nojiel tiempo xca'c'ujie' chupan. Can man xca'c'ujie' ta apa riq'uin ri Ajaf ri c'o ru-gloria y c'o ru-poder, 10chupan ri k'ij antok xtipa. Antok jaja' xtipa, quinojiel ri santos ralc'ual xtiquiya' ruk'ij. Y quire' je' xti'an ixre', can xtiya' ruk'ij ruma xinimaj ri ruch'ab'al ri Dios ri xkatzijuoj chiva. 11Rumare' siempre naka'an orar pan i-cuenta, chi quire' ri Ka-Dios xtu'on chiva chi nquixtiquir ntivuc'uaj jun c'aslien otz. Ruma jare' nic'atzin chi naka'an konojiel ri xojayox ruma ri Dios chi xojuoc richin. Nakac'utuj je' cha ri Dios chi riq'uin ri ru-poder, xtu'on chiva chi nquixtiquir ta xti'an nojiel ri otz ri ntirayij nti'an, y xquixtiquir ta xtiq'uis nojiel ri samaj ri itz'amuon ruma icukub'an ic'u'x riq'uin ri Jesucristo. 12Richin chi ri rub'e' ri Kajaf Jesucristo xtiyo'x más ruk'ij, y jaja' xtuya' c'a ik'ij ixre', ruma riq'uin ri Ka-Dios y ri Ajaf Jesucristo c'o q'uiy favor.

will be added

X\