2 San Pedro 1

1Inre' Simón Pedro, in ru-siervo y in ru-apóstol ri Jesucristo, nitak-el va carta va chiva ixre' ri icukub'an ic'u'x riq'uin ri Jesucristo inche'l kab'anun ojre', y re' altíra rakalien. Quire' kab'anun konojiel, ruma ri Dios can choj-ve y quire' je' ri Jesucristo ri nicalo kichin. 2Can niq'uiy ta más ri favor y ri paz riq'uin ivánima ruma ja'al ivata'n roch ri Dios y ri Kajaf Jesús. 3Ri Dios, riq'uin ri ru-poder ruyo'n nojiel ri nic'atzin chika chi nakuc'uaj jun c'aslien otz choch jaja', ruma kata'n chic roch ri xayuon kichin riq'uin ri ru-gloria y riq'uin ri namalaj ru-poder. 4Y ruma nojiel re', c'o je' ri ranun prometer chika, ri can ja'al y nem rakalien. Y ruma ri ranun prometer, nkojcolotaj choch ri itziel tak kax ri ic'o vave' choch-ulief, inche'l ri itziel tak kax ri nakarayij. Y xu'ej je' chika chi nuc'ax ri kac'aslien y nkojuoc inche'l jaja', 5y ixre' ri iniman chic ri Jesucristo, titija' ik'ij chi nti'an cha ri ic'aslien riq'uin ri Dios chi niq'uiy. Ixre' icukub'an ic'u'x riq'uin ri Dios pero vacame titija' ik'ij chi nik'alajin je' ri ru-poder ri Dios pa tak ic'aslien. Tivatamaj je' más chirij ri Dios. 6Y man jo'c ta ntivatamaj más chirij ri Dios, xa titija' ik'ij ntik'il-ivi' chi man chic ti'an pecado. Y man jo'c ta ntik'il-ivi' chi man chic ti'an pecado, xa titija' ik'ij nic'ujie' i-paciencia. Y man jo'c ta nic'ujie' i-paciencia, titija' ik'ij ntivuc'uaj ri c'aslien inche'l nrajo' ri Dios. 7Y man jo'c ta ntivuc'uaj ri c'aslien inche'l nrajo' ri Dios, titija' ik'ij chi nqui'vajo' ri hermanos. Y man jo'c ta nqui'vajo' ri hermanos, titija' ik'ij nqui'vajo' quinojiel vinak. 8Y xa nojiel re' c'o iviq'uin, man jo'c ta quire' xquixc'ujie', xa xtivatamaj más roch ri Kajaf Jesucristo, y ri ic'aslien más ja'al xtu'on. 9Pero xa c'o jun ri manak nojiel re' riq'uin, ya xumastaj chi jaja' ya xch'ajtaj ri ru-pecado. Xa inche'l jun muoy o jun ri man nitiquir ta nitzu'n naj. 10Y rumare' hermanos, titija' ik'ij chi nik'alajin chi ketzij ix-ayuon y ix-cho'n ruma ri Dios. Y titija' ik'ij chi cof quixc'ujie' riq'uin jaja'. Y xa nti'an nojiel re', man nquixtzak ta. 11Xa quire' xti'an, can ja'al xquix'an recibir chicaj y xquixuoc chupan ri reino ri man niq'uis ta richin ri Kajaf Jesucristo ri nicalo kichin. 12Rumare' inre' man xquitanie' ta ninataj chiva, mesque ixre' ya ivata'n y iyo'n je' ivánima riq'uin ri ketzij, ri xc'ut chivach. 13Pero mientras c'a inc'as vave' choch-ulief, inre' ni'ej chi nic'atzin ninataj nojiel re' chiva chi quire' nti'an pensar otz. 14Ruma inre' vata'n chi man q'uiy ta chic k'ij inc'as vave' choch-ulief, ruma quire' xu'ej chuva ri Kajaf Jesucristo. 15Inre' nitej nuk'ij ni'ej nojiel re' chiva, chi quire' mesque inre' man inc'o ta chic vave' choch-ulief, ixre' xtalka pan ive' nojiel ri nu'e'n can. 16Y man quino'j ta vinak ri xkatzijuoj chiva chirij ri ru-poder ri Kajaf Jesucristo, y ri xka'ej je' chiva chi ri Jesucristo xtipa chic jun b'ay. Ruma ojre' mismo xkatz'at riq'uin kanak'avach chi ri Jesucristo can c'o-ve namalaj ruk'ij. 17Ojre' ojc'o riq'uin ri Jesús antok ri Dios ri Rutata' xu'ej chi ri Jesús c'o ruk'ij. Y xkaxaj antok ri Dios ri c'o namalaj ruk'ij xu'ej: Jare' ri Nuc'ajuol; altíra nivajo' y niquicuot vánima riq'uin, xcha'. 18Ojre' xkatz'at nojiel. Can xkaxaj chi ri Dios xch'o-pa chicaj, xkaxaj antok xojc'ujie' riq'uin ri Jesucristo paro' ri santo juyu'. 19Y c'o je' kiq'uin ri ch'ab'al ri tz'ib'an can cuma ri profetas ojier can tiempo, pache' nu'ej-ve nojiel ri xca'b'anataj. Y otz chi nakaxaj re', ruma inche'l nu'on jun antorcha nuya' rusakil chupan jun k'aku'n, quire' nu'on ri ch'ab'al re', rumare' tivaxaj. Inche'l nu'on antok ntiel-pa mac'ajan yan ri estrella (ch'umil) chi nuya' sakil, quire' xtu'on ri sakil pa tak ivánima. 20Y ixre' tivatamaj na'ay: Man jun vinak xtitiquir xtu'ej ri chica nu'ej ri ruch'ab'al ri Dios ri tz'ib'an can cuma ri profetas ojier can tiempo, xa manak ri Espíritu Santo riq'uin. 21Ruma ja ri Espíritu Santo ri x'e'n chica ri santos achi'a' ojier can ri chica xqui'ej, y man quiq'uin ta ijeje' xiel-pa ri xqui'ej.

will be added

X\