2 San Juan 1

1Inre' Juan, ri anciano chiquicajol ri hermanos, nitz'ib'aj-el va carta va chava atre' hermana ri at-cho'n ruma ri Dios, y chica je' ri aval. Can ketzij nquixvajo'. Y man jo'c ta inre' ri najo'n ivichin, xa can nquixcajo' je' ri nic'aj chic ri cata'n chic ri ketzij. 2Y ruma c'o ri ketzij riq'uin kánima, rumare' nquixkajo'. Y ri ketzij xtic'ujie' kiq'uin richin nojiel tiempo. 3Ja ta ri favor, ri misericordia y ri paz ri nuya' ri Katata' Dios y ri Ajaf Jesucristo ri Ruc'ajuol ri Dios, tic'ujie' riq'uin ivánima. Can nojiel re' xtiyo'x chiva, ruma iyo'n ivánima riq'uin ri ketzij y ruma je' can ntivajo-ivi'. 4Inre' altíra xiquicuot antok xa'nvil nic'aj chiquivach ri aval chi quic'uan ri ketzij, can inche'l nu'ej ri ru-mandamiento ri Katata' Dios chika. 5Y vacame hermana, nic'utuj favor chava chi tab'ana' ri nu'ej ri Cristo, chi can kajo-ki' konojiel. Y ri mandamiento re' man c'ac'ac' ta, xa jare' ri e'n-pa chika antok xkanimaj ri Cristo. 6Y ri amor cava, chi naka'an inche'l nu'ej ri ru-mandamientos ri Dios. Ruma ri ru-mandamiento nu'ej chi kajo-ki'. Y ixre' ivata'n chi quire' nu'ej, ruma quire' x'e'x chiva antok xinimaj ri Cristo. 7Iq'uiy ri nca'b'ano maña i-b'anak choch-ulief ri nca'e'n chi antok ri Jesucristo xpa vave' choch-ulief, man xuoc ta vinak inche'l ojre'. Y ri jun ri ni'e'n quire' chirij ri Jesucristo, jare' ri nib'ano maña y jaja' ri anticristo. 8Pero ixre' tib'ana' cuenta-ivi', chi quire' man jun xtisach can cha ri rajal ri isamaj ri xtiyo'x chiva, y can nojiel xtiyo'x chiva. 9Chica-na ri ntiel-el chupan ri xuc'ut can ri Cristo, y xa nuya' can, xa manak ri Dios riq'uin. Pero ri man nuya' ta can ri xuc'ut ri Cristo, can c'o ri Katata' Dios y ri Ruc'ajuol riq'uin. 10Xa c'o jun xtalka chi'ivachuoch y man ja ta ri ch'ab'al ri xuc'ut ri Cristo ri ruc'amun-pa chiva, man ticusaj-oc chi'ivachuoch, ni man ja'al ti'an recibir. 11Ruma xa xti'an recibir ja'al, can xtivakaliej je' ixre' nojiel ri itziel tak kax ri nca'ru'on ri jun re'. 12Y c'o q'uiy ri nivajo' ni'ej chiva. Pero man nivajo' ta nitz'ib'aj más chupan va carta va. Ruma can nirayij nquib'aka iviq'uin chi nquitzijuon chiva, chi quire' ri kánima can xtiquicuot. 13Ri i-ral ri avach'alal, ri cho'n je' ruma ri Dios, niquitak-el jun saludo chava. Amén.

will be added

X\