2 Corintios 9

1Man nic'atzin ta chi inre' c'o ta más nitz'ib'aj-el chiva, ri chica modo nqui'to-el ri santos hermanos. 2Ruma vata'n chi can ntivajo' nqui'to-el. Y jare' nitzijuoj inre' chica ri hermanos vave' Macedonia, chi ixre' ri ixc'o Acaya xa-jan junab'ir i-e'n chi ntitak-el jun ofrenda. Y ruma ixre' can riq'uin nojiel ivánima xi'an quire', jare' ri xb'ano chica iq'uiy vave' Macedonia chi niquitak-el je' qui-ofrenda. 3Y nca'ntak-el ri hermanos c'a iviq'uin, chi quire' ri utzulaj tak tzij ri i-nutzijuon chivij can ta ketzij xca'iel, y can ta imaluon chic ri ofrenda ri ib'anun pensar chi ntitak-el inche'l ri nutzijuon chivij. 4Ruma xa ta ic'o hermanos aj-Macedonia ri nca'a viq'uin, y ixre' xa man jun kax imaluon antok xkub'aka iviq'uin, xa nipa q'uix chikij ojre' y chivij je' ixre', ruma otz oj-ch'ovinak chivij. 5Rumare' inre' can xin'an pensar y xin'ej chica ri hermanos chi na'ay nca'a ijeje' c'a iviq'uin y ti'quiq'uisa' rumolic ri ofrenda ri ib'anun prometer chi ntiya-el, chi quire' ri ntiya-el, k'alaj chi man ojre' ta xoj'e'n chiva chi tiya-el, xa k'alaj ja'al chi iviq'uin ixre' xalax-ve-pa. 6Y inre' nivajo' ninataj chiva: Xa jun jub'a' oc nutic, jub'a' oc niril; y ri q'uiy nutic, can q'uiy je' niril. 7Chi'ijunal ixre' tiya' ri jane' (jaro') ri nquixtiquir ntiya', can inche'l ri xu'ej ri ivánima. Ruma ri Dios nca'rajo' ri nca'quicuot niquiya'. 8Y can q'uiy ri bendición ri xtuya' ri Dios chiva ruma jaja' altíra ru-poder c'o. Can nojiel roch bendición xtuya-pa chiva, chi quire' siempre c'o ri nticusaj chi nqui'to' ri nic'aj chic, chi quire' nti'an ri utzulaj tak samaj. 9Can inche'l ri nu'ej chupan ri ruch'ab'al ri Dios ri tz'ib'an can: Xuya' y xujach chiquivach ri i-puobra. Y ri choj tak kax ri xa'ru'on, can richin nojiel tiempo xca'c'ujie'. 10Ri Dios can nuya' ri ija'tz cha ri aj-ticoniel, chi quire' c'o ri nutic, y ja ri Dios je' nib'ano cha ri tico'n chi nuya' roch y jare' ri niyo'n ruvay ri aj-ticoniel. Y quire' je' xtu'on ri Dios chiva, can xtuya' y can xtiq'uiyir ta ri c'o iviq'uin, chi quire' q'uiy ta utzulaj tak kax xti'an. 11Y quire' xtu'on ri Dios chiva, can c'o xtic'ujie' iviq'uin, can inche'l jun b'ayuon xti'an y nojiel xquixtiquir xtiya', can inche'l ri nrajo' ri ivánima. Y antok ojre' xta'kajacha' pa quik'a' ri hermanos, can altíra xtiquiya' tiox b'a' cha ri Dios. 12Ruma ri ofrenda ri xtitak-el ixre' chica ri santos hermanos, man jo'c ta xca'ruto' chupan ri sufrimiento, xa xtu'on chica chi altíra xtiquiya' tiox b'a' cha ri Dios rumare'. 13Y ruma ri xtiya' ixre' chica, ijeje' can altíra xtiquiya' ruk'ij ri Dios, ruma xtiquina' chi ketzij ri nti'ej ixre' chi ntinimaj ri nu'ej ri ru-evangelio ri Cristo. Ijeje' can xtiquiya' je' ruk'ij ri Dios ruma riq'uin nojiel ivánima xtiya' ri ntivajo' ntisipaj-el chica y ruma quire' je' nti'an quiq'uin quinojiel hermanos. 14Ijeje' xtiqui'an orar pan i-cuenta. Xquixcajo' ruma ri namalaj ru-favor ri Dios ri c'o iviq'uin. 15¡Tiox b'a' cha ri Dios ruma ri xusipaj chika, ri man nca'litaj ta tzij chi ni'e'x, ruma can nem!

will be added

X\