2 Corintios 8

1Hermanos, nakajo' naka'ej chiva chirij ri favor ri ruyo'n ri Dios riq'uin cánima ri iglesias ri ic'o Macedonia. 2Mesque altíra sufrimiento niquik'asaj pa quic'aslien, ijeje' can xquimol jun ofrenda. Quire' xqui'an ruma altíra nca'quicuot. Ijeje' mesque i-puobra, pero niquijoyovaj quivach ri c'o nic'atzin chica, y can xqui'an inche'l i-b'ayoma' riq'uin ri xquiya'. 3Can ketzij ri ni'ej chiva, ijeje' xquiya' ri xa'tiquir xquiya', y xquiya' más choch ri xa'covin xquiya'. Y can quiq'uin ijeje' xalax-ve chi xqui'an quire'. 4Ijeje' can altíra xqui'an rogar chika chi kaya' ri privilegio chica chi ijeje' je' niquiya-el qui-ofrenda chi nakuc'uaj chica ri santos hermanos. 5Ojre' man jun mul xka'an pensar chi quire' niqui'an, ruma ijeje' man jo'c ta xquiya' qui-ofrenda, xa xquijach-qui' na'ay pa ruk'a' ri Ajaf chi niqui'an ri nrajo' jaja', y xquijach-qui' je' chupan ri samaj ri katz'amuon ojre', can inche'l nrajo' ri Dios. 6Rumare' ojre' xkac'utuj favor cha ri hermano Tito chi titzalaj chic iviq'uin Corinto, y ri ofrenda ri xutz'om can rumolic chicajol, tiruq'uisa' rumolic, ruma ri samaj ri nti'an ixre' xa jun favor. 7Ixre' can altíra icukub'an ic'u'x riq'uin ri Ajaf Jesucristo, can q'uiy c'a no'j c'o iviq'uin, y antok ixre' ntic'ut ri no'j re', can ja'al rub'ixic nti'an cha, nojiel kax can riq'uin nojiel ivánima nti'an, y altíra nkojivajo' ojre'. Rumare' quire' mismo tib'ana' vacame, can tiya' ri jane' (jaro') nquixtiquir ntiya' chica ri nic'aj chic, ruma ri samaj re' xa jun favor ri nti'an. 8Inre' man ni'ej ta chiva chi quire' tib'ana'; man quire' ta. Ri nivajo' inre' chiva, ja ta chi ixre' nti'an inche'l ri niqui'an ri nic'aj chic. Ijeje' riq'uin cánima xalax-ve chi xquimol ri ofrenda. Quire' je' ixre' can tik'alajin chi ketzij c'o amor iviq'uin. 9Can ivata'n chi ri favor ri xu'on ri Kajaf Jesucristo can nem. Jaja' altíra nquixrajo', rumare' xuya' can ri rub'ayomal chicaj y xuoc puobra. Jaja' xu'on quire' chi quire' ixre' ntivil ri ketzij b'ayomal. 10Y inre' ninataj re' ruma c'o otz nuc'am-pa chiva: Xa-jan junab'ir xalax-pa riq'uin ivánima chi xitz'om rumolic ri ofrenda. 11Vacame c'a, tiq'uisa' rumolic, can inche'l xalax riq'uin ivánima na'ay, jo'c ri jane' (jaro') nquixtiquir ntiya', jo'c re' tiya'. 12Ruma xa riq'uin ivánima xalax-pa re', ri Dios can nuc'an chi'k'a' ri jane' (jaro') nquixtiquir ntiya', ruma jaja' man nuc'utuj ta chiva ri xa manak iviq'uin. 13Ri ni'ej chiva, man richin ta chi ri nic'aj chic q'uiy nic'ujie-ka quiq'uin, y ixre' man jun yan chic kax nic'ujie' can iviq'uin ruma nqui'to-el ijeje'. 14Ri ni'ej inre' ja chi junan ivach quiq'uin ri niqui'an sufrir. Ruma vacame ixre' c'o jub'a' iviq'uin, y rumare' nquixtiquir nqui'to' ri nic'aj chic. Ruma man jun ta'mayuon ri chica patanak chakavach-apa, ruma xa tal vez ixre' yan chic ri nic'atzin chi nquixto'x cuma ijeje'. 15Y chicajol ixre' xtib'anataj je' inche'l nu'ej chupan ri ruch'ab'al ri Dios ri tz'ib'an can: Ic'o israelitas q'uiy maná ri xquimol, y mesque quire' xqui'an, man jun xu'on suobra quiq'uin. Y ri nic'aj chic ri xa jub'a' oc ri xquimol, man jun xu'on falta chica. 16Y inre' altíra niya' tiox b'a' cha ri Dios, ruma xuya' riq'uin ránima ri hermano Tito chi altíra nquixruc'uxlaj, can inche'l ni'an inre'. 17Jaja' can riq'uin ránima xalax-pa chi ni'a iviq'uin. Quire' xu'on pensar ruma altíra nquixruc'uxlaj, y man jo'c ta ruma xka'ej cha chi ti'a iviq'uin chi niruq'uisa' ri samaj ri rutz'amuon can chicajol. 18Y riq'uin ri Tito, nakatak-el jun hermano. Ri hermano re' can quinojiel iglesias cata'n roch, ruma ja'al samajnak chi rutzijuon ri evangelio. 19Y ri hermano ri ni'a riq'uin ri Tito, quinojiel hermanos cata'n roch. Jaja' can xcho'x cuma ri iglesias chi nakach'ilaj antok nakuc'uaj ri ofrenda. Ri ofrenda ri maluon, jachuon pa kak'a' ojre' chi nakajacha' chica ri ic'o chupan sufrimiento, y riq'uin ri naka'an, ri Ajaf Dios niyo'x ruk'ij, y re' k'alaj chi riq'uin nojiel ivánima ntiya-el ri ofrenda. 20Ojre' man nakajo' ta chi nipa tzij chikij, rumare' man kayuon ta ojre' nakuc'uaj ri ofrenda, ruma q'uiy. 21Ruma ojre' man nakajo' ta chi jo'c choch ri Ajaf Dios k'alaj chi nojiel ri naka'an, can riq'uin utzulaj no'j; xa nakajo' je' chi quire' tik'alajin chiquivach ri vinak. 22Y quiq'uin ri ica'ye' hermanos ri nca'a iviq'uin, nakatak-el jun chic hermano ri can kata'n ojre' chi nutej ruk'ij chi nu'on chica-na samaj richin ri Dios. Y vacame can altíra nrajo' chi ni'ka c'a iviq'uin, ruma ri utzulaj tak tzij ri raxan chivij, y ruma jaja' can rucukub'an ruc'u'x iviq'uin. 23Ri iyoxe' hermanos ri xca'b'aka iviq'uin, can altíra i-otz. Ruma ri hermano Tito can vach'il inre', y nquiruto' chi ni'an ri samaj chicajol. Y ri ica'ye' chic hermanos, ijeje' i-takuon-pa cuma ri iglesias; y ruma ri c'aslien ri quic'uan, ri Cristo can niyo'x ruk'ij. 24Rumare', ixre' can tic'utu' chi nqui'vajo' ri hermanos re', y nalka ta rutzijoxic quiq'uin ri iglesias chi ixre' can nqui'vajo'. Can inche'l ri katzijuon ojre' chivij chi altíra ix otz.

will be added

X\