2 Corintios 7

1Ixre' hermanos ri altíra nquixvajo', ri xin'ej yan chiva, nojiel re' ranun prometer chika ri Dios. Rumare' kac'ama-el nojiel ri man otz ta ri c'o chupan ri ka-cuerpo y ri ka-espíritu. Kaxi'ij-ki' choch ri Dios y katija' kak'ij chi siempre nakuc'uaj jun c'aslien sak. 2Ojre' man jun kax itziel kab'anun chiva, tijaka' ri ivánima chi quire' nkojc'ujie' iviq'uin. Ojre' man jun chivach ri kac'axuon runo'j, man jun kab'anun engañar. 3Ri tzij ri xin'ej, man xin'ej ta ruma nivajo' ni'ej chi ixre' c'o ich'o'j. Inre' ya xin'ej na'ay chi ixc'o riq'uin kánima, y man jun xtitiquir xquixalasan-el chire'. Xa ojc'as o nkucon, ixre' can ixc'o riq'uin kánima. 4Nojiel ri nuna' ri vánima ivuma ixre', can ni'ej chiva, rumare' altíra nquiquicuot ivuma ixre'. Can altíra nquini'an consolar, y jare' ri nib'ano chuva chi altíra nquiquicuot chupan nojiel sufrimientos. 5Ojre' q'uiy sufrimientos nakak'asaj pa kac'aslien, y quire' je' xb'anataj chika antok xojalka vave' Macedonia. Can man jub'a' xojuxlan pa ruk'a' ri sufrimiento. Can naka'an sufrir ruma ri ayoval ri ni'an chika, y can kaxi'in-ki' je'. 6Pero ri Dios, ri can nca'ru'on consolar ri manak-oc quikalien, xojru'on consolar ruma xalka ri Tito kiq'uin. 7Y man jo'c ta ruma xalka ri Tito kiq'uin y xkatz'at roch; xojru'on consolar ruma xkatz'at chi jaja' ib'anun-pa consolar. Xalru'ej je' chika chi ixre' can nkojivajo', chi nquixb'isuon ruma man cha'nin ta xi'an arreglar ri xb'anataj chicajol. Y xalrutzijuoj je' chi ixre' altíra ntitej ik'ij chi nti'an ri nu'e'n chiva. Nojiel c'a re' can xu'on chuva chi can altíra xquicuot ri vánima. 8Ri vacame, inre' man nina' ta chic c'a ri ralal ruma ri xin'ej-el chupan ri carta ri xintak-el chiva na'ay, mesque ri na'ay mul xinna' ri ralal, ruma xin'an chiva chi xixb'isuon. Vacame, man nquib'isuon ta chic ruma xa jub'a' oc tiempo ri xixruya' pa b'is ri carta re'. 9Vacame can nquiquicuot, pero man ruma ta xixya' pa b'is. Man quire' ta. Inre' nquiquicuot ruma ri b'is xu'on chiva chi xtzalaj-pa ivánima riq'uin ri Dios y nti'an ri nrajo' jaja'. Y xixb'isuon ruma quire' xrajo' ri Dios y c'o xuc'am-pa chiva, ruma xa man ta xtzalaj-pa ri ivánima, re' kuma ta ojre' xa man jun ta kax xka'ej chiva. 10Ruma ri b'is ri nuya' ri Dios, can nu'on cha jun chi nitzalaj-pa ránima riq'uin chi quire' nicolotaj. Rumare' man jun ti'e'n chi ri b'is re' man otz ta. Pero ri b'is ri c'o quiq'uin ri vinak ri man quiniman ta ri Dios, xa camic espiritual ri nuc'am-pa chica. 11Jo'c titz'ata' ri chica xu'on ri b'is ri xuya' ri Dios chiva. Can cha'nin xixtiquir xi'an arreglar ri xb'anataj chicajol. Can man xka ta chivach ri rub'anun-pa ri jun, ruma c'o chupan pecado. Can xixi'ij-ivi' ruma xi'ka pan ive' (xi'an entender) ri itziel kax ri c'o chicajol. Can jo'c ri nrajo' ri Dios ntivajo' nti'an, rumare' ja xivalasaj-el chicajol ri xb'ano pecado. Can otz xi'an cha nojiel. 12Antok inre' xintz'ib'aj-el ri carta y xintak-el chiva, man jo'c ta ruma ri jun ri xb'ano ch'o'j, y man jo'c ta je' ruma ri jun ri choj cha x'an-ve. Man quire' ta. Xa richin chi tivatamaj y tik'alajin chivach chi ojre' altíra nakajo' nquixkato', chi quire' man ta nib'anataj chic quire' chicajol. Ri Dios can nutz'at-pa ri chica ri naka'an choch. 13Y ruma ixre' xi'an arreglar nojiel, ojre' can xoj'an consolar. Pero más xojquicuot antok xkatz'at ri Tito chi altíra niquicuot ránima patanak antok xtzalaj-pa iviq'uin. Ixre' can xiya-pa ruchuk'a' ri ru-espíritu. 14Vacame man nquiq'uix ta choch ri Tito, ruma antok c'a maja' ti'a iviq'uin, inre' xin'ej-el cha chi ixre' altíra ix otz y nojiel ni'ka pan ive' (nti'an entender). Y xk'alajin chi man choj ta xinya' ik'ij riq'uin ri nuch'ab'al, xa ketzij xiel, can inche'l ivata'n ixre' chi ojre' man jun b'ay ka'e'n ta chiva jun tzij ri xa man ketzij ta. 15Vacame ri Tito más nquixrajo' que antok c'a maja' ti'ka iviq'uin. Can nalka paro' antok jaja' xb'aka iviq'uin, ixre' can ixi'in-ivi' y nquixb'arb'uot xi'an recibir. Y can nalka paro' je' chi ixre' altíra nquixniman. 16Inre' altíra nquiquicuot, ruma nucukub'an nuc'u'x chirij nojiel ri nti'an ixre'.

will be added

X\