2 Corintios 6

1Ojre' ri junan nakatola-ki' chupan ri rusamaj ri Dios, can naka'ej je' chiva chi tib'ana' favor man ti'an chi man jun rakalien ri ru-favor ri Dios ri yo'n chiva. 2Ruma chupan ri tz'ib'an can, ri Dios nu'ej: Inre' can xanva'xaj antok xalka ri k'ij chi ni'an ri favor chica ri vinak. Inre' je' xanto-pa chupan ri k'ij antok ic'o ri nca'colotaj. Quire' nu'ej ri Dios chupan ri tz'ib'an can. Ja k'ij re' chi ni'an ri favor re'; ja k'ij re' antok ic'o ri nca'colotaj. 3Y man nakajo' ta chi kuma ojre' ic'o vinak nca'tzak y ic'o ri man niquinimaj ta, rumare' ojre' nakatej kak'ij chi quire' man jun itziel kax nilitaj pa kac'aslien. Man nakajo' ta chi ri vinak itziel nca'ch'o' chirij ri samaj ri naka'an. 4Pa ruc'axiel re', ojre' riq'uin nojiel ri naka'an, can nik'alajin chi ketzij oj rusamajiel ri Dios. Can nik'alajin chi oj rusamajiel ri Dios, ruma c'o q'uiy ka-paciencia, kak'asan sufrimientos, kak'asan c'o nu'on falta chakavach, y kacach'uon antok c'o pakon xuna' kánima. 5Ojre' oj-ch'ayuon, oj-yo'n pa tak cárceles, ic'o lugar pache' ri vinak xa'palaj chikij, altíra oj-samajnak, kacach'uon varan, kacach'uon vi'jal. 6Ojre' nakac'ut chi sak ri kac'aslien, kata'n ri ketzij, c'o ka-paciencia y oj otz quiq'uin ri vinak, can nca'kajo' ri vinak riq'uin nojiel kánima, y c'o je' ri Espíritu Santo kiq'uin. 7Kiq'uin ojre' c'o ri ketzij ch'ab'al, y ri ru-poder je' ri Dios. Can ja ri choj kac'aslien nakacusaj chi nakatola-ki' antok ic'o nca'palaj-pa chikij chi niqui'an ayoval, y chica-na lado nca'palaj-pa. 8Ic'o niqui'ej chi c'o kak'ij, ic'o niqui'ej chi xa man jun kak'ij chiquivach. Ic'o ri ja'al nca'ch'o' chikij, ic'o je' ri itziel nca'ch'o' chikij. Ic'o niqui'ej chi nakatz'ak tzij, pero ojre' ja ri ketzij ri naka'ej chica. 9Ic'o ri man cata'n ta oj chica ojre', y ic'o je' ri ja'al cata'n kac'aslien. Can oj-rutzakla'ien ri camic, pero xa c'a ojc'as. Q'uiy sufrimiento kak'asan, pero xa man oj-quiminak ta. 10Y mesque nkojb'isuon, pero siempre nkojquicuot. Ojre' oj puobra, pero nakaya' chica ri nic'aj chic chi nca'b'ayomer. Y mesque man jun kax c'o kiq'uin, xa nojiel c'o kiq'uin. 11Hermanos ri ixc'o chire' Corinto, can nojiel ri naka'ej chiva can riq'uin ri kánima ntiel-pa, y ri kánima can kajakuon, can altíra nquixkajo'. 12Ixre' can ixc'o riq'uin kánima, can c'o jun nem i-lugar riq'uin kánima, pero ixre' xa man quire' ta ri ivánima kiq'uin ojre', ruma man can ta nkojivajo'. 13Can nquich'o' chiva inche'l xa ix valc'ual y nic'utuj chiva chi tijaka' ri ivánima, can kojivajo', ruma ojre' can nquixkajo'. Can tib'ana' inche'l naka'an ojre' iviq'uin. 14Ixre' man ti'an chi ix junan quiq'uin ri vinak ri man quiniman ta ri Cristo, ruma man junan ta ic'aslien quiq'uin. ¿Nuc'uaj came ri' jun choj c'aslien riq'uin jun ri xa man choj ta? ¿Can ja'al came niquic'uaj-qui' ca'ye' c'aslien quire'? ¿Can junan came ri sakil riq'uin ri k'aku'n chi niquic'uaj-qui'? 15¿Can niquic'uaj came qui' ri Cristo riq'uin ri Belial ri ni'e'x je' Satanás cha? ¿I-junan came jun ri runiman ri Cristo riq'uin jun ri man runiman ta? 16¿Can junan came ru-templo ri Dios quiq'uin ri ídolos ri xa vinak i-b'anayuon? Ixre' can ix ru-templo ri c'aslic Dios. Ri Dios can quire' ru'e'n: Xquic'ujie' y xqui'in quiq'uin. Inre' xquinuoc Qui-Dios y ijeje' can xca'uoc nutanamit. 17Ruma c'a re' ri Ajaf nu'ej chiva: Quixiel-pa chiquicajol ri man i-vichin ta inre'. Man tivuc'uaj ri itziel c'aslien, chi quire' inre' nquix'an recibir. 18Inre' xquinuoc Itata' y ixre' xquixuoc ix numi'al, ix nuc'ajuol. Quire' nu'ej ri Ajaf ri c'o nojiel poder pa ruk'a'.

will be added

X\