2 Corintios 5

1Can kata'n chi ri ka-cuerpo, jare' rachuoch ri ka-espíritu choch-ulief, y mesque ri ka-cuerpo nicon, ri ka-espíritu can xtiril jun chic rachuoch riq'uin ri Dios. Y ri jay re' ja ri Dios b'anayuon; ri richin nojiel tiempo y chicaj c'o-ve. 2Y jare' ri nib'ano cha ri ka-espíritu chi nijilo chupan ri ka-cuerpo ri acunak rachuoch. Ri ka-espíritu can nrajo' yan ntuoc chupan ri jun chic rachuoch ri c'o chicaj, 3chi quire' ri ka-espíritu c'o ta rutziak, y man ch'anal ta. 4Ruma c'a c'o ri ka-cuerpo, rumare' naka'an jiluoj y naka'an sufrir. Ri acunak rachuoch ri ka-espíritu ja ri ka-cuerpo, pero man ruma ta naka'an jiluoj nakajo' chi ri ka-espíritu ntiel ta yan el chupan ri ka-cuerpo; ri nakajo', ja chi c'o yan ta ri jun chic rachuoch ri ka-espíritu chi quire' ri ka-cuerpo ri nicon, nic'ujie' can y ntuoc ri ka-espíritu chupan ri jun chic rachuoch, y chire' xtic'ujie' richin nojiel tiempo. 5Y ja ri Dios b'anayuon chi nic'ujie' kiq'uin ri c'aslien richin nojiel tiempo. Y ruyo'n je' ri Espíritu Santo chika, jare' ri ratal chi ketzij nikila' ri c'aslien ri man niq'uis ta. 6Rumare' ojre' can siempre cukul kac'u'x, kayo'ien-apa chi xtic'ujie' ri jun chic rachuoch ri ka-espíritu, ruma kata'n chi xa c'a ojc'o chupan ri ka-cuerpo, xa man ojc'o ta riq'uin ri Kajaf Jesús chicaj. 7Ojre' ruma kacukub'an kac'u'x riq'uin ri Kajaf Jesús, rumare' katz'amuon b'ay chi nkub'aka riq'uin y mesque man nakatz'at ta roch vacame. 8Ojre' can kacukub'an kac'u'x y nakajo' chi man ta ojc'o chic chupan ri ka-cuerpo, más otz ojc'o ta chic riq'uin ri Ajaf. 9Rumare' nakatej kak'ij naka'an ri nrajo' ri Dios chi quire' can nkojka choch. Quire' nakajo' naka'an antok c'a ojc'as choch-ulief o man ojc'as ta chic choch-ulief. 10Ruma nic'atzin chi konojiel nkub'aka choch ri ru-tribunal ri Cristo, chi quire' chikajunal niyo'x ruc'axiel chika ruma ri xa'ka'an pa kac'aslien vave' choch-ulief, xa otz ri xa'ka'an o man otz ta. 11Y ruma ojre' kata'n chi xkub'aka choch ri Ajaf, rumare' c'o xib'inre'l kiq'uin, y nkusamaj chi quire' ic'o ta más ri niquinimaj jaja'. Ri Dios can rata'n kavach oj chica ojre' y rata'n kánima. Y nivoyo'iej chi can ta k'alaj je' chivach ixre', y quire' ta je' ntina' ixre' riq'uin ri ijaluon y ri ivánima. 12Man ti'an pensar chi ojre' nakatzijuoj-ki' chivach jun chic b'ay chi ixre' otz nkoji'an recibir, man quire' ta. Ri nakajo' ojre' ja chi nquixquicuot kuma ojre', chi quire' ixre' jare' ri nti'ej chica ri nca'e'n chi i-rusamajiel ri Dios y xa man ketzij ta. Ijeje' niqui'an inche'l can i-otz chiquivach ri vinak, pero ri cánima xa man quire' ta. 13Y ri nca'e'n chi oj ch'u'j; quire' kab'anun chiquivach ijeje', pero re' ruma naka'an rusamaj ri Dios y nakaya' ruk'ij. Y xa ic'o nca'e'n chi man oj ch'u'j ta, can quire', ruma otz naka'an cha rusamaj ri Dios chi quire' c'o ri xtich'ec ixre' chirij. 14Y ruma ri ru-amor ri Cristo ri nib'ano chika chi naka'an ri samaj, rumare' naka'an pensar: Ri Cristo xcon kuma konojiel. Y xojcon je' riq'uin jaja', ruma pa kac'axiel ojre' xcon-ve. 15Jaja' kuma konojiel xcon, chi quire' ojre' man chic nakuc'uaj ta jun c'aslien ri inche'l nakajo' ojre'. Jo'c kab'ana' ri nrajo' ri xcon pa kac'axiel y xc'astaj chic kuma ojre'. 16Rumare' ri vacame y chakavach-apa, man taka'an chic inche'l kab'anun-pa, antok c'a maja' tic'axtaj ri kac'aslien; antok jo'c nakatz'at ri chica rub'ayal jun vinak. Quire' je' xka'an cha ri Cristo, xka'an pensar chi jaja' xa choj jun chica-na vinak. Pero vacame man quire' ta chic naka'an pensar chirij. Vacame kata'n chic ri chica jaja'. 17Y rumare' ri xa jun rub'anun riq'uin ri Cristo, can xc'axtaj ruc'aslien. Can x'an jun c'ac'ac' vinak cha. Nojiel ri itziel tak no'j ri xa'ru'on na'ay antok c'a maja' tunimaj, can ya xa'ruya' can, y vacame c'o jun c'ac'ac' ruc'aslien y c'ac'ac' runo'j. 18Y nojiel re', riq'uin ri Dios xalax-ve-pa. Jaja' mismo xb'ano ri paz kiq'uin; y chi xb'anataj ri samaj re', ri Dios ja ri Cristo xucusaj. Y ri samaj ri ruyo'n ri Dios chika ojre', ja chi nakatzijuoj chica ri vinak che'l niqui'an paz riq'uin ri Dios. 19Antok ri Dios xu'on ri samaj chi ri vinak niqui'an paz riq'uin jaja', ja ri Cristo xucusaj. Ri Dios c'o riq'uin ri Cristo chi xu'on ri samaj re'. Y chika ojre' xu'ej chi nakatzijuoj chica ri vinak che'l niqui'an paz riq'uin jaja'. Ri Dios nrajo' chi ri vinak nca'iel chi man jun chic qui-pecado choch. 20Ojre' can oj-cho'n ruma ri Cristo y nkojrutak pa rub'e' jaja' chi nkub'ach'o'. Pa rub'e' ri Cristo nakac'utuj favor chiva chi tinimaj ri ruch'ab'al ri Dios, chi quire' nti'an paz riq'uin ri Dios. Y antok quire' naka'ej chiva, can ja ri Dios ri nich'o' iviq'uin. 21Ri Cristo man jun pecado xu'on, pero ri Dios xu'on cha chi jaja' xuc'uan ri ka-pecado konojiel ojre'. Quire' xu'on cha chi quire' konojiel ojre' ni'an chika ruma jaja' chi manak chic ka-pecado choch ri Dios.

will be added

X\