2 Corintios 4

1Mare' ojre' man nakamalij ta naka'an rusamaj ri Dios, ruma ri samaj re' jaja' ri ya'yuon-pa chika. Y jo'c ruma nujoyovaj kavach, nkojrucusaj chupan ri rusamaj. 2Ojre' man naka'an ta inche'l niqui'an nic'aj chic. Ojre' man nca'ka'an ta kax ri nca'an pan aval y richin q'uix. Man nca'ka'an ta engañar ri vinak, man nakac'ax ta rub'ixic ri ruch'ab'al ri Dios chiquivach ri vinak. Ojre' jo'c ri ketzij ri nakatzijuoj chica ri vinak, y jare' ri b'anayuon chi ri vinak cata'n chic kavach chi oj richin ri Dios, y rumare' quinojiel nkojqui'an recibir otz. Ri Dios nutz'at-pa chi quire'. 3Pero xa ri evangelio ri nakatzijuoj chiquivach man ni'ka ta pa quive' (man niqui'an ta entender), ja nca'b'aka chupan ri camic chi niqui'an sufrir. 4Ri Satanás, ri rajaf ri tiempo vacame, can muoy rub'anun chica ri vinak ri man quiniman ta ri Cristo, chi quire' man ni'ka ta pa quive' (man niqui'an ta entender). Quire' rub'anun chica, chi quire' man k'alaj ta ri rusakil ri evangelio chiquivach. Y ri kata'n roch ri Cristo, kata'n je' roch ri Dios, ruma ri Cristo can Dios-ve. 5Y ojre' ja ri Jesucristo nakatzijuoj y man ojre' ta ri nakatzijuoj-ka-ki'. Ojre' nakatzijuoj chi ri Jesucristo jare' ri Ajaf; ojre' jo'c oj i-siervos ixre'. Y re' xa ruma ri Jesús. 6Pa rutz'ucb'al, ri Dios xu'ej chi chupan ri k'aku'n tik'alajin-pa ri sakil, y jaja' je' ri niyo'n sakil riq'uin kánima, chi quire' ojre' nakatzijuoj chica ri vinak ri ruk'ij jaja' ri nitz'iet riq'uin ri Jesucristo. 7Ri sakil y ri poder ri ruyo'n-pa ri Dios chika, can jun tesoro, pero ojre' xa oj barro, inche'l jun b'ajo'y. Quire' b'anun chika chi quire' nik'alajin chi ri nem poder ri c'o kiq'uin, riq'uin ri Dios patanak-ve y man kichin ta ojre'. 8Ojre' nojiel k'ij naka'an sufrir, pero can kacach'uon y can oj-alanak chupan. Can c'o q'uiy kax ni'an chika, pero man nakamalij ta kac'u'x. 9Pache' nkub'aka-ve, ri vinak man otz ta nkojquitz'at, pero ri Dios c'o kiq'uin. Mesque oj-quikasan pan ulief, pero man i-tiquirnak ta chi oj-quiquimisan. 10Ojre' can choch-ve ri camic ojc'o-ve chica-na lugar. Can nakac'ul inche'l xuc'ul ri Jesús, chi quire' k'ij-k'ij nakac'ut chi c'o ri Jesús pa kac'aslien. 11Ojre' ri ojc'as, can ojc'o choch ri camic, ruma naka'an rusamaj ri Jesús. Chi quire' ri ruc'aslien ri Jesús can k'alaj je' pa kac'aslien ojre', mesque oj vinak y nkucon. 12Q'uiy mul jub'a' ma nkojquimisas ruma nakatzijuoj ri ruch'ab'al ri Dios. Pero ixre' xivil ri c'aslien ri man niq'uis ta rumare'. 13Ixre' y ojre' junan cukul kac'u'x riq'uin ri Dios, ruma c'o ri espíritu richin ri cukb'al c'u'x kiq'uin, inche'l ri tz'ib'an can chupan ri ruch'ab'al ri Dios: Nuniman, rumare' nitzijuoj ri nuniman. Quire' nu'ej. Y quire' je' naka'an ojre' vacame, nakatzijuoj ri kaniman. 14Quire' naka'an ruma kata'n chi ri xc'asuon-el richin ri Ajaf Jesús chiquicajol ri quiminaki', jaja' je' ri xtic'asuon-el kichin ojre'. Ruma ojre' jo'c jun kab'anun riq'uin ri Ajaf Jesús. Y junan iviq'uin xkojruc'uaj chicaj. 15Can kacach'uon q'uiy sufrimientos ruma nakajo' chi ixre' ntivil ri favor pan ic'aslien. Kacach'uon nojiel, chi quire' iq'uiy ri niquil ri favor ri nuya' ri Dios y nca'colotaj. Y rumare' can iq'uiy ri niquiya' tiox b'a' cha ri Dios y niquiya' ruk'ij. 16Jare' ri nib'ano chika ojre' chi man nakamalij ta can ri samaj, mesque naka'an sufrir. Ri ka-cuerpo can nuna' ri ni'an cha, rumare' can niq'uis-ka ruchuk'a'; pero ri ka-espíritu man quire' ta, xa k'ij-k'ij más ruchuk'a' nic'ujie'. 17Ruma ri jub'a' sufrimiento ri nakac'ul vave' man nilayuj ta, xa cha'nin nak'ax; ruma nu'on chika chi xtic'ujie' kak'ij. Y ri kak'ij ri xtic'ujie', can más nem y man xtiq'uis ta. 18Ojre' man b'anak ta kánima chiquij ri kax ri nca'katz'at vave' choch-ulief, ojre' b'anak kánima chiquij ri man nca'katz'at ta. Ruma ri nca'tz'iet, xa nojiel nca'q'uis, pero ri man nca'tz'iet ta, can richin nojiel tiempo ic'o.

will be added

X\