2 Corintios 3

1Ri tzij ri xin'ej chiva, ¿can ja came nakatzijuoj chic ki' jun b'ay chi ojre' can oj otz? ¿Nic'atzin came naka'an ojre' inche'l niqui'an ri nic'aj chic? Ijeje' quic'uan cartas pache' nu'ej chi otz ca'an recibir, y niquic'utuj je' jun carta chiva pache' nu'ej chi ca'an recibir cuma ri hermanos ri ic'o nic'aj chic tanamet. Pero ojre' man nic'atzin ta naka'an quire'. 2Ruma ja ri ic'aslien ixre' ri nuc'ut chiquivach ri nic'aj chic vinak, chi otz ri samaj ri xka'an chicajol. Niquitz'at ri utzulaj c'aslien ivuc'uan y jare' ri ni'e'n chi otz nkoj'an recibir cuma quinojiel. Y re' riq'uin kánima ojre' tz'ib'an-ve; man choch ta vuj. 3Ri ka-carta ojre' ri ni'e'n chi otz nkoj'an recibir, ja ri Cristo ri b'anayuon-pa, y ri carta re' ixre'. Ixre' ri inche'l ka-carta ri nakac'ut chiquivach ri vinak, pero man cha ta tinta tz'ib'an-ve. Ruma ja ri Ru-Espíritu ri c'aslic Dios tz'ib'ayuon-ve. Man choch ta tz'ajtz'ak tak ab'aj b'anun-ve; xa riq'uin ivánima tz'ib'an-ve. 4Y ojre' kata'n chi quire', ruma ri Cristo kacukub'an kac'u'x riq'uin ri Dios. 5Kayuon ojre' man jun nkojcovin naka'an, mare' man jun manera naka'ej chi kayuon ojre' nkojtiquir naka'an ri samaj, ruma ja ri Dios ri nib'ano chika chi nkojcovin naka'an ri samaj. 6Jaja' nkojrucusaj pa rusamaj, y xu'on rusamajiel chika richin ri c'ac'ac' pacto. Can xu'on chika chi nkojtiquir naka'an ri samaj. Pero man richin ta ri pacto ri tz'ib'an choch ri tz'ajtz'ak tak ab'aj. Ojre' naka'an ri samaj richin ri c'ac'ac' pacto ri tz'ib'an ruma ri Espíritu. Ruma ri pacto ri tz'ib'an choch ri tz'ajtz'ak tak ab'aj man nuya' ta c'aslien; re' jo'c nuc'ut chakavach chi nika ri camic pa kave'. Pero ri tz'ib'an ruma ri Espíritu, can nuya' c'aslien. 7Ri pacto ri tz'ib'an choch ri tz'ajtz'ak tak ab'aj, jo'c nuc'ut chakavach chi nika ri camic pa kave'. Pero man ruma ta re' man jun ruk'ij. Ruma can xk'alajin ruk'ij ri Dios chupalaj ri Moisés antok x'an ri pacto re'. Ri vinak israelitas man xquicoch' ta xquitz'at ri rupalaj ri Moisés, ruma xch'ich'an, y re' xa xq'uis. 8¿Manak came más ruk'ij ri pacto ri nu'on ri Espíritu Santo? 9Ruma xa c'o ruk'ij ri pacto ri ni'e'n chi ri vinak can i-pecadores y nuya' castigo pa quive'; ri c'ac'ac' pacto ri nu'on chica ri vinak chi man jun chic qui-pecado choch ri Dios, más c'o ruk'ij choch. 10Ri na'ay pacto c'o ruk'ij, pero man junan ta ruk'ij riq'uin ri c'ac'ac' pacto, ruma ri c'ac'ac' pacto más nem ruk'ij. 11Y xa xc'ujie' ruk'ij ri na'ay pacto ri man xcusas ta richin nojiel tiempo, ri jun chic pacto c'o más ruk'ij ruma jare' ri xticusas richin nojiel tiempo. 12Ruma ojre' c'o ka-esperanza riq'uin ri c'ac'ac' pacto, rumare' man nakaxi'ij ta ki' nakatzijuoj chica ri vinak. 13Antok nakatzijuoj chica ri vinak, man nic'atzin ta naka'an inche'l xu'on ri Moisés. Jaja' xutz'apij rupalaj cha jun tziak, chi quire' ri israelitas man xquitz'at ta rusakil ri rupalaj, y re' xa xq'uis-el. 14Pero ri israelitas xa cof x'an cha ri quijaluon, rumare' man xi'ka ta pa quive' (man xqui'an ta entender), y c'a quire' quib'anun vacame. Antok ni'an leer ri na'ay pacto chiquivach, man ni'ka ta pa quive' (man niqui'an ta entender), ruma c'a tz'apal quipalaj cha jun inche'l tziak y jo'c ri Cristo xtalasan-el. 15Y ijeje' c'a quire' quib'anun vacame. Antok ni'an leer chiquivach ri rutz'ib'an can ri Moisés, xa man ntuoc ta riq'uin cánima, xa can tz'apal ri cánima cha jun inche'l tziak. 16Pero antok xtitzalaj chic pa quic'u'x riq'uin ri Ajaf Jesucristo, ja xtalasas-el ri inche'l tziak. 17Antok xtiquinimaj ri Ajaf Jesucristo, ja ri Ru-Espíritu jaja' ri xtic'ujie' quiq'uin. Y pache' c'o-ve ri Ru-Espíritu jaja', can nca'colotaj pa ruk'a' ri ley. 18Xa rumare' konojiel ojre' ri kaniman chic ri Jesucristo, man tz'apal ta chic kapalaj, xa can nakatz'at ri ru-gloria ri Ajaf. Ojre' oj inche'l jun ispieja, ri nitz'iet pa kac'aslien ri ru-gloria ri Ajaf. Y ojre' k'ij-k'ij más nic'axtaj kavach y k'ij-k'ij más nitz'iet pa kac'aslien ri ru-gloria jaja'; can quire' xtaka'an hasta c'a xkojuoc-na inche'l jaja', y ja ri Ru-Espíritu ri Ajaf ri nib'ano quire' chika.

will be added

X\