2 Corintios 2

1Rumare' xin'ej-ka pa vánima chi man jun b'ay chic nqui'a iviq'uin xa b'is ni'ya' chiva. 2Ruma xa xquib'aka, y xa xtinya' b'is riq'uin ivánima, ¿chica xtib'ano chuva chi xquiquicuot? Xa niya' b'is chiva, man xti'an ta chuva chi xquiquicuot. 3Y ja mismo re' ri ya xintz'ib'aj-el chiva, chi quire' antok inre' xquib'aka iviq'uin, manak chic xquib'isuon ruma ri rub'anun ri ic'aslien, xa xquiquicuot ta ivuma, ruma nic'atzin chi quire' nti'an chuva. Y vata'n chi antok inre' xquiquicuot, quire' je' xti'an ixre'. 4Antok xintz'ib'aj-el la carta, can altíra xib'isuon y can altíra pakon xuna' ri vánima, y can xinuok' je' antok xin'an-el. Ruma riq'uin ri xintak-el rub'ixic chiva, man richin ta chi xinya' b'is chiva; ri xin'ej-el chiva xa richin chi tina'iej y titz'ata' chi inre' can altíra nquixvajo'. 5Pero ri jun ri xiruya' pa b'is, man jo'c ta chuva inre' ri quire' xu'on, xa quire' je' b'a' xu'on chiva ixre'. Y ni'ej b'a', ruma man nivajo' ta chi niya' más ruve' ri xb'anataj. 6Ri xb'ano quire' chika, man jun chic kax ti'ej cha, ruma ya xch'olix cuma quinojiel ri hermanos. 7Rumare', pa ruc'axiel chi ixre' nti'ej más tzij cha chi ntich'olij, xa tib'ana' perdonar y tib'ana' consolar. Ixre' ivata'n chi vacame jare' ri más otz nti'an cha, chi quire' ri jun re' man xtib'isuon ta más ránima y man xtumalij ta ka ruc'u'x. 8Rumare' nic'utuj favor chiva, chi tic'utu' choch ri jun re' chi ixre' ntivajo' jaja'. 9Xa ruma je' re' xintak-el ri carta chiva, chi xintz'at xa nquixniman y can nti'an nojiel ri ni'ej inre' chiva. 10Xa ixre' nti'an perdonar ri ruch'o'j, inre' je' quire' xtin'an riq'uin. Ruma inre' ya xin'an perdonar ri ruch'o'j. Y ri ruch'o'j ri xin'an perdonar, can ivuma ixre' xin'an quire'. Y choch ri Cristo xin'an perdonar, 11chi quire' man nakaya' ta lugar cha ri Satanás chi nkojruch'ec. Ruma kata'n otz chi jaja' can nrajo' chi nkojka pa ruk'a'. 12Antok inre' xib'aka pa tanamet Troas chi nitzijuoj ri ru-evangelio ri Cristo; mesque ri Ajaf xujak puerta chinoch chi xintzijuoj, 13inre' xa cha'nin xa'nya' can ri hermanos ri ic'o pa tanamet Troas y xipa Macedonia. Ruma nik'axo ri vánima ruma man xkil ta ki' riq'uin ri Tito chire'. 14Pero tiox b'a' cha ri Dios, ruma jaja' nib'ano chika chi nojiel tiempo nkuch'acuon, ruma jo'c jun kab'anun riq'uin ri Cristo Jesús. Y ri Dios can nkojrucusaj je' chi nakatzijuoj ri ruch'ab'al nojiel lugar. Y ri ch'ab'al re' nalka c'a rutzijoxic inche'l ruxla' jun jub'ul ak'uon. 15Y quire' je' ojre', can nkub'aka choch ri Dios inche'l ruxla' jun jub'ul ak'uon, ruma c'o ri Cristo kiq'uin. Ri ruxla' ri jub'ul ak'uon re' can nib'aka quiq'uin ri xca'colotaj y quiq'uin je' ri man xca'colotaj ta. 16Chica c'a ri man xca'colotaj ta, xa inche'l ruxla' jun kax ri niquimisan. Pero chica ri nca'colotaj, ri ruxla' ri ak'uon re' can nuya' ri c'aslien ri man xtiq'uis ta. ¿Y chica came nitiquir nutzijuoj ri ruch'ab'al ri Dios? 17Ojre' man naka'an ta inche'l niqui'an ri nic'aj chic chi nakatzijuoj ri ruch'ab'al ri Dios. Ijeje' xa nca'ch'acuon chirij ri ruch'ab'al ri Dios, rumare' niquiya' más ruve' y niquic'ax rub'ixic. Ojre' nakatzijuoj ri ruch'ab'al ri Dios riq'uin sak kánima, pa rub'e' ri Dios nkuch'o-ve, y choch ri Dios naka'an ri samaj, chi nakatzijuoj ri Cristo.

will be added

X\