2 Corintios 13

1Y riq'uin re' ja oxe' mul ri xquinalka iviq'uin. Y antok inc'o chic pa iviq'uin, y xa c'a ic'o ri i-kajnak chupan qui-pecado, y ic'o ica'ye' o iyoxe' ri junan xtiqui'ej chiquij, ja ri quitzij ijeje' ri xtinimax chi c'o qui-pecado y riq'uin re' xtaka'an arreglar nojiel. 2Ruma antok xic'ujie' iviq'uin ri ruca'n mul, can ya xin'ej c'a can chica, xa c'a quire' nca'jin antok xquinalka chic jun b'ay, can man xca'colotaj ta choch ri castigo ri xtakaya' pa quive'. Jare' ri nitz'ib'aj chic el chiva vacame, inche'l can inc'o-pa iviq'uin. Y quire' je' ni'ej chica quinojiel. 3Ixre' can ntivajo' ntina'iej xa ja ri Cristo nich'o-pa viq'uin antok ni'an ri samaj. Vacame ri Cristo can xtuc'ut-ve-ri' chivach vuma inre'. Can xtitz'iet chi jaja' c'o ru-poder. 4Ruma mesque ri Cristo xq'uis ruchuk'a' ri ru-cuerpo antok xcon choch ri cruz, vacame c'as ruma ri namalaj ru-poder ri Dios. Y quire' je' kab'anun ojre', can manak kachuk'a', inche'l xu'on ri ru-cuerpo ri Cristo antok xcon choch ri cruz, pero vacame can ojc'as inche'l ri Cristo, ruma jun kab'anun riq'uin jaja' y c'o ru-poder ri Dios kiq'uin. Y ruma c'o ru-poder ri Dios kiq'uin, jare' ri xtakacusaj iviq'uin. 5Vacame titz'ata-ka-ivi' ixre', xa ketzij chi cukul ic'u'x riq'uin ri Jesucristo. ¿O xa man ivata'n ta c'a chi ri Jesucristo c'o riq'uin ivánima? Ri Jesucristo c'o iviq'uin; pero xa ixre' ketzij chi iniman. 6Y inre' nivoyo'iej chi ixre' ntina'iej chi ojre' can oj richin ri Dios y jaja' can c'o kiq'uin. 7Ojre' naka'an orar pan i-cuenta, nakac'utuj cha ri Dios chi man jun itziel kax nti'an. Pero man ti'an pensar chi ojre' quire' naka'an jo'c chi tina'iej chi oj richin ri Dios y c'o ri poder pa kak'a'. Ri nakajo' ojre' chiva ja ta chi ixre' jo'c ri otz nti'an, mesque chivach ixre' man xtik'alajin ta chi ojre' c'o ri Dios kiq'uin. 8Manak che'l nakacusaj ri poder ri yo'n chika chi nakak'at ri ketzij, xa nakaya' chi ni'in ri ketzij. 9Y rumare', ojre' altíra nkojquicuot antok manak kachuk'a' y ixre' c'o ivuchuk'a'; mesque quire', ojre' c'a nakac'utuj cha ri Dios chupan ri ka-oración chi nu'on chiva chi ix utzulaj tak vinak y man jun ta chic kax nrajo' ri ic'aslien. 10Y ruma man nivajo' ta xquixch'olij antok xquinalka iviq'uin, c'a naj inc'o-ve nitz'ib'aj-el va carta va. Ruma ri poder ri yo'n chuva ruma ri Ajaf Jesucristo, can richin chi nquixto', chi niq'uiy ri ic'aslien choch ri Dios y man richin ta chi nquixq'uis. 11Hermanos, vacame nivajo' ni'ej-el chiva chi quixquicuot, titija' ik'ij chi ntichojmij ri ic'aslien, titola-ivi', can tib'ana' consolar-ivi', jo'c jun ivánima tib'ana' y man jun ta ayoval chicajol. Y ri Dios xtic'ujie' iviq'uin, jaja' ri niyo'n paz y amor. 12Tib'ana' saludar-ivi' chib'il-ivi' y titz'ub'aj ichi' pa rub'e' ri Ajaf Dios. 13Quinojiel ri santos hermanos ri ic'o vave' niquitak-el jun saludo chiva. 14Hermanos, ri nivajo' inre' chi ja ta ri ru-favor ri Ajaf Jesucristo tic'ujie' iviq'uin chi'ixvonojiel, y can tivajo-ivi' ruma ri Dios can nquixrajo'. Y ri Espíritu Santo tic'ujie' iviq'uin, y nu'on chiva chi junan ivach chi'ixvonojiel. Amén.

will be added

X\