2 Corintios 12

1Y can ketzij, chi man otz ta chi inre' nuyuon niya-ka nuk'ij. Pero vacame nivajo' nquich'o' jub'a' chirij ri xuc'ut ri Ajaf chupan jun inche'l achic', y nic'aj chic kax ri xa'ru'ej chuva. 2Inre' vata'n roch jun ache hace catorce juna' x'a chicaj y xtzalaj chic pa. Jaja' can runiman chic ri Cristo. Jaja' xuc'uax c'a chicaj, y c'a pa ruox rocaj xuc'uax-ve; ri pache' c'o-ve ri Dios. Inre' vata'n roch ri ache re', pero ri man vata'n ta che'l xuc'uax, ja ri ru-cuerpo o jo'c ri ru-espíritu, jo'c ri Dios ta'mayuon che'l xuc'uax chicaj. 3Inre' vata'n roch ri ache re', pero jo'c ri Dios ta'mayuon che'l xuc'uax chicaj, xa ja ri ru-cuerpo x'a o xa manak. 4Jo'c vata'n inre' chi jaja' xuc'uax c'a chila chupan ri lugar ri ni'e'x paraíso cha, pache' xra'xaj ch'ab'al ri man jun vinak niril tzij chi nu'ej. 5Ri ache ri xuc'uax c'a chicaj can c'o-ve ruk'ij chinoch inre', jaja' can otz-ve chi nuya' ruk'ij. Inre' man jun b'ay xtinya' ta ka nuk'ij. Pero xa ta nic'atzin chi niya' nuk'ij, nitzijuoj ri nuk'asan chupan ri nuc'aslien, ri nuc'ut chi xa inre' manak vuchuk'a'. 6Y xa inre' nivajo' niya' nuk'ij, can otz ri ni'an. Y xa ni'an quire', man ruma ta manak nuno'j. Ruma inre' jo'c ri ketzij ri ni'ej. Pero inre' man niya' ta ka nuk'ij, chi quire' man jun vinak xtiyo'n más nuk'ij, ruma ri vinak xa man jo'c ta chic ri niquitz'at o nica'xaj ri niqui'an pensar, xa can nak'ax ruve' ri niqui'ej. 7Inre' can altíra nima'k tak kax ri i-ru'e'n ri Ajaf chinoch. Y chi inre' man tinya-ka nuk'ij y chi man in nem chi ache nina-ka, rumare' can inche'l ch'icuon jun q'uix chupan ri nu-cuerpo. Ri Ajaf can xuya' permiso cha ri Satanás chi xutak-pa ri q'uix re' chi ni'an sufrir, richin chi man ni'an ta nem. 8Y rumare' inre' oxe' yan mul nuc'utun favor cha ri Ajaf chi tiralasaj-el ri k'axuon ri nina'. 9Pero jaja' xu'ej chuva: Atre' xa caquicuot riq'uin ri nu-favor ri nuyo'n chava. Ruma antok na'an sufrir y manak chic avuchuk'a' nana', jare' antok xtik'alajin ri nu-poder inre' chupan ri ac'aslien, xcha' chuva. Rumare' inre' altíra nquiquicuot, ruma antok c'o nik'asaj, nuc'ut chinoch chi manak vuchuk'a'. Y quire' ni'an chi quire' ri ru-poder ri Cristo nika pano'. 10Can altíra nquiquicuot antok ruma ri Cristo c'o ri chica nik'asaj, ruma nuc'ut chi manak vuchuk'a'. Nquiquicuot antok nquiyo'x pa q'uix, nquiquicuot antok c'o ri chica nca'c'atzin chuva y xa man jun pache' nipa-ve ri nivajo', nquiquicuot antok itziel nquitz'iet y nquiquicuot je' antok ni'an sufrir. Ruma antok inre' manak vuchuk'a' nina', jare' antok nipa más vuchuk'a'. 11Inre' xin'an inche'l xa man jun nuno'j ruma xinya-ka nuk'ij. Pero xa ixre' xixb'ano chuva chi xin'an quire', ruma ixre' ri xix'e'n chi inre' c'o nuk'ij. Can ketzij chi inre' manak nuk'ij, pero man ni'ej ta chi man jun vakalien chiquivach ri niqui'ej chi i-nima'k tak apóstoles. 12Inre' can in jun apóstol, ruma antok xin'an ri samaj chicajol, xincoch' nojiel, xinc'ut-vi' chi in jun apóstol. Can c'o ri chica xa'n'an chi quire' k'alaj chivach chi c'o ri Dios viq'uin. Ixre' xitz'at chi q'uiy milagros y señales ri xa'n'an. 13¿O ixre' xina' chi xa más co'l ik'ij xin'an chiva chiquivach ri nic'aj chic iglesias ri ic'o nic'aj chic tanamet, ruma man xinuoc ta jun aka'n chivach riq'uin nojiel ri xa'c'atzin chuva? ¡Tib'ana' perdonar ri nuch'o'j ri xin'an chiva! 14Vacame, can nuchojmin chic vi' chi nquib'aka chic jun b'ay iviq'uin. Y ja chi oxe' mul ri xquinalka iviq'uin vacame. Y antok xquinalka, man ti'an pensar chi c'o kax ri nivajo' chi ntiya' chuva. Man quire' ta. Inre' man ja ta ri c'o iviq'uin ri nivajo', ixre' ri nquixvajo'. Ruma ixre' ivata'n chi vave' choch-ulief, ja ri quitie-quitata' nca'malo ri b'ayomal chi niquiya' can chica ri calc'ual, y man ja ta ri calc'ual ri nca'malo ri b'ayomal chi niquiya' chica ri quitie-quitata'. 15Rumare' inre' can xquiquicuot xtincusaj ri c'o viq'uin, y nijach-vi' chi nquisamaj ruma altíra nquixvajo'. Mesque ixre' man nquinivajo' ta inche'l nquixvajo' inre'. 16Pero ic'o nca'e'n chuvij chi inre' man jun aka'n nuyo'n chivij riq'uin ri nic'atzin chuva, y xa ja'al vata'n ni'an engaño y ix-kajnak pa nuk'a', rumare' c'o miera ntiya' chuva. 17¿Acaso xa jun chiquivach ri xa'ntak-pa iviq'uin ri xincusaj chi xix'an engañar? 18Inre' xinc'utuj favor cha ri hermano Tito chi ti'a iviq'uin, y antok x'a, xintak-el ri jun chic hermano riq'uin. ¿Xixru'on came engañar ri hermano Tito? ¿Xitz'at came ri hermano Tito chi man ja ta ri Espíritu Santo ri c'uayuon richin? Can inche'l ri c'aslien ri vuc'uan inre', can quire' mismo ri ruc'aslien ri Tito. 19¿Nti'an pensar came ixre' chi ruma ri tzij ri xka'ej chiva nakajo' naka'an defender-ki' chivach? Ojre' can choch ri Dios nkuch'o' quire' iviq'uin, ruma jo'c jun kab'anun riq'uin ri Cristo, ruma altíra nquixkajo', y chi quire' niq'uiy ta ri ic'aslien choch ri Dios. 20Ruma inre' nixi'ij b'a' vi' chi antok xquinalka iviq'uin, man otz ta c'o ri ic'aslien inche'l ri nivajo'. Y xa quire', inre' can xtin'an ri nic'atzin inche'l nrajo' ri ic'aslien y man ja ta chic ri inche'l ntivajo' ixre'. Inre' nina' inche'l xa c'o ayoval chicajol, chi itziel nqui'tz'at ri nic'aj chic ruma otz ic'o, ic'o je' ri c'o quiyoval, ijachuon-ka-ivi', c'o itziel tak tzij nca'i'ej chiquij nic'aj chic, nquixtzijuon chirij quic'aslien vinak, man jun quik'ij nti'an chica nic'aj chic, y ic'o je' nic'aj chic kax ri nqui'an ri man i-otz ta. 21Nixi'ij b'a' vi' nquinalka chic jun b'ay iviq'uin, ruma nak xa xtukasaj nuk'ij ri Dios, ruma xa xca'nvil iq'uiy hermanos ri c'a ic'o chupan qui-pecados y man quiyo'n ta can ri itziel tak no'j, ri achi'a' y ri ixoki' c'a niquicanuj-qui' chi niqui'an pecado; man niquiya' ta can ri nca'qui'an ri itziel tak kax, y man jun quiq'uix. Nojiel re' can xtuya' ok'iej chuva, y ri Dios nucusaj ri ok'iej re' chi nukasaj nuk'ij.

will be added

X\