2 Corintios 11

1¡Inre' nic'utuj c'a favor chiva ixre' chi quinicach'o' b'a' ruma c'o tzij ri xca'n'ej chiva, inche'l rutzij jun ch'u'j! 2Inre' ja'al nquix'an cuenta ruma nivajo' nitz'at chica chi c'aslien ivuc'uan choch ri Dios, ruma jaja' b'anayuon chuva chi quire' ni'an iviq'uin. Quire' ni'an ruma ixre' xinimaj ri Cristo antok inre' xintzijuoj chiva. Nivajo' chi nti'an inche'l nu'on jun xtan ri nic'ulie' riq'uin ri ala' ri xtuoc rachajil; can ketzij chi xtan antok nic'ulie'. Can quire' rub'anun ri ic'aslien nivajo' antok xquix'a riq'uin ri Cristo chila chicaj. 3Pero inre' nixi'ij-vi' ruma man ta nib'anataj inche'l xb'anataj riq'uin ri Eva ojier can ruma ri cumatz. Ri cumatz can rata'n nu'on engaño, rumare' xu'on engañar ri Eva, y inre' man nivajo' ta chi quire' nib'anataj iviq'uin ixre'. Man nivajo' ta chi c'o jun nquixru'on engañar y nic'axtaj ri ino'j y nu'on chiva chi ntiya' can ri Cristo y man nticukub'a' ta chic ic'u'x riq'uin. 4Ruma ixre' can nika chivach antok nalka jun iviq'uin y xa man ja ta ri Jesús ri xkatzijuoj ojre' chiva ri nutzijuoj, y altíra je' nquixquicuot riq'uin antok nusuj jun chic espíritu chiva y xa man ja ta ri xyo'x chiva na'ay, y can nika je' chivach antok ni'e'x chiva chi c'o jun chic evangelio ri xquixrucol. 5Inre' man in co'l ta chiquivach ri nic'aj chic ri niqui'ej chi i-nima'k tak apóstoles ri nca'lka iviq'uin. 6Ruma mesque man can ta ja'al nquich'o', pero vata'n ja'al ri chica nca'n'ej antok nquich'o'. Y ixre' can ivata'n chi quire', ruma itz'atuon nojiel ri kab'anun. 7¿Xajan came chi xin'an ch'ute'n chivach chi xinya' ik'ij ixre'? ¿Xajan came xin'an chi man jun vajal xinc'utuj chiva antok xintzijuoj ri ru-evangelio ri Dios chiva? 8Antok inre' xin'an rusamaj ri Dios iviq'uin, ri xc'atzin chuva ja ri nic'aj chic iglesias ri ic'o nic'aj chic tanamet ri xa'yo'n-pa chuva. 9Y antok inre' xic'ujie' iviq'uin, y c'o ri chica xc'atzin chuva, man jun chivach ixre' xinya' ta aka'n chirij chi xinc'utuj ta cha ri chica xc'atzin chuva. Ri xc'atzin chuva, xa ja ri hermanos aj-Macedonia ri xa'lka viq'uin, jare' xa'yo'n can chuva. Can quire' xin'an chi quire' man jun aka'n xinya' chivij. Y c'a quire' nivajo' ni'an chupan ri k'ij chakavach-apa. 10Y ri ni'ej chiva can ketzij, ruma ri Cristo c'o riq'uin vánima. Can man jun c'a chupan ri lugar Acaya ri xtik'ilo ri ni'an. 11¿Karruma quire'? ¿Ruma came inre' man nquixvajo' ta? Ri Dios can rata'n. 12Y ri nub'anun-pa, can quire' xtin'an, ruma nivajo' nic'ut chi ri nic'aj chic ri niqui'ej chi i-rusamajiel ri Dios inche'l ojre', can man i-junan ta kiq'uin. 13Ruma ijeje' niqui'an chi apóstoles, pero xa man i-quire' ta, xa nicajo' nquixqui'an engañar. Can niqui'an chi i-apóstoles richin ri Cristo, pero xa man ketzij ta. 14Y ruma ri niqui'an ijeje', man kuchapataj, ruma xa quire' nu'on ri Satanás; jaja' nu'on inche'l jun ángel richin sakil y xa man quire' ta. 15Rumare' man kuchapataj ruma ri niqui'an ijeje', ruma ijeje' can i-rusamajiel ri Satanás y niqui'an chi can i-choj tak aj-samajiel; pero pa ruq'uisb'al, can xtiyo'x ruc'axiel chica, can inche'l ri itziel tak kax ri nca'qui'an. 16Y inre' ni'ej chic jun b'ay chiva, man jun tib'ano pensar chuvij chi in ch'u'j. Y xa quire' nti'an pensar ixre', quire' quinib'ana' recibir chi in ch'u'j y tivaxaj ri tzij ri xtin'ej. Can tib'ana' chuva inche'l in ch'u'j, chi quire' inre' je' niya' jub'a' nuk'ij. 17Man ja ta ri Ajaf x'e'n chi niya-ka nuk'ij, xa nuyuon inre' niya-ka nuk'ij, xa can inche'l in ch'u'j ri ni'an ruma ri tzij ri nca'n'ej. 18Pero ruma iq'uiy nca'e'n chi c'o quik'ij y c'o quino'j, rumare' inre' je' quire' ni'an. 19Quire' ni'an ruma ixre' altíra nca'ka chivach y ja'al nqui'an recibir ri xa man jun kax cata'n, y ixre' nti'ej chi altíra ino'j. 20Ixre' can nquixtiquir nqui'coch' ri vinak re' y can otz ntina' chi niqui'an chiva chi ix inche'l qui-esclavos. Can otz chivach chi c'o niquich'ec ijeje' chivij y can nca'uoc ivajaf, can man jun ivakalien chiquivach, y can niquipak' ipalaj. 21Mesque q'uix chinoch inre' ni'ej re' chiva, pero xka'an chi manak kachuk'a' chi xka'an inche'l niqui'an ri nic'aj chiva. Pero xa ri nic'aj chic man niquixi'ij ta qui' niqui'ej chi c'o quik'ij, inre' je' nquitiquir ni'an quire'. Mesque ri tzij ri xca'n'ej chiva can inche'l ri rutzij jun ch'u'j. 22¿Ijeje' hebreos? Inre' je'. ¿Ijeje' israelitas? Inre' je'. ¿I-rumáma can ri Abraham ijeje'? Inre' je'. 23¿I-rusamajiel ri Cristo ijeje'? Inre' je'. Pero vacame nquich'o' inche'l in ch'u'j, inre' más in-samajnak chiquivach ijeje'. Inre' más in-ch'ayuon chiquivach ijeje', hasta man nalka ta chic pano' jane' (jaro') mul in-ch'ayuon. Inre' xic'ujie' pa cárcel q'uiy mul chiquivach ijeje'. Inre' q'uiy mul jub'a' ma nquiquimisas. 24Ri nuvanakil israelitas vu'uo' mul in-quich'ayuon cha tz'un; can treinta y nueve b'ic c'a quiyo'n cada mul. 25Oxe' mul ri xich'ay cha xic'a'y. Jun mul xinquic'ak cha ab'aj. Oxe' mul jub'a' ma nquicon chupan ri mar ruma ri barco pache' in-b'anak-ve xka-ka chuxie' ya'. Jun mul xic'ujie' jun k'ij y jun ak'a' paro' ri mar. C'a naj c'o-ve ri ruchi' antok xb'anataj quire'. 26Q'uiy kax ri nuk'asan ri pa tak b'ay ruma rusamaj ri Dios. Ruma ri b'ay ri pache' in-k'axnak-ve ic'o ríos ri niquiya' xib'inre'l, ic'o alak'oma', ic'o nuvanakil israelitas ri itziel nquinquitz'at y quire' je' mismo niqui'an ri vinak ri man i-nuvanakil ta, xib'inre'l pa tak tanamet, xib'inre'l pa tak lugar desierto, xib'inre'l paro' ri mar, y xib'inre'l pa quik'a' i-falsos hermanos. 27Inre' altíra in-samajnak y rumare' nuk'asan cosic, q'uiy mul nucach'uon varan, nucach'uon vi'jal ruma manak nuvay y nucach'uon je' chakej-che', q'uiy mul man xiva' ta ruma ri samaj, nucach'uon tief y c'o q'uiy mul manak chic nutziak chi nimutz-vi'. 28Y man jo'c ta re', ruma c'o nic'aj chic kax ri niquimol-pa-qui' chuvij. K'ij-k'ij nina' ri ralal ri samaj ruma nca'nc'uxlaj quinojiel ri iglesias. 29¿O c'o came jun hermano ri nuna' chi manak ruchuk'a' pa ruc'aslien, y inre' man jun kax nina'? Inre' quire' je' nina'. ¿O c'o came jun hermano nitzak ruma jun chic y inre' man jun kax nina' ruma ri x'an cha? Man quire' ta. Ri vánima can nik'axo ruma ri x'an cha. 30Nojiel ri xin'ej nuc'ut chi inre' xa in vinak y manak vuchuk'a'. Y antok inre' nic'atzin niya-ka nuk'ij, jare' nicusaj chi niya' nuk'ij. 31Can ketzij ri ni'ej. Ri Dios, ri Rutata' ri Kajaf Jesucristo, ri niyo'x ruk'ij richin nojiel tiempo, rata'n chi inre' man nitz'ak ta tzij. 32Antok xic'ujie' pa tanamet Damasco, ri gobernador ri yo'n chire' ruma ri rey Aretas xu'ej chi quitz'am antok xquitz'iet. Xa'ruya' chajiniel ri pache' nca'iel-el y nca'uoc ri vinak chupan ri tanamet chi nquitz'am. 33Y can xicolotaj pa quik'a', ruma xiyo'x-el chupan jun chacach y xikasas-ka pa jun ventana richin ri muro.

will be added

X\