2 Corintios 10

1Inre' Pablo, nic'utuj jun favor chiva; can riq'uin nuno'j y riq'uin paciencia nic'utuj, can inche'l xu'on ri Cristo. Pero ic'o nca'e'n: Antok ri Pablo c'o kiq'uin, can nu'on ch'ute'n, y antok nitzijuon je', can akal nich'o' y manak nich'olin, pero antok naj c'o-ve, xa man quire' ta chic nu'on kiq'uin; xa can pakon ri tzij ri nca'ru'ej. 2Ri favor ri nic'utuj chiva, ja chi ib'anun ta chic arreglar nojiel antok inre' xquinalka iviq'uin. Ruma xa man ib'anun ta arreglar nojiel antok xquinalka, inre' xquib'ano arreglar. Y inre' man nivajo' ta ni'an re', ruma man nivajo' ta nicusaj chivij ixre' ri poder ri ruyo'n ri Dios pa nuk'a', inche'l ri nub'anun pensar ni'an chica ri nca'e'n chuvij chi xa ja ri nirayij inre' ri ni'an. 3Can ketzij chi oj vinak, pero ojre' man naka'an ta inche'l niqui'an ri nic'aj chic vinak, ri xa ja ri quichuk'a' niquicusaj. 4Ri nakacusaj ojre' man ja ta ri kachuk'a'. Ri nakacusaj ojre' chi naka'an ayoval riq'uin ri itziel, ja ri ru-poder ri Dios; rumare' nkuch'acuon chirij ri itziel. 5Can nca'kakasaj nojiel tzij ri man ketzij ta ri nca'palaj-pa, y nca'kakasaj quino'j quinojiel vinak ri niquina' chi i-nima'k y man niquiya' ta lugar chi nitamax roch ri Dios. Nojiel quino'j vinak nca'kaya' pa ruk'a' ri Cristo chi quire' nca'niman y niqui'an ri nrajo' jaja'. 6Y antok ixre' xquixniman y xti'an ri nu'ej ri ruch'ab'al ri Dios chiva, jare' antok c'o che'l xca'ka'an castigar ri nic'aj chic ri man nca'niman ta. 7Ixre' itziel nquixch'o' chirij jun, ruma ixre' jo'c nquixtiquir nquixch'o' chirij ri ntitz'at, pero man ntitz'at ta ri otz ri c'o riq'uin ránima. Xa c'o jun ri nuna' chi jaja' can richin chic ri Cristo, quire' je' tub'ana' pensar chikij ojre', chi oj richin chic ri Cristo. 8Ojre' oj rusamajiel ri Ajaf Jesucristo, ruma jaja' can ruyo'n autoridad pa kak'a', y ojre' c'o jub'a' más ruyo'n pa kak'a'; re' man q'uix ta chi ni'ej chiva, chi niya' jub'a' nuk'ij antok ni'ej nojiel re' chiva. Ojre' man ojc'o ta chi nakaq'uis pan ive', ojre' ojc'o chi nquixkato', chi quire' niq'uiy ri ic'aslien choch ri Dios. 9Inre' man nivajo' ta chi ixre' nti'an pensar chi ri cartas ri nca'ntak chiva xa richin chi nquixxi'ij. 10Ruma ketzij chi ic'o chivach ixre' niqui'ej chi antok inre' nca'ntak-el ri cartas chiva, nca'ntz'ib'aj-el tzij ri can cof y can i-pakon. Pero antok nquinalka iviq'uin xa man jun vuchuk'a', ni man jun quikalien ri nca'n'ej. 11Y chica ri nca'e'n quire' nivajo' ni'ej, chi can inche'l ri katz'ib'an-el chupan ri cartas ri i-katakuon-el, can quire' je' xtalkab'ana' antok xkojalka iviq'uin. 12Ojre' man naka'an ta inche'l ri niqui'an ri nic'aj chic, ni man nakayuj ta ki' quiq'uin, y man oj junan ta je' quiq'uin, ruma ijeje' quiyuon niqui'an chi i-nima'k. Ijeje' xa man otz ta ri niqui'an pensar, ruma xa quino'j ijeje' ni'e'n quire' chica. Chiquivach ijeje', ja ijeje' ri más i-otz. 13Ojre' man xtaka'an ta inche'l niqui'an ijeje', chi chica-na lugar niquiju-ve-qui' jo'c chi ca'tz'iet chi altíra quik'ij. Ri kasamaj ojre' jo'c nalka pache' nrajo' ri Dios y man nakamaj ta quisamaj ri nic'aj chic. Ri samaj ri ruyo'n ri Dios chuva inre' y chica ri vach'il, nalka je' c'a iviq'uin ixre'. 14Ojre' jo'c pache' yo'n-ve permiso chika ruma ri Dios, chire' oj-samajnak-ve; quire' kab'anun chicajol ixre'. Y ojre' ri xojalka na'ay iviq'uin, kac'amun-pa ri ru-evangelio ri Cristo, ruma jare' nrajo' ri Dios. 15Ojre' man nakaya' ta ka kak'ij ruma ri samaj ri xa b'anun cuma nic'aj chic. Ri kayo'ien ojre' ja chi niq'uiy ri ic'aslien choch ri Dios y nkojito', chi quire' más naj nib'aka ri ruch'ab'al ri Dios. Ruma ri Dios quire' nrajo', chi nakuc'uaj ri ruch'ab'al nic'aj chic lugar ri pache' nrajo' jaja'. 16Y ojre' xtakatzijuoj ri evangelio más c'a naj choch ri itanamit. Y quire' je', ojre' man nakajo' ta nkub'aka pache' c'o chic samaj b'anun. Ojre' man otz ta nakaya-ka kak'ij ruma ri samaj ri b'anun cuma nic'aj chic. 17Y xa c'o jun nrajo' nuya-ka ruk'ij, ri más otz nu'on, tuya' ruk'ij ri Ajaf. 18Ruma ri ni'e'n chi c'o ruk'ij, man aprobado ta choch ri Dios. C'a ja ri Dios ri xti'e'n, xa c'o ruk'ij o xa manak.

will be added

X\