2 Corintios 1

1Inre' Pablo, in ru-apóstol ri Jesucristo ruma quire' nrajo' ri Dios. Can junan ojc'o riq'uin ri hermano Timoteo antok nitak-el va carta va chiva ixre' hermanos ri ix ru-iglesia ri Dios ri ixc'o pa tanamet Corinto. Va carta va man jo'c ta ivichin ixre', xa quichin je' quinojiel ri santos hermanos ri ic'o nic'aj chic tanamet chupan ri Acaya. 2Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 3Kaya' ruk'ij ri Dios, ri Rutata' ri Kajaf Jesucristo. Jaja' jun Tata'j ri nujoyovaj quivach ri ralc'ual, y jaja' ri Dios ri nuya' consolación. 4Y jaja' ri nib'ano consolar kichin antok ojc'o chupan sufrimiento, chi quire' antok ojre' nakatz'at chi ic'o hermanos ri ic'o chupan sufrimiento, can nkojtiquir nca'ka'an consolar je' inche'l nu'on ri Dios chika ojre'. 5Can altíra ri sufrimiento nakak'asaj ojre', can inche'l ri xuk'asaj ri Cristo. Pero ri Cristo can altíra je' nkuru'on consolar antok naka'an sufrir. 6Y xa naka'an sufrir, can nkojtiquir nquixka'an consolar ixre' y nquixcolotaj. Y xa ri Dios nkuru'on consolar ojre', can richin chi ojre' je' nkojtiquir nquixka'an consolar ixre' y nquixcolotaj. Y re' nu'on chiva chi nquixtiquir nticoch' ri sufrimiento ri inche'l nakak'asaj ojre'. 7Ojre' c'o ka-esperanza chi ixre' man xtiya' ta can ri Cristo. Can kata'n chi nti'an sufrir inche'l ojre'. Rumare' kata'n je' chi ri Dios nquixru'on consolar inche'l nu'on kiq'uin ojre'. 8Hermanos, can nic'atzin chi ntina'iej otz chirij ri sufrimientos ri xkak'asaj ojre' antok xojc'ujie' chupan ri lugar rub'inan Asia. Ri kachuk'a' ri c'o man xtiquir ta chic ruma ri xqui'an ri vinak chika. Can xka'an pensar chi man chic nkojc'asie' ta. 9Can xkana' chi man nkojcolotaj ta chic choch ri camic, pero re' xa richin chi xuc'ut chakavach chi kayuon ojre' man jun kachuk'a', xa riq'uin ri Dios ri nic'atzin chi nakacukub'a' kac'u'x, ruma jaja' c'o ru-poder chi nca'ruc'asuoj ri quiminaki'. 10Y jaja' ri xcalo kichin choch ri camic, y vacame je' nkojrucol choch ri camic. Y kacukub'an kac'u'x riq'uin jaja' chi ri tiempo ri chakavach-apa, xkojrucol je' choch ri camic. 11Rumare' kojib'ana' ayudar je' ixre' riq'uin ri oración, chi quire' iq'uiy je' ri niquiya' tiox b'a' cha ri Dios, antok niquitz'at ri favor ri nu'on-pa jaja' chika ojre' ruma ri oración ri nti'an ixre' pa ka-cuenta. 12Ojre' c'o choj-uma nkojquicuot: Ojre' nkojquicuot ruma ja mismo ri kajaluon y ri kánima ni'e'n-pa chika chi ri nca'ka'an xa riq'uin sak kánima, y can ketzij choch ri Dios nojiel ri nca'ka'an. Man runo'j ta ache ri nakacusaj. Ojre' nkojtiquir naka'an quire' ruma ri ru-favor ri Dios. Can quire' ri kac'aslien ri kac'utun chiquivach ri ic'o choch-ulief, pero ixre' hermanos más itz'atuon ri kac'aslien. Más ivata'n ri chica c'aslien kuc'uan. 13Mare' ri tzij ri nitz'ib'aj-el chiva man jun chic kax más nu'ej, xa jo'c chirij ri xitz'at yan y can ivata'n je' ja'al. Ri nirayij inre', ja chi ni'ka ta pan ive' (nti'an ta entender) nojiel, ri pa rutz'ucb'al hasta c'a pa ruq'uisb'al. 14Ixre' xi'ka yan pan ive' (xi'an yan entender) jub'a' chi kuma ojre', nquixquicuot vacame. Y can inche'l nquixquicuot ixre' kuma ojre' vacame, quire' je' ojre' xkojquicuot ivuma ixre' chupan ri k'ij antok ri Ajaf Jesús xtipa chic jun b'ay. 15Inre' ruma cukul nuc'u'x iviq'uin, xinvajo' ta xinak'ax iviq'uin na'ay, chi quire' ca'mul ta xtuc'am-pa bendición chiva. 16Can xin'an pensar chi nquinak'ax iviq'uin antok xquipa Macedonia, y antok nquitzalaj-pa Macedonia, iviq'uin chic ixre' nquib'ac'ujie-ve, y ixre' ri nquixto'n vichin riq'uin ri nic'atzin chuva chupan ri nub'iey chi nquitzalaj Judea. 17¿Nti'ej came ixre' chi antok inre' xin'an pensar quire' man xin'an ta pensar otz? ¿O nti'ej came ixre' chi inre' xa jo'c riq'uin ri nuchi' ni'ej sí, inche'l niqui'an ri nic'aj vinak, y ri vánima xa man quire' ta nu'ej? 18Inche'l ri Dios can nu'on-ve ri nu'ej; can quire' je' ojre'. Ruma antok ojre' naka'ej sí, can ja-ve re' c'o pa kánima. Y man jun b'ay naka'ej chiva sí y xa man quire' ta ri c'o pa kánima. 19Ri hermano Silvano, ri hermano Timoteo y inre', ri xkatzijuoj ri Jesucristo ri Ruc'ajuol ri Dios chiva, man nakac'ax ta katzij. Ojre' can oj inche'l ri Jesucristo, jaja' man nuc'ax ta ri nu'ej; jaja' can nu'on ri nu'ej. Man jun b'ay nu'ej sí y xa man quire' ta c'o pa ránima. 20Ruma nojiel ri ranun prometer ri Dios chi nuya' chika, can riq'uin c'a ri Cristo nikil-ve y rumare' ojre' can pa rub'e' ri Jesucristo naka'ej chi quire'. Quire' naka'ej chi nakaya' ruk'ij ri Dios. 21Y ja ri Dios ri b'anayuon chika chi cof oj-pa'l riq'uin ri Cristo, y jaja' je' ri xojrucha' chi naka'an ri rusamaj. Quire' rub'anun iviq'uin ixre' y kiq'uin je' ojre'. 22Ri Dios je' oj-rub'anun sellar, ruma ruyo'n ri Espíritu Santo riq'uin kánima, y jare' ri ratal chi ketzij chi c'o ri xtiyo'x chika ruma ri Dios. 23Pero inre' can choch ri Dios ni'ej chiva ri chica c'o riq'uin vánima y karruma man in-k'axnak ta iviq'uin. Xa ruma altíra nijoyovaj ivach y man nivajo' ta nquixch'olij, mare' man in-k'axnak ta Corinto. 24Ixre' man ti'an pensar chi inre' y ri vach'il nquixka'an mandar riq'uin ri chica otz ntinimaj, man quire' ta. Ojre' jo'c nakajo' nquixkato', chi quire' más niquicuot ri ivánima, ruma ixre' can icukub'an ic'u'x riq'uin ri Cristo y cof ix-pa'l.

will be added

X\