1 Timoteo 6

1Quinojiel ri hermanos esclavos, can ca'quib'ana' respetar ri cajaf, chi quire' man jun kax itziel ni'e'x chirij ri Dios y ri ruch'ab'al. 2Y xa ic'o hermanos esclavos ri c'o cajaf ri quiniman ri Dios, man tiqui'an chica chi man jun quikalien ruma ijeje' hermanos. Pa ruc'axiel re', xa más otz tiquib'ana' cha ri quisamaj, ruma quiniman ri Dios y ruma nca'cajo'. Y atre' Timoteo, ni'ej c'a chava chi tac'utu' y ta'ej chica ri hermanos chi tiquib'ana' nojiel re'. 3Xa c'o jun ri jun chic nuc'ut chiquivach ri hermanos, y man junan ta riq'uin ri utzulaj ch'ab'al richin ri Kajaf Jesucristo, y ri nuc'ut man junan ta riq'uin ri ch'ab'al ri nuc'am-pa jun c'aslien ri nika choch ri Dios; 4ri nib'ano quire', ruyuon jaja' nem nuna-ri'. Jun quire', man jun runo'j, ruma jo'c tzij ri man jun quikalien ri nca'ru'ej chiquij kax ri man jun nca'c'atzin-ve. Y rumare' itziel nutz'at jun chic ruma otz c'o. Nutz'uc ayoval, itziel nich'o' chiquij nic'aj chic, y itziel nu'on pensar chiquij nic'aj chic. 5Y nu'on chi nitz'ucutaj ayoval chiquicajol nic'aj chic ri c'axtajnak je' ri quino'j ruma ri itziel y man cata'n ta ri ruch'ab'al ri Dios ri ketzij. Ijeje' nicajo' nca'b'ayomer ruma niquic'ut ri ruch'ab'al ri Dios. Atre' man tayuj-avi' quiq'uin ri nca'b'ano quire'. 6Pero ri más nem ch'acuoj, ja ri niquicuot nuc'uaj jun c'aslien ri nika choch ri Dios. 7Ruma antok xojalax, man jun kax kac'amun-pa. Y rumare' kata'n chi antok xkucon, man jun kax je' xtakuc'uaj. 8Mare' kojquicuot riq'uin ri kavay y ri katziak, y man jun chic chica takarayij. 9Pero ri vinak ri niquirayij nca'b'ayomer, nca'ka cha'nin chupan ri pecado. Y ruma altíra niquirayij ri b'ayomal, ja nca'ka pa trampa. Can niquirayij chica-na kax ri man jun quikalien. Y rumare' q'uiy kax itziel xtib'anataj chica chupan quic'aslien, y xca'ruc'uaj chupan ri castigo ri man niq'uis ta. 10Ruma ri ni'a ránima chirij ri miera, chire' nipa-ve nojiel roch itziel. Y ic'o ri ya xquiya' can ri Dios ruma x'a cánima chirij ri miera, y ri miera xa q'uiy sufrimiento xuc'am-pa chica. 11Pero atre' Timoteo at rusamajiel ri Dios, man ta'an quire'. Xa tatija' ak'ij navuc'uaj jun c'aslien otz, siempre tab'ana' ri nika choch ri Dios, siempre tacukub'a' ac'u'x riq'uin ri Dios, ca'vajo' quinojiel, tic'ujie' a-paciencia, y otz ano'j tab'ana'. 12Can riq'uin nojiel avánima tatija' ak'ij chi na'an ri utzulaj batalla richin ri cukb'al c'u'x. Man taya' can ri utzulaj c'aslien, ri c'aslien re' man xtiq'uis ta. Y ja c'aslien re' xavil antok xarayuoj ri Dios. Jare' ri xyo'x chava antok chiquivach iq'uiy xa'ej chi xanimaj. 13Y vacame nivajo' ni'ej chava, y can choch ri Dios ni'ej-ve, ri Dios ri niyo'n quic'aslien quinojiel kax. Y choch je' ri Jesucristo ni'ej-ve, ri Jesucristo ri man xuxi'ij ta ri' xu'ej ri ketzij choch ri gobernador Poncio Pilato. Y jare' ri nivajo' ni'ej chava: 14Tab'ana' nojiel ri nu'ej ri ru-mandamiento ri Dios y man tac'ax rub'ixic. Tavuc'uaj jun c'aslien otz chi quire' man jun kax nilitaj chavij. Quire' tab'ana', c'a xtipa-na ri Kajaf Jesucristo. 15Y ja ri Dios xtitako-pa ri Jesucristo antok xtalka ri tiempo. Y ja ri Dios ri rakalien chi niyo'x ruk'ij, c'o paro' nojiel, jaja' ri Namalaj Rey pa quive' quinojiel reyes y Namalaj Ajaf pa quive' quinojiel ajaf, 16y jo'c jaja' ri man nicon ta. Jaja' can pa sakil c'o-ve, y man jun nitiquir ntuoc riq'uin. Ni man jun vinak tz'atayuon, y man jun je' nitiquir nitz'ato richin. Y jaja' c'o ru-autoridad richin nojiel tiempo y tiyo'x je' ruk'ij richin nojiel tiempo. Amén. 17Timoteo, inre' nivajo' chi na'ej chica ri hermanos ri i-b'ayoma' vave' ri choch-ulief chi man tiqui'an chi i-nima'k tak vinak. Y ta'ej je' chica chi man tiqui'an pensar chi ri b'ayomal nojiel otz nuc'am-pa chica, ruma ri b'ayomal xa niq'uis. Xa can tiquiya' cánima riq'uin ri c'aslic Dios ri niyo'n-pa nojiel chika, chi niquicuot ri kánima riq'uin ri q'uiy ri ruyo'n-pa chika. 18Ta'ej chica ri b'ayoma' chi jo'c utzulaj tak kax tiquib'ana', y chi i-b'ayoma' ta je' riq'uin ri otz ri niqui'an chica nic'aj chic. Man tiquic'aq'uiej niquiya' chica ri nic'aj ri nic'atzin chica. Xa can ca'quito'. 19Y quire' niquimol yan apa ri quib'ayomal richin chicaj ri xtic'atzin chica inche'l jun cimiento, chi quire' ntuoc quichin ri c'aslien ri man niq'uis ta. 20Y atre' Timoteo, tab'ana' cuenta ri samaj ri yo'n chava. Man ca'vaxaj ri tzij ri xa man riq'uin ta ri Dios i-patanak-ve, ri xa i-richin ri roch-ulief, y xa man jun otz niquic'am-pa chava. Man ca'vaxaj je' ri vinak ri nca'ch'o' itziel chirij ri ruch'ab'al ri Dios. Ijeje' niqui'ej chi c'o quino'j, y xa man jun cata'n. 21Y ic'o ri xquinimaj yan ri tzij re'. Y rumare' xa'sach, y xa'iel chupan ri cukb'al c'u'x riq'uin ri Dios. Ja ta ri ru-favor ri Dios tic'ujie' aviq'uin. Amén.

will be added

X\