1 Timoteo 5

1Xa c'o jun hermano mámix chic ri nu'on ruch'o'j, man cach'o' cof cha, xa akal cach'o' cha. Xa can inche'l atata' tab'ana' cha. Y ri c'ajola', inche'l i-achak' i-animal tab'ana' quiq'uin. 2Y chica ri ch'itak avala'i' chic, tab'ana' chica chi i-inche'l atie'. Y ri xtani', tab'ana' chica chi i-inche'l avana', y man jun itziel na'an pensar chiquij. 3Y xa ic'o malca'n-ixoki' ri ketzij man jun nilin quichin, ca'to'. 4Pero xa c'o jun malca'n-ixok ri ic'o ral o riy, ijeje' qui'lin richin. Ruma ijeje' can nic'atzin nicatamaj chi na'ay ja ri pa cachuoch tiquic'utu' jun c'aslien ri nika choch ri Dios. Can tiquitzoliej ruc'axiel chica ri quitie-quitata', ruma jare' ri otz y ja'al nika choch ri Dios. 5Pero ri malca'n-ixok ri ketzij ruyuon c'o, can rucukub'an ruc'u'x riq'uin ri Dios y man nitanie' ta chi nuc'utuj favor y nu'on orar chi pak'ij chi chak'a'. 6Pero ri malca'n-ixok ri jo'c nu'on ri nrajo' ri ru-cuerpo, xa quiminak choch ri Dios. 7Ta'ej chica ri hermanos chi tiquinimaj nojiel ri ni'ej, chi quire' man jun kax itziel xtilitaj chiquij. 8Y nic'atzin chi nca'quito' ri cach'alal, pero más nic'atzin chi nca'quilij ri ic'o pa cachuoch. Y xa c'o jun ri man nu'on ta quire', jaja' nu'on inche'l xa man rucukub'an ta ruc'u'x riq'uin ri Dios, xa más itziel ruc'aslien chiquivach ri vinak ri man quiniman ta ri Jesucristo. 9Ri malca'n-ixok otz chi nitz'ib'as rub'e' chupan ri lista chi nilix, ja ri c'o sesenta rujuna', xc'ujie' jo'c jun rachajil, 10xa ata'n chi c'o otz rub'anun, xa i-ruq'uiytisan otz ri ral, xa ja'al ruyo'n qui-posada nic'aj chic, xa i-ruch'ajuon cakan ri santos hermanos, xa i-ruto'n ri niqui'an sufrir y xa i-rub'anun nic'aj chic utzulaj tak kax. 11Pero ri malca'n-ixoki' ri c'a maja' más quijuna', man titz'ib'as quib'e' chupan ri lista chi nca'lix cuma ri hermanos. Ruma ijeje' nca'tiquir niqui'ej chi quiyuon nicajo' nca'c'ujie' chi niqui'an rusamaj ri Cristo. Pero después, xtiquimastaj ri qui'e'n y xticajo' nca'c'ulie' chic jun b'ay. 12Y ruma man xqui'an ta ri xqui'ej na'ay, y xquic'ax quitzij, ri Dios can xtuya' qui-castigo. 13Y quire' je', xa man nca'c'ulie' ta, niquitz'om k'oral, nca'a chi tak jay; y man jo'c ta chic nca'k'oran, xa nca'quimol je' tzij y nika chiquivach niquiju-qui' pache' na, y niqui'ej tzij ri man otz ta chi niqui'ej. 14Rumare' ni'ej chica ri malca'n-ixoki' ri c'a maja' más quijuna', chi ca'c'ulie' chic jun b'ay. Ca'c'ujie' cal, can tiquib'ana' cuenta cachuoch; chi quire' ri vinak ri itziel nca'tz'ato kichin, man jun kax itziel xtiqui'ej chikij. 15Ruma ic'o nic'aj malca'n-ixoki' ri xquiya' can ri utzulaj c'aslien y vacame xa i-b'anak chirij ri nrajo' ri Satanás. 16Xa c'o jun hermano ache o ixok ri c'o jun ru-familiar ixok ri xa malca'n, ijeje' qui'lin richin, chi quire' ri malca'n-ixok re' man ntuoc ta jun aka'n chirij ri iglesia. Chi quire' nca'to'x ri malca'n-ixoki' ri ketzij man jun nilin quichin. 17Ri ancianos richin ri iglesia ri ja'al niqui'an gobernar, can ca'an respetar y ca'tuoj otz; pero ri más rakalien ni'an quire' chica, ja ri niqui'an predicar y niquic'ut ri ruch'ab'al ri Dios. 18Ruma ri tz'ib'an can chupan ri ruch'ab'al ri Dios nu'ej: Antok ri tuora nuxak' ruve' ri trigo, man tiyo'x ruk'asal chirutza'n. Y nu'ej je': Ri aj-samajiel can nic'atzin chi tituoj ruma ri samaj ri nu'on. Quire' ri tz'ib'an can. 19Y ni'ej je' chava: Xa c'o jun anciano richin ri iglesia ri ni'e'x chirij chi xu'on ch'o'j, y jo'c jun ri nib'ano acusar richin, man tanimaj. Nic'atzin chi ic'o ica'ye' o iyoxe' ri junan niqui'ej chirij, jare' tanimaj. 20Y xa c'o jun quire' najin riq'uin ri pecado, tach'olij chiquivach quinojiel chi quire' ri nic'aj chic niquixi'ij-qui' niqui'an pecado. 21Y choch ri Dios y choch ri Ajaf Jesucristo y chiquivach ri ángeles ri i-cho'n ruma ri Dios, ni'ej chava atre' Timoteo, chi junan y choj tab'ana' quiq'uin quinojiel. 22Man taya' ak'a' cha'nin paro' jun ri xa man avata'n ta ri chica rub'anun ri ruc'aslien, chi quire' man navakaliej ta ri ru-pecados ri i-rub'anun. Can tab'ana' cuenta-avi' chi quire' sak nic'ujie' ri ac'aslien. 23Atre' Timoteo, man otz ta chi jo'c ya' ri nakun; takumu' je' jub'a' vino chi otz nuna' ri apan y ruma chike ncayavaj. 24Ic'o vinak ri nitz'iet chi c'o qui-pecados antok c'a maja' ca'an juzgar, pero ic'o je' ri man cha'nin ta nitz'iet ri qui-pecados, xa c'a después. 25Y quire' je', ri niqui'an favor chica ri vinak can nik'alajin. Mesque c'o nic'aj chic favor ri man k'alaj ta, pero nik'alajin-pa.

will be added

X\