1 Timoteo 4

1Y ja'al k'alaj ri nu'ej ri Espíritu Santo, chi chupan ri ruq'uisb'al tak k'ij, ic'o ri xtiquiya' can ri ruch'ab'al ri Dios y ri cukb'al c'u'x. Ri xtica'xaj xa ja yan chic ri tzij ri patanak quiq'uin ri itzal tak espíritus y quiq'uin ri espíritus ri niqui'an maña. 2Xtica'xaj ri niqui'ej ri xa ca'ye' quipalaj y jo'c tz'akon tak tzij niqui'an, ri man jun chica nuna' ri quijaluon y ri cánima antok niqui'an jun kax itziel. 3Ijeje' xtiqui'ej chica ri vinak chi man chic ca'c'ulie'. Xtiqui'ej je' chi ic'o kax ri man otz ta nca'tij, kax ri ja ri Dios ri b'anayuon chi i-otz chi nca'tij y nic'atzin chi nakaya' tiox b'a' cha. Ruma jare' nrajo' chika ojre' ri kata'n chic ri ketzij y kaniman rub'e'. 4Ruma nojiel ri xu'on ri Dios, can otz. Y rumare' man taka'ej chi man otz ta nca'tij. Xa nakaya' tiox b'a' cha ri Dios antok nakatej, 5ja ri ruch'ab'al ri Dios y ri oración nu'on sak cha. 6Atre' Timoteo, xa xca'tijuoj ri hermanos riq'uin ri xin'ej yan chava chupan va carta va, ncatuoc jun utzulaj rusamajiel ri Jesucristo, ncaq'uiy chirij ri ch'ab'al ri nich'o' chirij ri cukb'al c'u'x y xcaq'uiy je' riq'uin ri ketzij ri c'utun chavach, ri animan. 7Man ca'vaxaj ri tzij ri man riq'uin ta ri Dios i-patanak-ve, xa quitzij ri avala'i' ri man jun quino'j. Atre' xa tatija' ak'ij navuc'uaj jun c'aslien otz choch ri Dios. 8Ri ejercicio nuya' jub'a' ruchuk'a' ri a-cuerpo, pero ri más nic'atzin ja chi navuc'uaj jun c'aslien otz choch ri Dios. Ruma otz xtu'on chava chupan ri ac'aslien vave' ri choch-ulief y chupan je' ri ac'aslien ri chakavach-apa. 9Ri ni'ej, can ketzij y can otz chi ninimax cuma quinojiel. 10Rumare' nkusamaj y naka'an sufrir, ruma kacukub'an kac'u'x riq'uin ri c'aslic Dios. Jaja' nrajo' nca'rucol quinojiel ri vinak, pero ri nca'rucol ja ri nca'niman richin. 11Y atre' Timoteo, ca'tijuoj ri hermanos riq'uin nojiel re' y ta'ej chica chi jare' tiquib'ana'. 12Man jun c'a tib'ano chava chi man jun avakalien ruma c'a at c'ajuol. Catuoc ejemplo chiquivach ri hermanos riq'uin ri tzij ri nca'ej. Can ca'vajo' quinojiel, can otz tab'ana', tac'utu' chi at-uc'uan ruma ri Espíritu Santo, chi acukub'an ac'u'x riq'uin ri Dios y chi sak ac'aslien. 13Y inre' nivajo' chi atre' na'an leer ri ruch'ab'al ri Dios chiquivach ri hermanos. Ta'ej chica chi tiquiya' cánima riq'uin ri Dios, y ca'tijuoj riq'uin ri ruch'ab'al ri Dios. Quire' tab'ana', hasta c'a xquinalka inre'. 14Man timastaj chava chi ri a-don ja ri Dios sipayuon chava; y xyo'x chava antok ri ancianos richin ri iglesia xquiya' quik'a' pan ave' y ruma ri profecía ri xqui'ej. 15Can riq'uin nojiel avánima tab'ana' ri samaj, chi quire' ncatz'iet cuma quinojiel chi k'ij-k'ij ncaq'uiy y ncatuoc jun utzulaj rusamajiel ri Dios. 16Tab'ana' cuenta-avi', can tatz'ata' otz ri chica na'an, y quire' je' tab'ana' riq'uin ri nac'ut chiquivach ri hermanos. Y man taya' can ri asamaj, chi quire' xtacol-avi' atre' y xca'col je' ri xca'c'axan avichin.

will be added

X\