1 Timoteo 1

1Inre' Pablo, in ru-apóstol ri Jesucristo, ruma quire' xu'ej ri Dios ri nicalo kichin, y quire' je' xu'ej ri Kajaf Jesucristo ri ka-esperanza. 2Nitak-el va carta va chava atre' Timoteo, ri can at inche'l nuc'ajuol ruma acukub'an ac'u'x riq'uin ri Jesucristo. Ja ta ri favor, ri misericordia y ri paz ri nuya' ri Katata' Dios y ri Kajaf Jesucristo tic'ujie' riq'uin avánima. 3Y inche'l ri xin'ej can chava antok xipa vave' Macedonia, quire' je' ni'ej chava vacame; chi cac'ujie' chire' pa tanamet Efeso, ruma chire' ic'o ri man ja ta ri ketzij ch'ab'al ri niquic'ut. Y nic'atzin chi na'ej chica chi man tiquic'ut chic re'. 4Nic'atzin je' na'ej chica chi man tiquiya' quixiquin cha ri tzij ri nitzijos chiquij ri vinak ri xa'c'ujie' ojier can y nic'aj chic tzij ri choj i-maluon-ka; ri tzij quire' nuc'am-pa ayoval ruma man jun b'ay xca'q'uis. Y re' man nkojquito' ta chi nkojq'uiy chupan ri kac'aslien riq'uin ri Dios, c'aslien chi nakacukub'a' kac'u'x riq'uin jaja'. 5Quire' ta'ej chica, ruma ri Dios nrajo' chi quinojiel ta nicajo-qui' riq'uin jun cánima sak, jun cánima ri nuna' chi otz c'o choch ri Dios, y riq'uin je' jun ketzij cukb'al c'u'x. 6Ruma ic'o nic'aj ri xa xquiya' can nojiel re'. Xa ja yan chic ri tzij ri man jun rakalien ri niqui'ej. 7Ijeje' niquina' chi i-maestro richin ri ru-ley ri Dios ri rutz'ib'an can ri Moisés. Pero xa man ni'ka ta pa quive' (man niqui'an ta entender) ri nu'ej ri ley re'. Y man cata'n ta ijeje' chica niqui'ej chirij ri nu'ej ri ley. 8Ojre' kata'n chi ri ley re' can otz. Pero nic'atzin chi can nicusas inche'l ri nu'ej. 9Y kata'n je' chi ri ley man xyo'x ta pa quive' ri vinak ri choj quic'aslien. Ri ley xyo'x pa quive' ri vinak ri man niquinimaj ta tzij, ri man otz ta quic'aslien choch ri Dios, ri c'o qui-pecados, ri c'o itziel tak kax riq'uin cánima, ri man jun rakalien niqui'an cha ri rub'e' ri Dios, ri nca'quiquimisaj quitie-quitata' y ri nca'quiquimisaj nic'aj chic vinak. 10Ri ley xyo'x je' pa quive' ri man i-c'ulan ta ri niquicanuj-qui' chi niqui'an pecado, y pa quive' ri achi'a' ri man nca'cajo' ta ixoki' y xa quiq'uin yan chic achi'a' nca'c'ujie-ve y niqui'an pecado. Pa quive' je' ri nca'quic'uaj vinak chi nca'quic'ayij, pa quive' ri i-tz'akoy-tzij, y pa quive' ri niquinataj rub'e' ri Dios jo'c chi ca'nimax chi ketzij ri niqui'ej. Y ri ley xyo'x je' pa quive' ri vinak ri man nicajo' ta ri ruch'ab'al ri Dios. 11Quire' nu'ej ri santo evangelio richin ri Namalaj Dios ri c'o ruk'ij. Y ja ch'ab'al re' ri e'n chuva inre' ruma ri Dios chi nitzijuoj. 12Niya' tiox b'a' cha ri Kajaf Jesucristo ruma ruyo'n vuchuk'a' chi ni'an ri samaj re'. Ruma xutz'at chi nuyo'n vánima riq'uin y rumare' xu'on chi xinuoc rusamajiel. 13Xuya' nusamaj, mesque altíra itziel xich'o' chirij, y mesque xa'nya' je' pa sufrimiento ri quiniman jaja', y q'uiy itziel tak kax ri xin'an chica. Pero jaja' xujoyovaj noch, ruma inre' chupan ri tiempo re', man vata'n ta ri chica ni'an, ruma maja' tinnimaj ri ruch'ab'al. 14Pero ri Kajaf Dios can xuya' ri ru-favor pano' sin medida; ruma xu'on chuva chi xincukub'a' nuc'u'x riq'uin ri Jesucristo y xuya' je' ri amor chuva inche'l ri c'o riq'uin ri Jesucristo. 15Y ri ni'ej chava can ketzij, y can otz chi ninimax cuma quinojiel: Chi ri Jesucristo xpa choch-ulief chi nca'rucol ri c'o qui-pecados, y ja inre' ri más c'o nu-pecado que chiquivach quinojiel. 16Pero mesque can itziel ri i-nub'anun-pa, ri Jesucristo xujoyovaj noch y xu'on perdonar ri nu-pecado, chi quire' xuc'ut chiquivach ri vinak chi jaja' c'o q'uiy ru-paciencia. Jaja' xu'on perdonar ri nu-pecado inre', chi quire' nuc'ut chiquivach ri vinak ri xtiquinimaj chi jaja' can xtu'on perdonar ri qui-pecados chi niquil ri c'aslien ri man niq'uis ta. 17Rumare' kaya' ruk'ij ri Dios richin nojiel tiempo. Jaja' ri Rey richin nojiel tiempo. Jaja' man nicon ta. Jaja' man nitz'iet ta, pero c'o. Jo'c jaja' ri Dios c'o y riq'uin jaja' c'o-ve nojiel no'j. Y jaja' ri tiyo'x ruk'ij y ru-gloria richin nojiel tiempo. Amén. 18Y atre' Timoteo can at inche'l nuc'ajuol, ni'ej chava: Man timastaj chava ri b'e'n can chavij atre' cuma ri hermanos ri xqui'ej ri x'e'x chica ruma ri Dios. Xa can tatija' ak'ij chi na'an ri samaj ri b'e'n can chava chi na'an, can inche'l nu'on jun utzulaj soldado. 19Can siempre tacukub'a' ac'u'x riq'uin ri Dios, y ri ajaluon y ri avánima siempre tuna' chi otz c'o choch ri Dios. Ruma ic'o hermanos ri man quire' ta xqui'an, rumare' xa'c'ujie' can y man chic xquicukub'a' ta quic'u'x riq'uin ri Dios. 20Quire' xqui'an ri Himeneo y ri Alejandro. Rumare' xa'njach pa ruk'a' ri Satanás, chi quire' ticatamaj chi man ca'ch'o' itziel chirij ri Dios.

will be added

X\