1 Thessalonians 5

1Hermanos, man nic'atzin ta chi nakatz'ib'aj-el chiva ri chica tiempo y ri chica k'ij xtipa ri Jesucristo. 2Ruma ixre' ja'al ivata'n chi man jun ta'mayuon ri chica k'ij xtipa ri Ajaf. Ruma antok jaja' xtipa, can xtu'on inche'l nu'on jun alak'uon chak'a'; man jun ta'mayuon jampe' nalka. 3Y antok ri vinak xtiqui'ej chi vacame otz kab'anun ruma c'o paz, xa ja xtiquina', xtipa jun nem castigo pa quive'. Can xtiqui'an inche'l nu'on jun ixok antok ya nic'ujie' ruxulu'. Man xca'colotaj ta choch ri castigo. 4Pero ixre' hermanos man ixc'o ta chic pa k'aku'n. Y rumare' antok xtipa chic ri Jesucristo, chivach ixre' man xtalka ta inche'l nalka jun alak'uon. 5Ruma konojiel ojre' ri kaniman ri Jesucristo man oj richin ta chic ri k'aku'n, xa oj richin chic ri sakil. 6Rumare' man taka'an inche'l niqui'an ri nic'aj chic vinak ri man ic'o ta pa sakil. Ijeje' man niqui'an ta pensar otz ri niqui'an ruma xa nca'var. Pero ojre' kuc'asie' y ka'na' pensar otz ri naka'an. 7Ri nca'var, chak'a' nca'var, y ri nca'k'ab'ar, chak'a' nca'k'ab'ar. 8Pero ojre' ri oj richin ri sakil, ruma kaniman ri Jesucristo, ka'na' pensar otz ri chica naka'an. Can takacukub'a' kac'u'x riq'uin ri Jesucristo y ca'kajo' quinojiel, chi quire' naka'an defender-ki' inche'l nu'on ri soldado ri nuya' jun ch'ich' choch ruc'u'x, y siempre kanimaj chi ya xojcolotaj chupan ri ka-pecado, chi quire' naka'an defender-ki' inche'l nu'on ri soldado ri nuya' jun casco pa rujaluon. 9Ruma ri Dios man xojrucha' ta chi nipa ri castigo pa kave'. Jaja' xojrucha' richin chi nikil ri salvación (colotajic) ruma nakanimaj ri Kajaf Jesucristo. 10Y ixre' ivata'n chi ri Jesucristo xcon kuma ojre'. Jaja' xcon chi xuya' ri c'aslien chika. Richin quire', vi xa c'a ojc'as vave' choch-ulief o xa nkucon, c'o kac'aslien riq'uin jaja'. 11Rumare' tiya' ruchuk'a' ri ivánima ixre' chib'il-ivi'. Y titola-ivi' richin chi nquixq'uiy chupan ri ic'aslien inche'l ib'anun-pa. 12Hermanos, nakac'utuj favor chiva chi qui'b'ana' respetar ri nca'samaj chicajol pa rusamaj ri Dios, ruma ijeje' ri i-c'uayuon ivichin. Jare' ri samaj ri yo'n chica ruma ri Ajaf Dios. Y chi nquixquich'olij je'. 13Rumare' qui'b'ana' respetar y qui'ivajo' ruma ri samaj ri niqui'an. Y man jun ta ayoval chicajol. 14Hermanos, naka'an rogar chiva chi qui'ch'olij ri hermanos ri man nicajo' ta nca'samaj. Ti'ej chica chi ca'samaj. Y ri caca' quic'u'x quib'anun, tiya' ruchuk'a' cánima. Y ri manak quichuk'a' chupan ri quic'aslien riq'uin ri Jesucristo, qui'ito' chi man ca'tzak can. Y tic'ujie' je' i-paciencia quiq'uin quinojiel. 15Y xa ic'o ri nca'b'ano itziel chiva, man ti'an ruc'axiel chica. Xa titija' ik'ij nti'an ri otz chica quinojiel chicajol-ka ixre' ri iniman ri Jesucristo y chica ri man quiniman ta. 16Siempre quixquicuot. 17Siempre tib'ana' orar. 18Can tiya' tiox b'a' cha ri Dios antok otz ixc'o y antok man otz ta ixc'o je'. Ruma quire' nrajo' ri Dios chi nti'an ixre' ri iniman ri Jesucristo. 19Man tichup rusamaj ri Espíritu Santo. 20Man itziel titz'at jun hermano ri nu'ej chicajol chi c'o ni'e'x cha ruma ri Dios. 21Xa tivaxaj nojiel ri nu'ej, chi quire' ntina'iej xa ketzij o xa man ketzij ta. Y ja ri otz tic'ama-ka riq'uin ivánima. 22Y nojiel ri man otz ta, man ti'an. 23Y ri Dios ri niyo'n paz pa tak ivánima, xtu'on chiva chi siempre ntivuc'uaj jun c'aslien sak choch jaja'. Xtuchajij je' ri iv-espíritu, ri ivánima y ri i-cuerpo, chi quire' man jun kax itziel nilitaj chivij antok xtipa chic jun b'ay ri Kajaf Jesucristo. 24Ri Dios can man jun b'ay xquixruya' can ruma jaja' ri xayuon ivichin, y jaja' can xtu'on iviq'uin inche'l ri nu'ej. 25Hermanos, tib'ana' orar pa ka-cuenta. 26Tiya' jun saludo chica quinojiel ri hermanos y titz'ub'aj ichi' pa rub'e' ri Ajaf Dios. 27Y pa rub'e' ri Ajaf ni'ej chiva, chi tib'ana' leer va carta va chiquivach quinojiel ri santos hermanos. 28Ja ta ri ru-favor ri Kajaf Jesucristo tic'ujie' iviq'uin. Amén.

will be added

X\